Կիրակի, Մարտ 12ին, Հ.Յ. Դաշնակցութեան նորագիրներու երդման արարողութեամբ նշուեցաւ Հայաստանի Ա. Հանրապետութեան երախտաւորներէն Կարօ Սասունիի մահուան 40ամեակը, Պուրճ Համուտի Ազգային գերեզմանատան մէջ գտնուող եւ վերջինիս աճիւնները պարունակող Հ.Յ.Դ. Պանթէոնին առջեւ: Հ.Յ.Դ. «Զաւարեան» ուսանողական միութենէն եւ Հ.Յ.Դ. Լիբանանի Երիտասարդական Միութենէն 52 նորագիրներ անցան Դաշնակցութեան շարքերը՝ երդուելով շարունակել պայքարը հայութեան եւ Հայաստանի ամբողջական ազատագրութեան համար: Օրուան կնքահայրը՝ պատմաբան Երուանդ Փամպուքեան, իր ուրախութիւնը եւ յուզմունքը յայտնեց երիտասարդներու նոր փաղանգի մը Դաշնակցութեան շարքերուն անդամակցութեան համար: Ան ըսաւ, որ եթէ Հ.Յ. Դաշնակցութիւնը իր հիմնադրութենէն 127 տարի ետք երիտասարդ կը մնայ ու կը գոյատեւէ, ապա այս երեւոյթը կը պարտինք այն իրողութեան, որ երիտասարդութեան յաջորդական սերունդներ անդամակցած են կուսակցութեան եւ վերանորոգած անոր պայքարը: Երուանդ Փամպուքեան ընդգծեց, որ այդ պայքարը տակաւին չէ աւարտած, եւ հայութեան իղձերը կը մնան անկատար: Ան շեշտեց, որ, դժբախտաբար, Հայաստանի Հանրապետութեան անկախութիւնը եւ ազատութիւնը վերջ չտուին հայութեան ցաւերուն. հայութիւնը, որ պէտք էր համախմբուէր իր հայրենիքին մէջ, տակաւին կը մնայ տարտղնուած, իսկ արտագաղթի պատճառով Հայաստանի մէջ արիւնահոսութիւնը կը շարունակուի, երկիրը կը պարպուի իր բնակչութենէն: Այս բոլորը հրամայական անհրաժեշտութեան կը վերածեն ընկերային արդարութեան հաստատումը Հայաստանի մէջ:
Պետական եւ կուսակցական գործիչ, հրապարակախօս, գրող եւ մտաւորական Կարօ Սասունիի մահուան 40ամեակին առիթով, դաշնակցական նորագիրներու այս սերունդը կոչուեցաւ «Կարօ Սասունիի սերունդ»:
