Հայագիտական ուսմանց եւ ուսումնասիրութեանց ազգային միութիւնը (NAASR) Մայիս 18ին 225.000 տոլարի նուէր ստացած է Մեսեչուսեց նահանգի մշակութային խորհուրդի մշակութային կալուածներու հիմնադրամէն։ Գումարը պիտի տրամադրուի Մեսեչուսեցի Պելմոնթ քաղաքը գտնուող Հայագիտական Միութեան կեդրոնի նորոգութեան՝ 4,5 միլիոն տոլար արժող ծրագիրին մէկ մասը իրականացնելու նպատակին։
Այս գումարին յաւելումով, արդէն իսկ կարելի եղած է ծրագիրի ընդհանուր գումարին մօտաւորապէս 70 տոկոսը ապահովել։
Միութիւնը շէնքը գնած էր 1989ին, իսկ այս ծրագիրին իրականացումով՝ կարելի պիտի ըլլայ շէնքը մատչելի դարձնել հանրութեան, շնորհիւ իր նոր գրատան, սրճարանին, խորհրդաժողովներու սրահին, ուսումնասիրական վայրերուն եւ այլ հաւաքավայրներուն։
