Հայ Կապոյտ Խաչի կրթական եւ դաստիարակչական նպատակներուն համաձայն՝ Հ. Կ. Խաչի Շրջանային Վարչութիւնը, այս տարի եւս, «Թագուհի Փաշայեան» մրցանակը տրամադրեց Հայ Կապոյտ Խաչի վարժարանները աւարտած հայ ուսանողի մը, անոր համալսարան մուտքի յաջողութեան առ ի գնահատանք։
Ինչպէս ծանօթ է, ամէն տարի «Թագուհի Փաշայեան» մրցանակին մասին մամլոյ յայտարարութեամբ կը տեղեկացուի հասարակութեան, որպէսզի հետաքրքրուողները փոխանցեն Յունաստանի համալսարաններու իրենց մուտքի քննութեանց նիշերը Հ. Կ. Խաչի գրասենեակ: Ապա՝ Շրջանային Վարչութիւնը, քննելէ ետք ստացուած դիմումները, կը հաստատէ համալսարան մուտքի բարձրագոյն նիշը ապահոված ուսանողը:
Այս տարեշրջանին, Հ. Կ. Խաչի «Փաշայեան» մրցանակին համար դիմողներէն բարձրագոյն նիշը ապահովեց Նարեկ Գազարեան, որ յաջողեցաւ 18.953 նիշով մուտք գործել Εθνικό Καποδιστριακό Πανεπιστήμιο (ΕΚΠΑ) Իրաւաբանութեան ճիւղ։
Այսպէս՝ 2017-2018 տարեշրջանին, «Թագուհի Փաշայեան» մրցանակը յանձնուեցաւ Նարեկ Գազարեանին, Երեքշաբթի օր՝ 23 Հոկտեմբեր 2018ին, Հ. Կ. Խաչի գրասենեակի «Փաշայեան-Քեպապճեան» սրահէն ներս, Հ. Կ. Խաչի Շրջանային Վարչութեան գումարած ժողովին ընթացքին։
Ժողովին ներկայ էին Հ. Կ. Խաչի Յունաստանի Շրջանային Վարչութեան ընկերուհիները, ինչպէս նաեւ պարգեւատրուող երիտասարդը եւ անոր մայրը:
Յունաստանի Հ. Կ. Խաչի Շրջանային Վարչութեան ատենապետուհի ընկ. Լիզէթ Գիրազեան նշեց, թէ Հայ Կապոյտ Խաչը հաւատարմութեամբ կը հետապնդէ կրթական եւ դաստիարակչական ծրագիրներու յաջողութիւնը՝ գիտակցելով, թէ մեր հայ ուսանողները փայլուն ապագայ մը կ՚ունենան՝ հպարտութիւն պատճառելով մեր բոլորին: Այս ծիրէն ներս, Հ. Կ. Խաչը կը քաջալերէ իրենց ուսման մէջ փայլուն արդիւնքներ արձանագրող ուսանողները։
Հ. Կ. Խաչի Շրջանային Վարչութիւնը շնորհաւորեց մրցանակակիր երիտասարդը եւ անոր ընտանեկան պարագաները՝ նորանոր յաջողութիւններ մաղթելով անոր։
ՀԱՅ ԿԱՊՈՅՏ ԽԱՉԻ ՇՐՋԱՆԱՅԻՆ ՎԱՐՉՈՒԹԻՒՆ
