Հայ Կապոյտ Խաչի կրթական եւ դաստիարակչական նպատակներուն համաձայն՝ Հ. Կ. Խաչի Շրջանային Վարչութիւնը, այս տարի եւս, «Թագուհի Փաշայեան» մրցանակը տրամադրեց Հայ Կապոյտ Խաչի վարժարանները աւարտած հայ ուսանողի մը, անոր համալսարան մուտքի յաջողութեան առ ի գնահատանք։
Ինչպէս ծանօթ է, ամէն տարի «Թագուհի Փաշայեան» մրցանակին մասին մամլոյ յայտարարութեամբ կը տեղեկացուի հասարակութեան , որպէսզի հետաքրքրուողները փոխանցեն Յունաստանի համալսարաններու իրենց մուտքի քննութեանց նիշերը Հ. Կ. Խաչի գրասենեակ: Ապա՝ Շրջանային Վարչութիւնը, քննելէ ետք ստացուած դիմումները, կը հաստատէ համալսարան մուտքի բարձրագոյն նիշը ապահոված ուսանողը:
Այս տարեշրջանին համար, Հ. Կ. Խաչի «Փաշայեան» մրցանակին համար դիմողներէն բարձրագոյն նիշը ապահովեց Երուանդ Մանուկեան, որ յաջողեցաւ 17.116 նիշով մուտք գործել Փիրէայի համալսարանի Ψηφιακά Συστήματα ճիւղը։
Այսպէս՝ 2016-2017 տարեշրջանին, «Թագուհի Փաշայեան» մրցանակը հանդիսաւորապէս յանձնուեցաւ Երուանդ Մանուկեանին Չորեքշաբթի օր՝ 25 Հոկտեմբեր 2017ին, Գոքինիոյ «Զաւարեան» Կեդրոնի «Զաքարեան¬Սարաճեան» զոյգ սրահներէն ներս, Հ. Կ. Խաչի Շրջանային Վարչութեան հրաւիրած միջ-վարչական ժողովին ընթացքին։
Ժողովին ներկայ էին Հ.Օ.Մ.ի Կեդրոնական Վարչութեան ներկայացուցիչ ընկ. Լիզա Աւագեան, Հ. Կ. Խաչի Յունաստանի Շրջանային Վարչութեան եւ հինգ մասնաճիւղներու վարչութեանց ընկերուհիները, Հ. Կ. Խաչի Յանձնախումբներու անդամները, ինչպէս նաեւ պարգեւատրուող երիտասարդը եւ անոր ծնողքը:
Յունաստանի Հ. Կ. Խաչի Շրջանային Վարչութեան ատենապետուհի ընկ. Լիզէթ Գիրազեան նշեց, թէ Հայ Կապոյտ Խաչը հաւատարմութեամբ կը հետապնդէ կրթական եւ դաստիարակչական ծրագիրներու յաջողութիւնը՝ գիտակցելով, թէ մեր հայ ուսանողները փայլուն ապագայ մը կþունենան՝ հպարտութիւն պատճառելով մեր բոլորին:
Այս ծիրէն ներս, Հ. Կ. Խաչը կը քաջալերէ իրենց ուսման մէջ փայլուն արդիւնքներ արձանագրող ուսանողները։
Հ. Կ. Խաչի Շրջանային Վարչութեան ատենապետուհին ու ժողովականները շնորհաւորեցին մրցանակակիր երիտասարդը եւ անոր ընտանեկան պարագաները, նորանոր յաջողութիւններ մաղթելով անոր։
ՀԱՅ ԿԱՊՈՅՏ ԽԱՉԻ
ՇՐՋԱՆԱՅԻՆ ՎԱՐՉՈՒԹԻՒՆ
