1-4 Դեկտեմբերին, Քալամաթայի մէջ տեղի ունեցաւ միջազգային գիտաժողով՝ նիւթ ունենալով «Մեծ աղէտի ժամանակաշրջանը եւ համագոյակցութեան աւարտը. վտարումներ, տեղահանումներ եւ ցեղասպանութիւններ՝ 1912-1924»։
Գիտաժողովը կազմակերպուած էր Յունաստանի կրթական ու կրօնից նախարարութեան եւ Քալամաթայի մետրոպոլիտին կողմէ, գործակցութեամբ Գալիֆորնիոյ UCLA համալսարանի «The Promise» հայկական հետազօտական կաճառին եւ Թեսաղոնիկէի Արիստոտելեան համալսարանի Պոնտական ուսմանց բաժանմունքին։
Գիտաժողովին հրաւիրուած էին եւ իրենց զեկուցումներով հանդէս եկան մեծ թիւով հայ, յոյն, թուրք եւ այլ օտար համալասարանական դասախօսներ ու քաղաքական գիտութեանց մասնագէտներ, որոնց կարգին էին Արմէն Մարսուպեան, Նազան Մագսուտեան, Մանուկ Աւետիքեան, Էրվէ Ժորժելէն, Թանէր Աքչամ, Սայիթ Չեթինօղլու եւ Մէրիհ Էրօլ։
Չորս օրուան մէջ կայացած գիտաժողովի ընթացքին 34 գիտնականներ հանդէս եկան զեկոյցներով եւ լուսարձակի տակ առին Արեւելեան ժողովուրդներու ցեղասպանութիւններն ու թրքական բարբարոսութիւնները, Պալքանեան եւ Ա. համաշխարհային պատերազմներու ու Զմիւռնիոյ աղէտի հետեւանքները։ Ժողովին հրաւիրուած էին եւ ներկայ եղան Յունահայոց թեմակալ Առաջնորդ Գեղամ արք. Խաչերեան, Գոքինիոյ եւ Ֆիքսի հոգեւոր հովիւներ Պարէտ քհնյ. Խաչերեան եւ Նարեկ քհնյ. Շահինեան, ինչպէս նաեւ Ազգային վարչութեան ատենապետ Թագւոր Յովակիմեան եւ անդամ Նազար Աւագեան։
Գիտաժողովի պաշտօնական բացման արարողութեան բեմ հրաւիրուեցաւ եւ ողջոյնի խօսք արտասանեց Առաջնորդ Սրբազան հայրը, որ նախ շնորհաւորեց կազմակերպիչ կառոյցները, ապա շեշտը դրաւ ցեղասպանութիւններու ճանաչման ու կանխարգիլման կարեւորութեան վրայ։ Ան նաեւ կարեւորեց նման գիտաժողովի մը կազմակերպումը, որու ընթացքին գիտական մօտեցումով կը քննուի մարդկութեան համար կարեւոր ժամանակահատուած մը, ուր տեղի ունեցան աշխահաքաղաքական մեծ եղելութիւններ եւ յանգեցան քրիստոնեայ ժողովուրդներու բնաջնջման ու տեհահանման իրենց օրրաններէն։
Գիտաժողովի ընթացքին, յունահայ համայնքի ներկայացուցիչները առիթը ունեցան ծանօթանալու հայ ակադեմական մասնակիցներուն եւ զրուցելու անոնց գիտական աշխատանքներուն ու հետազօտութիւններուն մասին։
ԳԼԽԱՒՈՐ ԷՋ ԳԱՂՈՒԹԱՅԻՆ Գաղութային կեանք 1912-1924 ցեղասպանութիւններուն նուիրուած միջազգային գիտաժողով Քալամաթայի մէջ