Հ.Յ.Դ. Բիւրոյի կազմակերպութեամբ, Շաբաթ 30 Սեպտեմբեր եւ Կիրակի 1 Հոկտեմբեր 2017ին, տեղի ունեցաւ Հ.Յ.Դ. Եւրոպայի եւ Միջին Արեւելքի մարմիններու Ռայոնական Ժողովը՝ Աթէնքի մէջ։
Ժողովին առընթեր, Հ.Յ.Դ. Յունաստանի Կեդրոնական Կոմիտէի կազմակերպութեամբ, տեղի ունեցաւ 11 նորագիրներու երդման արարողութիւն. Հ.Յ.Դ. Երիտասարդական Միութենէն եկող 11 երիտասարդ-երիտասարդուհիները, լրացնելով յատուկ դաստիարակչական շարք, իրենց պատրաստակամութիւնը յայտնեցին մուտք գործելու Հ.Յ.Դ. շարքերը՝ ծառայութեան դաշտը ընդլայնելու համար կուսակցական, քաղաքական, Հայ Դատի եւ հայապահպանման բնագաւառներէն ներս։
Երդման արարողութեան մթնոլորտը յուզիչ էր։ Ներկայ եղան Հ.Յ.Դ. Բիւրոյի անդամները, Ռայոնական Ժողովին մասնակցող ընկերները, ինչպէս նաեւ Աթէնքի մէջ գործող Կոմիտէութեանց ընկերները եւ ընկերուհիները։
Երդման արարողութեան կնքահայրն էր Հ.Յ.Դ. Բիւրոյի ներկայացուցիչ՝ ընկ. Հրանդ Մարգարեան, որ կուռ խօսքով մը հրաւիրեց նորագիրները արժեւորելու իրենց երդումն ու կուսակցական ինքնութիւնը՝ Հ.Յ.Դաշնակցութեան ընդմէջէն ծառայելու հայ ժողովուրդին, անոր դատին, Հայաստանի եւ Արցախի անվտանգութեան գործին, մեր հայրենի աշխարհի ազգային, ընկերային, տնտեսական եւ քաղաքական բարգաւաճման։
Այնուհետեւ, 11 նորագիրները, իրենց ձեռքը դնելով Հ.Յ.Դ. դրօշի, Ծրագրի եւ Կազմակերպական Կանոններուն վրայ, երդուեցին եւ մուտք գործեցին Դաշնակցութեան շարքերը։
Յաջորդեց ընկերային խրախճանք, բաժակաճառերով, կենացներով, մեներգներով եւ խմբերգներով՝ Դաշնակցական մթնոլորտին հարազատ, ոգեւորիչ եւ խանդավառ արտայայտութիւններով։
Բոլոր մասնակցողները սրտաբուխ կերպով բարի գալուստ մաղթեցին նորագիրներուն, բարի յաջողութեան եւ անսակարկ ծառայութեան մաղթանքներով։
