Ֆրանսայի Սահմանադրական Խորհուրդը Յունուար 26ին հակասահմանադրական համարած է ազգային կամ կրօնական հողի վրայ ցեղասպանութիւններու եւ զանգուածային սպանութիւններու ժխտումը քրէականացնելու մասին Ազգային Ժողովի Դեկտեմբեր 22ին ընդունած որոշումը:
Սահմանադրական Խորհուրդը որոշ փոփոխութիւններ պահանջած է օրէնքի 173րդ յօդուածի 2րդ կէտին մէջ, որ կը վերաբերի ցեղասպանութիւններու եւ որոշ յանցագործութիւններու (որոնց շարքին` անոնք, որոնք դեռ իրաւաբանօրէն այդպիսին չեն համարուիր) ժխտման համար տուգանքին:
Սահմանադրական Խորհուրդը սահմանած է, որ ցեղասպանութիւններու ժխտումը քրէականացնելը եւ անկէ բխող տուգանքներ պարտադրելը կը խախտեն 1881ին ընդունուած խօսքի եւ մամուլի ազատութեան մասին օրէնքը, ինչ որ կը հակասէ Ֆրանսայի սահմանադրութեան:
Շատ կարեւոր է նշել եւս մէկ նրբութիւն. Ազգային Ժողովի օրէնքի փոփոխութիւններուն մէջ կը խօսուի քրէականացման մասին ոչ միայն ցեղասպանութիւններու եւ զանգուածային սպանութիւններու պարագային, որոնք իրաւաբանօրէն արդէն յանցագործութիւն ճանչցուած են, այլ նաեւ այն յանցագործութիւններու ժխտումը քրէականացնելու մասին, որոնք իրաւաբանօրէն դեռ ցեղասպանութիւն կամ յանցագործութիւն չեն համարուիր եւ այս պահուն պատմաբաններու վէճի առարկայ են:
Կը դատապարտենք Ֆրանսայի Սահմանադրական Խորհուրդին
որոշումը,- կը յայտարարէ Մուրատ Փափազեան
Ֆրանսայի Հայ Դատի Յանձնախումբը կը դատապարտէ ազգային կամ կրօնական հողի վրայ ցեղասպանութիւններու եւ զանգուածային սպանութիւններու ժխտումը քրէականացնելու մասին Ազգային Ժողովի Դեկտեմբեր 22ին ընդունած որոշումը Ֆրանսայի Սահմանադրական Խորհուրդին կողմէ անվաւեր համարելը: Այս մասին Յունուարի 27ին, NEWS.amի հետ զրոյցի ընթացքին, ըսած է Ֆրանսայի հայկական կազմակերպութիւններու համակարգող խորհուրդի համանախագահ Մուրատ Փափազեան։ «Սահմանադրական խորհուրդի որոշումը կը դատապարտենք, անիկա անհիմն է, համաձայն չենք այդ որոշումին: Գիտէինք, որ վտանգ կայ, հնարաւոր է, որ մերժէ, ինչպէս 2012 թուականին եղաւ, բայց լաւատես էինք»,- ըսած է ան:
Մուրատ Փափազեանի խօսքով՝ Սահմանադրական Խորհուրդի այս որոշումը չի կրնար պատճառ դառնալ, որպէսզի Ֆրանսայի Հայ Դատի Յանձնախումբը Հայոց Ցեղասպանութեան ճանաչման համար ծաւալած պայքարը դադրեցնէ:
«Սահմանադրական Խորհուրդը խնդիր տեսաւ եւ անվաւեր համարեց օրէնքը, բայց ատիկա մեզի չի կրնար ստիպել, որպէսզի չպայքարինք, որ Թուրքիան Հայոց Ցեղասպանութիւնը ճանչնայ: Մենք մեր պայքարը տարբեր ձեւերով պիտի շարունակենք, բայց նախ պէտք է հասկնանք` ինչպէ՞ս պիտի շարունակենք մեր պայքարը: Կարելի է ըսել, որ Թուրքիոյ քաղաքական ճնշումները հնարաւոր է, որ ազդած են Սահմանադրական Դատարանին վրայ»,- ըսած է Փափազեան:
Ֆրանսայի հայկական կազմակերպութիւններու համակարգող խորհուրդի համանախագահը նշած է, որ Ֆրանսայի Հայ Դատի Յանձնախումբը ցեղասպանութիւններու եւ զանգուածային սպանութիւններու ժխտումը քրէականացնելու մասին օրինագիծը ճանչնալու ուղղութեամբ ահռելի աշխատանք կատարած է եւ չի կարծեր, որ Յունուար 26ին Սահմանադրական Խորհուրդին կողմէ նման որոշում կայացնելը իրենց թերի աշխատանքին պատճառը կրնար ըլլալ:
«Ֆրանսայի հայ համայնքը արդէն 10 տարիէն աւելի կ՛աշխատի այս օրինագիծի ընդունման համար, իսկ վերջին տարիներուն ահռելի աշխատանք կատարուած է, որովհետեւ նախագահ Օլանտ իր խոստումը կ՛ուզէր կատարել: Ֆրանսացի եւ մեր իրաւաբաններու հետ այս օրէնքի վրայ լրջօրէն աշխատած ենք, որպէսզի այս օրէնքը անցնէր, սակայն, Սահմանադրական Դատարանը նման որոշում կայացուց»,- ըսած է ան:
