Շաբաթ, 22 Ապրիլ 2023-ի երեկոյեան ժամը 7-ին, Գարէայի «Ս. Սահակ եւ Ս. Մեսրոպ» մատուռին մէջ, Սուրբ եւ Անմահ Պատարագ մատուցուեցաւ, որուն հանդիսապետեց եւ իր հայրական պատգամը փոխանցեց, Յունաստանի Հայոց թեմի բարեջան Առաջնորդ՝ գերշ. Տ. Գեղամ Ս. Արք. Խաչերեան: Պատարագեց շրջանիս հոգեւոր հովիւ Տ. Նարեկ քհնյ. Շահինեան:
Պատարագի երգեցողութիւնը կատարեցին Գարէայէն, Նէոս Գոզմոս(Ֆիքս)էն եւ Գոքինիայէն դպրաց դասի անդամ-անդամուհիներ, դպրապետութեամբ՝ բրշ. Պետրոս սրկ. Պարսամեանի:
Ս. Խորանին սպասարկեցին, բրշ. Լեւոն սրկ. Ունանեան եւ պատանի դպիրներ Գրիգոր Ունանեան (որ ընթերցեց օրուան Ճաշու Գիրքը) եւ Ֆիլիփոս Պրուծոս-Երանոսեան (որ երգեց օրուան սաղմոսները):
Պատարագին ներկայ եղան, յունահայոց թեմի Ազգային վարչութեան փոխ ատենապետ տոքթ. Ստեփան Փափազեան, Գարէա-Կեսարեանիի եւ Ֆիքսի Թաղային խորհուրդներու եւ Տիկնանց մարմնոյ անդամ-անդամուհիներ, շրջանիս մէջ գործող ազգային միութեանց ներկայացուցիչներ եւ գոհացուցիչ թիւով շրջանիս հաւատացեալ ժողովուրդի զաւակներ:
Յաջորդեց Զատկական աւանդական հիւրասիրութիւն:
ԹՂԹԱԿԻՑ
