Երկուշաբթի օր, յունական կառավարութեան բանբեր Արիսթոթելիա Փելոնի ներկայացուց յաւելեալ միջոցներու կիրարկումը, «Քորոնա» ժահրի տարածումը կանխելու ուղղութեամբ։
Այսպէս, որոշուեցաւ բոլոր խանութները փակ պահել, բացառութեամբ դեղատուներու, մեծ շուկաներու (σούπερ μάρκετ), դրամատուներու եւ վարելանիւթի կայաններու։ Միաժամանակ, ան հերքեց տարածուած լուրերը, որով կառավարութիւնը կը մտածէ շրջագայութեան ամբողջական արգիլում կիրարկել։
Նաեւ, ան յայտնեց թէ Աթէնքի կեդրոնին մէջ ինքնաշարժներու շրջագայութեան փոխն ի փոխ դրութիւնը ի զօրու չէ մինչեւ Ապրիլի վերջ։
Տիկ. Փելոնի յայտնեց, որ կառավարութիւնը պիտի դիմէ Եւրոպական Միութեան մարմիններուն, վերացնելու համար առողջապահութեան մարզին մէջ կիրարկուած սեղմումները, որպէսզի կարգ մը դրամական պահեստներ գործածուին «Քորոնա» ժահրի դիմագրաւման ծրագիրներուն համար։
Յայտնի եղաւ, որ «ՆԻՄՑ» հիւանդանոցը ամբողջութեամբ պիտի տրամադրուի «Քորոնա» ժահրի վարակուածներու բուժման համար։
Վերջապէս, կառավարութեան բանբերը յայտնեց, որ այսուհետեւ Յունաստան մուտք գործող անձերը 14օրեայ ստիպողական մեկուսացման պիտի ենթարկուին։
Վարչապետը արգիլեց կրօնական բոլոր
արարողութիւններու կատարումը
Երկուշաբթի գիշեր, վարչապետ Միցոթաքիս «Թուիթըրի» ճամբով յայտարարեց Յունաստանի մէջ ամէն տեսակի կրօնական արարողութիւններու արգիլումը, որոշում մը որ ի զօրու է բոլոր դաւանանքներու եւ կրօններու համար։
Ըստ որոշումին, եկեղեցիները բաց պիտի մնան միայն անձնական աղօթքի կամ յուղարկաւորութիւններու համար, անհրաժեշտ նախզգուշական միջոցներու կիրարկումով։ Այս որոշումը պիտի գործադրուի մինչեւ 30 Մարտ։