Թրակիոյ շրջանին մէջ նորոգ ձեռնադրեալ արժ. Տ. Դանիէլ քհնյ. Գալլողըլեան, յետ ձեռնադրութեան ապաշխարութեան շրջանը բոլորելով, Կիրակի, 19 Յունիս 2022-ին, Գոմոթինիի «Ս. Գրիգոր Լուսաւորիչ» եկեղեցւոյ մէջ մատուցեց իր անդրանիկ Ս. Պատարագը։
Արարողութեանց հանդիսապետեց Յունաստանի Թեմի Առաջնորդական փոխանորդ գերպ. Տ. Յովհաննէս ծ. վրդ. Սաղտըճեան։ Շրջանին մէջ ապրող հաւատացեալներու կողքին, ներկայ եղան նաեւ Գոմոթինիի եւ միջթաղայինի ատենապետները ու անդամները։ Պատարագի հոգեզմայլ երգեցողութիւնը կատարեց եկեղեցւոյ դպրաց դասը։
«Հայր Մեր»-էն առաջ, նորընծայ քահանայ հայրը, իր անդրանիկ խօսքը փոխանցեց ներկայ ժողովուրդին։
Ան շեշտեց Քրիստոսի ճշմարիտ լոյս ըլլալու խորհուրդը։ Ընդգծեց, թէ Քրիստոս՝ լուսաւորիչը մեր կեանքին, կարողութիւն ունէր խաւարը փարատելու, միտքերը մաքրելու եւ սիրտերը սրբելու։ Թելադրեց, հետեւիլ ճշմարիտ լոյսին՝ Քրիստոսի, որպէսզի լոյսի աղբիւրին անաղարտ ճառագայթներով լուսաւորուած, կարելի ըլլայ բարի գործեր կատարել Աստուծոյ փառքին համար։
Տէր հայրը շնորհակալութիւն յայտնեց բոլոր անոնց որոնք իր պատրաստութեան շրջանին, ձեռնադրութեան օրը, ապաշխարանքի շրջանին, ինչպէս նաեւ անդրանիկ Ս. Պատարագի մատուցման իր հետ եղած անձերուն։ Շնորհակալութիւն յայտնեց իր հոգեւոր ծնողին՝ Թեմակալ Առաջնորդ գերշ. Տ. Գեղամ Ս. Արք. Խաչերեանին։ Նաեւ, շնորհակալութիւն յայտնեց Թրակիոյ թաղային խորհուրդներուն եւ տիկնանց կազմին։
Յաւարտ Ս. Պատարագի Տ. Յովհաննէս ծ. վրդ.ը հաւատացեալներուն ներկայացուց նորընծայ Տ. Դանիէլ քահանան ու ըսաւ. «Տէր Հայրը իր երիտասարդ տարիքէն եկեղեցւոյ սպասարկած է եւ Աստուծոյ նախախնամութեամբ արժանացած՝ քահանայական սուրբ կարգին։ Ան վայելեց հոգեւոր եղբայրներուն քաջալերանքը եւ 40 օրեր առաջ որոշեց հոգեւորական դառնալ ու այս ուղղութեամբ դիմեց Յունաստանի Թեմի Սրբազան հօր։ Որպէս Աստուծոյ սպասաւորը, այսօր Տիրոջ Ս. Սեղանին առջեւ կանգնած Ս. Պատարագ կը մատուցանէ։
Յանուն հաւատացեալ ժողովուրդին, շնորհակալութիւն կը յայտնեմ Յունաստանի Թեմի բարեջան Առաջնորդին, որ եղաւ նորընծայ Տէր հօր հոգեւոր ծնողը։ Կը շնորհաւորեմ նաեւ հոգեւորականաց դասը, որուն նոր անդամը ծառայութեան պիտի սկսի։ Աղօթեցէ՛ք, Տէր հօր համար, որպէսզի ան լիովին ծառայէ Քրիստոսի եկեղեցին եւ մերազն հաւատացեալ ժողովուրդին»։
Պատարագի աւարտին, ժողովուրդը մօտեցաւ նոր քահանայ հօր եւ անոր փոխանցեց սրտագին բարեմաղթանքներ։ Տէր Դանիէլ, իր կարգին, բոլորին բաշխեց իր օրհնութիւնը եւ մաղթանքներ փոխադարձեց։
ԹՂԹԱԿԻՑ