Ուրբաթ՝ 5 Յուլիս 2019ի առաւօտուն, «Ազատ Օր»ի խմբագրատուն այցելեց Հայաստանի «Խաչատուր Աբովեան»ի անուան պետական մանկավարժական համալսարանի դասախօս ընկ. Խաչատուր Ստեփանեան։ Ան, նաեւ Հ.Յ.Դ. Հայաստանի Գերագոյն մարմնի կողքին գործող Կրթութան եւ գիտութեան յանձնախումբի ատենապետն է։
Խմբագրութիւնս յարգարժան հիւրին հետ առիթը ունեցաւ խօսելու Հայաստանի կրթական ոլորտին մասին։ Ան մանրաման կերպով ներկայացուց Կրթութան եւ գիտութեան յանձնախումբի ծրագիրները։ Յանձնախումբը կը բաղկանայ կրթական մարզին մէջ մեծ փորձառութիւն ունեցող մասնագէտներէ, որոնք կը զբաղին կրթութեան երեք մակարդակներու՝ նախադպրոցական, դպրոցական եւ համալսարանական բաժիններու հարցերով եւ խնդիրներով։
Կրթական երեք մակարդակներուն մանրամասնելով, յարգելի ընկերը անդրադարձ ըրաւ մանկապարտէզներու անբաւարար թիւին մասին, նշելով թէ, ներկայիս՝ փոքրիկներու թիւի միայն 2/3ը մանկապարտէզ կը յաճախէ, իսկ մնացեալը տուն կը մնայ։ Մանկապարտէզներու բաւարար թիւի չգոյութեան խնդիրը աւելի շեշտաւորուած է մարզերու եւ գիւղերու մէջ։
Դպրոցական մակարդակի (նախակրթարան-երկրորդական) ուսման մասին խօսելով, ընկ. Ստեփանեան մատնանշեց թէ այսօր՝ վտանգի տակ կը գտնուի ազգային դաստիարակութեան, հայ եկեղեցւոյ ազգային դերակատարութեան եւ ռազմագիտական կրթութեան բաժինը, որ հետզհետէ նուազումի կ՚ենթարկուի։ Այսպէս՝ աշակերտները չեն ստանար այն կարեւոր կրթութիւնը եւ գիտելիքները, որոնք մասնաւոր դեր կ՚ունենան հայ երիտասարդութեան ազգային գիտակցութեան զարգացման մէջ։
Յանձնախումբի կարեւոր աշխատանքներէն եղած է ծրագիրներու մշակումը՝ Հայաստանի կրթական մակարդակը մօտեցնելու համար միջազգային բարձր չափանիշներուն։ Այս հարցով, յանձնախումբը մատնանշած է մարզերու մէջ համալսարանները ուժեղացնելու հրամայականը, որպէսզի անոնք անմիջական կերպով սատարեն նաեւ մարզերու տնտեսական, ճարտարուեստական եւ ընկերային զարգացման։
Մասնաւորապէս, ընդգծուեցաւ Կիւմրին համալսարանական կեդրոն վերածելու ծրագիրը, որ նոր շունչ եւ ուժ պիտի տայ քաղաքի զարգացման, մասնաւորապէս՝ գիւղատնտեսութեան ոլորտէն ներս։ Մեր զրուցակիցը ընդգծեց, թէ այս կարեւոր ծրագրին մէջ յատուկ տեղ կը գրաւեն Կիւմրիի միջոցով սատարելու Շիրակի, Լոռիի եւ Արագածոտնի մարզերու, ինչպէս նաեւ Ջաւախքի արդիւնաբերական եւ գիւղատնտեսութեան աճման մասնակի ծրագիրները։
Ընկ. Խաչատուր Ստեփանեան նաեւ յայտնեց, թէ յանձնախումբի աշխատանքներու ծիրէն ներս, ծրագրուած է սատարել Հայաստանի բնագիտութեան մարզին մէջ անցեալի բարձր որակի ու վարկի վերականգնումին։ Այս աշխատանքը կը միտի նաեւ զօրացնել հայկական բանակի ուժականութիւնը՝ հիմնուած գիտական եւ մասնաւորաբար՝ բնագիտական զարգացման վրայ։
Զրուցակիցը նաեւ յայտնեց թէ, Օգոստոս-Սեպտեմբեր ամիսներուն, Հայաստանի մէջ պիտի գումարուի հանրակրթութեան նուիրուած կարեւոր գիտաժողով մը, որուն հրաւիրուած են մասնակցելու երկրի իշխանութիւնները, հայրենի մասնագէտներ եւ կրթական ոլորտով հետաքրքրուած անձնաւորութիւններ։
Կենսագրական գիծեր
Խաչատուր Ստեփանեան ծնած է 1976ին Ջաւախքի Ղադոլար գիւղին մէջ։
1998ին աւարտած է «Խաչատուր Աբովեան»ի անուան հայկական պետական մանկավարժական ինստիտուտի պատմութեան և աշխարհագրութեան ֆակուլտետի պատմութեան բաժինը: 1998-2001ին ուսանած է նոյն բուհի ասպիրանտուրային մէջ` «Հայոց պատմութիւն» մասնագիտութեամբ:
2018ին պաշտպանած է տոքթորական ատենախօսութիւն՝ «Հայաստանում խորհրդային իշխանութեան հաստատման հիմնահարցը սփիւռքահայ հասարակական-քաղաքական մտքի գնահատմամբ (1920-1930ական թթ.)» նիւթով: Պատմական գիտութիւններու տոքթոր է:
2004ին մասնագիտական վերապատրաստութիւն ունեցած է Սանկտ-Պետերբուրգի համալսարանին մէջ: 2009-2010ին ուսանած է Եւրոպայի Խորհուրդի քաղաքական դասընթացքներու երեւանեան ուսումնարանէն ներս: Կատարած է յաւելեալ մասնագիտական ուսում Սթրասպուրկի եւ Պուտափեշտի համալսարաններուն մէջ։
2006էն կը դասաւանդէ «Խաչատուր Աբովեան»ի անուան հայկական պետական մանկավարժական համալսարանի հայոց պատմութեան բաժինին մէջ:
Հեղինակ է հինգ մենագրութիւններու, մէկ բուհական դասագիրքի, շուրջ 70 գիտական եւ գիտամեթոտական յօդուածներու: Խմբագրած եւ հրատարակութեան տուած է 1918ի Հայաստանի Հանրապետութեան գործիչներու աշխատութիւններ:
