Փիրէայի եւ շրջակայքի հայկական գաղութը ճանչնալու, ինչպէս նաեւ գործակցական կապեր ստեղծելու նախանձախնդրութեամբ, Փիրէայի քաղաքապետ Եաննիս Մորալիս, Չորեքշաբթի, 29 Մարտ 2023-ի երեկոյեան, ընկերակցութեամբ փոխքաղաքապետ Յարութիւն Մարգարեանի եւ փոխմարզպետուհի Սթաւրուլա Եանաքուի, այցելեց Գոքինիոյ «Զաւարեան» կեդրոնը։
Հ.Յ.Դ. Գոքինիոյ «Վարանդեան» կոմիտէի գլխաւորութեամբ, քաղաքապետի պատուիրակութիւնը դիմաւորեցին տեղական Հ.Կ.Խաչի, Հ.Մ.Ը.Մ.-ի, Համազգայինի, Հ.Յ.Դ. Երիտ. Միութեան եւ Թաղային խորհրդոյ վարչական կազմերը։
«Զաքարեան-Սարաճեան» զոյգ սրահներուն մէջ կայացած հանդիպումին, բարի գալստեան խօսքէն ետք, իւրաքանչիւր կառոյց ներկայացուց իր գործունէութեան ամփոփ պատկերը, նաեւ անդրադարձ եղաւ Գոքինիոյ հայ գաղութի 100-ամեայ պատմութեան, որպէս գաղթակայան եւ կազմակերպուած գաղութ՝ իր ազգային, հոգեւոր, կրթական եւ հասարակական գործունէութեամբ։
Քաղաքապետը, իր կարգին, գոհունակութիւն յայտնեց իր առջեւ պարզուած պատկերին համար, շեշտելով թէ իրենց համար ուրախալի երեւոյթ է տեսնել այնքան համախումբ եւ կազմակերպ հաւաքականութին մը, որ իր պատմութեամբ եւ աշխատանքով նախանձելի դիրք կը գրաւէ քաղաքի իրականութեան մէջ։
Քաղաքապետը առաջարկեց հետագայ քայլերու շրջագիծ մը, որ պիտի պարունակէ մշակութային եւ յարաբերական ելոյթներ, շեշտը դնելով քաղաքապետարան-հայ գաղութ գործակցութեան վրայ։ Ծաւալած զրոյցի ընթացքին, միտքեր փոխանակուեցան զանազան ոլորտներու մէջ հայկական ներկայութիւնը զգալի դարձնելու համար։ Քաղաքապետը յայտնեց, թէ ծրագրումի ամէն կարելիութիւնները պէտք է ընձեռել, որպէսզի արդինաւէտ եւ գործնական միջոցներով հնարաւոր ըլլայ համատեղ գործակցութիւնը հայ գաղութին հետ։ Իր կարգին, փոխմարզպետուհիին եւս ներկայացուեցան զանազան կէտեր, որոնք կարելի է լուծել մարզպետարանի ճամբով։
Իր այցելութեան աւարտին, քաղաքապետը եւ իր խումբը այցելեցին Հ.Կ.Խաչի «Զաւարեան» ազգային վարժարանը եւ դիմաւորուեցան տնօրէնուհի ընկ. Հ. Մինասեանին կողմէ։ Պատուիրակութիւնը մօտէն ծանօթացաւ հայակրթութեան ծրագիրներուն, դպրոցի պատմութեան եւ դասաւանդման նորաձեւութիւններուն։ Քաղաքապետը եւ իր գործակիցները իրենց հիացմնունքը յայտնեցին կատարուած աշխատանքին համար։
ԹՂԹԱԿԻՑ
