Սպանիոյ Կուլլերա քաղաքի Քաղաքային Խորհուրդի նիստին, չորս կուսակցութիւնները միաձայն ճանչցած են Հայոց Ցեղասպանութիւնը` դատապարտելով մարդկութեան դէմ գործուած յանցանքը, յորդորելով Սպանիոյ այլ իշխանութիւններուն եւ յատկապէս կեդրոնական կառավարութեան ու Թուրքիոյ` հետեւելու իրենց օրինակին,- կը հաղորդէ «Հայերն Այսօր»:
Վալենսիայի «Արարատ» միութենէն կը հաղորդեն, որ քաղաքապետ Ճորտի Մայոր իր խօսքին մէջ մասնաւորապէս նշած է, որ իրերը պէտք է կոչել իրենց անուններով եւ այն, ինչ տեղի ունեցաւ հայ ժողովուրդին հետ 20րդ դարասկիզբին, միայն մէկ անուն ունի`ցեղասպանութիւն:
Յատկանաշական ելոյթ ունեցած է Փոտեմոս կուսակցութեան խօսնակը, որ նշած է, թէ Թուրքիան ոչ միայն պէտք է ճանչնայ Ցեղասպանութիւնը, այլեւ հատուցէ վնասները եւ յատկապէս վերադարձնէ հայերուն պատմական հողերը:
Նիստին ներկայ եղած են հայ համայնքի ներկայացուցիչներ, որոնց անունով Արարատ Ղուկասեան շնորհակալութիւն յայտնած է քաղաքապետարանին` նշելով, որ Կուլլերան դարձաւ Սպանիոյ 27րդ քաղաքը, որ կը ճանչնայ Հայոց Ցեղասպանութիւնը, որ սա պատմական օր է ոչ միայն սպանահայութեան, այլ նաեւ քաղաքին համար: Միջնորդագիրը քաղաքապետարանին ներկայացուցած էր Արարատ հայկական միութեան Կուլլերայի ներկայացուցիչ Հերմինէ Աբրահամեան:
Իտալիոյ Թոլֆա քաղաքի համայնքներու խորհուրդը ընդունած է Հայոց Ցեղասպանութեան ճանաչման մասին բանաձեւ, որուն նախագիծը առաջարկած էր Հռոմի հայերու Assoarmeni միութիւնը, կը հաղորդէ News.am: Քաղաքապետ Լուիճի Լանտին յայտնած է, որ Հռոմի մօտ գտնուող այդ փոքր քաղաքը միշտ յարգած է հայերը եւ անոնց ողբերգական ճակատագիրին յիշատակը: Հայկական համայնքի ներկայացուցիչները քաղաքի իշխանութիւններուն շնորհակալութիւն յայտնած են: Ատկէ ետք քաղաքի այգիին մէջ օծուած է խաչքար՝ հայ առաքելական եկեղեցւոյ հոգեւոր հովիւ Տիրայր Քհնյ. Յակոբեանի ձեռամբ:
