Ապրիլ 24ի առաւօտեան, Պոլսոյ Սուլթան Ահմէտ հրապարակին վրայ, Հայոց Ցեղասպանութեան զոհերու յիշատակին նուիրուած ձեռնարկ մը տեղի ունեցած է: Ըստ թրքական «Տողան» լրատուական գործակալութեան՝ ձեռնարկը կազմակերպած էր Թուրքիոյ «Մարդու իրաւունքներու միութիւն»ը:
Ըստ «Էրմենիհապեր»ի՝ արարողութեան մասնակցած են Եւրոպայէն եւ աշխարհի տարբեր վայրերէ եկած հայեր: Մասնակիցները պարզած են պաստառներ, որոնց վրայ գրուած էր՝ «Ճանչցի՛ր Հայոց Ցեղասպանութիւնը, ներողութիւն խնդրէ՛, հատուցէ՛»:
Այդ ընթացքին խումբ մը թուրք ուսանողներ վանկարկած են՝ «Մենք Մուստաֆա Քեմալի եւ Էնվեր փաշայի զինուորներն ենք»: Վերջիններուս ոստիկանութիւնը արագ կերպով հեռացուցած է տարածքէն:
Ձեռնարկին մասնակից Եւրոպայի հակացեղային շարժման (EGAM) նախագահ Պենճամին Ապթան լրագրողներուն ըսած է.- «Ցեղասպանութեան ժխտողականութեան դէմ շարունակուող պայքարը միայն հոս չի մղուիր, այդ պայքարը կը շարունակուի ամբողջ աշխարհի մէջ: Մենք՝ որպէս Եւրոպայէն եւ Միացեալ Նահանգներէն եկած հայեր եւ այլազգիներ, այդ պայքարին համար հոս ենք»:
Նոյն կազմակերպութեան Պոլսոյ ներկայացուցիչ Մերալ Չըլքըն քննադատած է այն, որ Թուրքիոյ մէջ Հայոց Ցեղասպանութեան գլխաւոր կազմակերպիչներ Թալէաթ եւ Էնվեր փաշաներու անուններով հրապարակներ, դպրոցներ, փողոցներ եւ պողոտաներ կոչուած են:
Իսկ ինչպէս «Սի.Էն.Էն.»ի (CNN) թրքական ծառայութիւնը կը յայտնէ՝ Պոլսոյ Էլմատաղ շրջանին մէջ կայացած յիշատակի արարողութեան ընթացքին հաւաքի մասնակիցները պարզած են 235 մտաւորականներու լուսանկարներով ու անուններով պաստառներ, ինչպէս նաեւ՝ 2007ին սպաննուած Հրանդ Տինքի նկարով պաստառ մը: Նախաձեռնութեան հեղինակներուն ջանքերով՝ Էլմատաղի մէջ հայ մտաւորականներուն ի պատիւ երկու յուշաքար բացուած է:
