Ուրբաթ, 9 Փետրուար 2024-ի, առաւօտեան ժամը 8։30-ին, Սրբոց Վարդանանց Զօրավարացն Մերոց եւ 1036 Վկայիցն ազգային եւ եկեղեցական տօնին առիթով, մատուցուեցաւ Ս. պատարագ Գոքինիոյ Ս. Յակոբ եկեղեցւոյ մէջ։
Արարողութեան նախագահեց Յունաստանի Հայոց թեմի Առաջնորդ՝ գերշ. Տ. Գեղամ Ս. արք. Խաչերեան։ Գեղեցիկ սովորութեան համաձայն, Ս. պատարագին ներկայ գտնուեցաւ Հայ Կապոյտ Խաչի «Զաւարեան» ազգ. վարժարանի տնօրէնութիւնը, ուսուցչական կազմն ու աշակերտութիւնը:
Ս. պատարագը մատուցեց տեղւոյն հոգեւոր հովիւ Տ. Պարէտ քհնյ. Խաչերեան: Ս. խորանին սպասարկեցին Կարապետ սրկ. Քէօսէեան ու հինգ աշակերտներ։ Իսկ երգեցողութիւնը կատարեցին վարժարանի Ե. եւ Զ. դասարանի աշակերտները, ղեկավարութեամբ տնօրէնուհի տիկ. Հայկան Մինասեանի եւ ընկերակցութեամբ տիկ. Շաքէ Քէօսէեանի։
Ս. պատարագի աւարտին, Գերշ. Տ. Գեղամ Ս. Արք. Խաչերեան իր հայրական պատգամը փոխանցեց աշակերտութեան։
Ան նախ մեծապէս գնահատեց Ս. խորանին վրայ ծառայող եւ Ս. պատարագի լրիւ երգեցողութիւնը կատարող աշակերտները։ Ապա քաջալերեց անոնց, հետեւելու Կարապետ սրկ. Քէօսէեանի ու տիկնոջ օրինակին, դառնալով ապագային անոնց տեղը փոխարինողները։ Սրբազան Հայրը ետքը անդրադարձաւ Ս. Վարդանանց զօրավարաց տօնի պատմութեան, կարեւորութեան եւ մեր ժողովուրդի զաւակներուն թողած ժառանգին մասին։ Ան շեշտեց, թէ այդ տօնը բոլորի տօնն է։ Ինչպէս նաեւ ինքզինք հպարտ հայ զգալու, հայօրէն ապրելու, հայրենիքին ու հաւատքին ծառայելու ու նուիրաբերելու մղիչ ուժն է։ Առաջնորդ Սրբազան Հայրը խօսքի աւարտին աշակերտներուն թելադրեց ըլլալ հայասէր, ազգասէր ու եկեղեցասէր պատանիներ ու տէր կանգնիլ մեր ժողովուրդի լեզուին, պատմութեան ու հարուստ մշակոյթին։
Ետքը վարժարանի աշակերտները, եկեղեցւոյ բակին մէջ ներկայացուցին գեղարուեստական յայտագիր մը նուիրուած Ս. Վարդանանց տօնին։ Անոնք երգեցին ազգային երգեր, արտասանեցին ոտանաւորներ, ներկայացուցին թատերական կտոր, ինչպէս նաեւ պարեր։
Յայտագրի վերջաւորութեան, գերշ. Տ. Գեղամ Ս. արք. Խաչերեան գնահատեց Հայ Կապոյտ Խաչի «Զաւարեան» ազգ. վարժարանի տնօրէնութիւնը, ուսուցչական կազմն ու աշակերտութիւնը, գեղեցիկ ու տպաւորիչ ներկայացումին համար:
ԹՂԹԱԿԻՑ
