11 Նոյեմբեր 2019ի կէսօրին Ազգային առաջնորդարան այցելեց Կիպրոսի երեսփոխան, եւրոխորհրդարանի նախկին անդամ վիրաբոյժ Էլէնի Թէոխարուս, որ Հայ Կապոյտ Խաչի Շրջանային վարչութեան հրաւէրով կ՚այցելէր Յունահայ գաղութին: Յարգելի հիւրին ընդունեց Յունաստանի Հայոց թեմի Առաջնորդ. Գեղամ արք. Խաչերեան, Ազգային վարչութեան ատենապետ Պօղոս Չոլաքեան: Ներկայ էին Հայ Կապոյտ Խաչի Շրջանային վարչութեան ատենապետուհի ընկ. Լիզէթ Շանկայեան-Քիրազեան եւ վարչութեան անդամուհիներ: Առաջնորդ Սրբազան հայրը մեծ ուրախութեամբ բարի գալուստ մաղթեց տիկին Թէոխարուսին, եւ իբրեւ Թեսաղոնիկէի նախկին հոգեւոր հովիւ, անգամ մը եւս հանդիպելու գոհունակութեամբ վկայակոչեց թանկագին յուշեր քսանութ տարիներ առաջ, երբ 1991ին տիկին Թէոխարուս «Բժիշկներ առանց սահման»ի կազմակերպութեան անդամի հանգամանքով Ղարաբաղի պատերազմի թէժ օրերուն աշխոյժ մասնակցութիւն բերած էր մէկէ աւելի անգամներ Թեսաղոնիկէի հայ համայնքի օժանդակութեամբ բժշկական օժանդակութիւններով Ղարաբաղ մեկնելու եւ պատերազմի բազմաթիւ վիրաւորներու վիրաբուժական գործողութիւններով կեանքեր փրկելու:
Ղարաբաղի պետական իշխանութիւններէն բազմիցս պարգեւատրուած Տիկին Թէոսխարուսին Առաջնորդ Սրբազանը հայրը երախտագիտական շնորհակալութիւններ յայտնեց հայ ժողովուրդին ցուցաբերած թանկագին աջակցութեան եւ նեցուկին համար: Իր կարգին տիկ. Թէոխարուս ուրախութիւնը յայտնեց անգամ մը եւս հանդիպելուն համար եւ Ղարաբաղի ժողովուրդին իր կատարած բազմաթիւ եւ կարեւոր օժանդակութեան շնորհակալութիւններուն շատ հակիրճ ձեւով պատասխանեց ըսելով, «Ինչ որ ըրած եմ ես աւելի ստացած եմ քան տուած»: Ազգային վարչութեան ատենապետ Պօղոս Չոլաքեան լայն գիծերու մէջ որոշ տեղեկութիւններ փոխանցեց յարգելի հիւրին Յունաստանի հայութեան եւ այգային իշխանութեան կառոյցին մասին:
