Յունաստանի մէջ Հ.Հ. արտակարգ եւ լիազօր դեսպան Տիգրան Մկրտչեան, 19 Յունուար 2022-ին, Յունաստանի Հանրապետութեան նախագահ Քաթերինա Սաքելարոփուլուին յանձնեց իր հաւատարմագրերը:
Պաշտօնական արարողութեան, որուն ներկայ էր նաեւ արտաքին գործոց նախարարի տեղակալ Միլթիատիս Վարվիցիոթիս եւ նախագահութեան ընդհ. քարտուղար Վասիլիոս Փափատոփուլոս, յաջորդեց հանդիպում, որու ընթացքին Յունաստանի նախագահը շնորհաւորեց եւ յաջողութիւն մաղթեց Հ.Հ. դեսպանին՝ վստահութիւն յայտնելով, որ իր ջանքերը սպաս պիտի դնէ երկկողմանի յարաբերութիւններու առաւել զարգացման գործին:
Ընդգծելով Հայաստանի եւ Յունաստանի աւանդական բարեկամական յարաբերութիւններն ու պատմականօրէն ձեւաւորուած սերտ կապերը՝ դեսպան Տիգրան Մկրտչեան նշեց, որ երկու երկիրները իրենց միջեւ գործակցութիւնը առաւել խորացնելու մեծ ներուժ ունին եւ յոյս յայտնեց, որ իր գործունէութեան ընթացքին հայ-յունական գործակցութեան օրակարգը աւելի պիտի ընդլայնուի` նպաստելով երկու եղբայրական ժողովուրդներու եւ երկիրներու յարաբերութիւններու առաւել ամրապնդման: Դեսպանը ընդգծած է, որ հայ-յունական յարաբերութիւնները հիմնուած են ընդհանուր արժէքներու, սկզբունքներու եւ եղբայրական կապերու վրայ, որոնք վեր են բոլոր տեսակի այլ շփումներէն։ Միաժամանակ, դեսպանը նշած է, որ իր գործունէութեան առանցքը պիտի կազմէ ոչ միայն քաղաքական եւ տնտեսական յարաբերութիւններու խորացումը, այլ նաեւ մշակութային եւ գիտակրթական ոլորտներուն մէջ գոյութիւն ունեցող մեծ ներուժի կիրարկումը։
Զրուցակիցները միտքեր փոխանակած են գործակցութեան շուրջ նաեւ միջազգային կազմակերպութիւններու շրջագիծէն ներս:
Նախագահ Քաթերինա Սաքելարոփուլու յաջողութիւններ մաղթած է դեսպան Մկրտչեանին Յունաստանի մէջ դիւանագիտական առաքելութեան մեկնարկին առիթով եւ իր աջակցութիւնը արտայայտած է այդ առաքելութեան: Յոյն նախագահը նաեւ շնորհաւորած է 20 Յունուարին լրացող Հայաստանի եւ Յունաստանի միջեւ դիւանագիտական յարաբերութիւններու հաստատման 30-ամեակը։
