Յիսուս Քրիստոսի տաճար ընծայման տօնին՝ Տեառնընդառաջի առթիւ, Կիրակի, 13 Փետրուար 2022-ի երեկոյեան ժամը 6:00-ին, Գոքինիոյ «Ս. Յակոբ» եկեղեցւոյ մէջ կատարուեցաւ Տեառնընդառաջի նախատօնակի արարողութիւնը, նախագահութեամբ Յունաստանի հայոց թեմի առաջնորդ Գերշ. Տ. Գեղամ Ս. Արք. Խաչերեանի։ Արարողութեան մասնակից դարձան Աթէնքի եւ Նէոս Գոզմոսի հոգեւոր հովիւներ՝ արժ. Տ. Հրայր Աւ. քհնյ. Նիկոլեան եւ արժ. Տ. Նարեկ քհնյ. Շահինեան:
Ներկայ էին Ազգային վարչութեան ատենապետ պրն. Թագւոր Յովակիմեան, շրջանի կառոյցներու անդամներ, ազգ. վարժարաններու տնօրէնուհիներ եւ ուսուցչուհիներ, գնահատելի թիւով աշակերտներ ու ծնողներ եւ հաւատացեալներ։
Գերշ. Տ. Գեղամ Ս. Արք. Խաչերեան փոխանցեց յաւուր պատշաճի քարոզը։ Ան սկիզբը մանուկ Յիսուսի տաճար ընծայման աւետարանական դրուագը կատարեց, ապա անոր ընդմէջէն երկու կարեւոր կէտերու անդրադարձաւ։ Առաջինը ծնողներու պարտաճանաչութիւնն է։ Յովսէփ եւ Մարիամ, յարգելով Հին կտակարանի մովսիսական օրէնքը, իրենց անդրանիկ մանչ զաւակը Յիսուս նուիրեցին տաճար։ Ծնողական պարտաճանաչութիւնը շատ հիմնական է փոքրիկին եւ ընտանիք կոչուած կառոյցին համար։ Փոքրիկի մը ֆիզիքական խնամատարութիւնը, դաստիարակութիւնը եւ կրթութիւնը չափազանց կարեւոր է։ Եւ ոեւէ մէկ ծնողական թերացում, իր ժխտական ազդեցութիւնն ու արդիւնքը կ’ունենայ փոքրիկին վրայ։
Եւ երկրորդ, փոքրիկի մը դաստիարակութեան եւ հոգատարութեան պատասխանատուութեան մէջ, ծնողքը ինք պէտք է ըլլայ մեծագոյն օրինակը։ Հայ ծնողքը հրաւիրուած է յատուկ առաքելութեան։ Մեր հայրենիքէն հեռու, ֆիզիքական հոգատարութեան կողքին ծնողքը պէտք է իր զաւկին տայ նաեւ հոգեւոր եւ ազգային դաստիարակութիւն։ Սոյն սրբազան նպատակին համար, մեր ժողովուրդը հայրենիքէն դուրս եկեղեցի, դպրոց եւ միութիւններ կառուցեց։ Ուստի հայ ծնողքը իր զաւկին ինքնութիւնը պահպանելու մարտահրաւէրին դիմաց, պէտք է զինք ներշնչէ ու մղէ դէպի ազգային կառոյցներ, որոնք հաստատուած են մեր ընտանիքներուն կողքին ըլլալու եւ ծնողներուն օժանդակելու նոր սերունդի դաստիարակութեան սերնդակերտ պատասխանատուութեան։
Քարոզի վերջաւորութեան, առաջնորդ Սրբազան Հայրը եկեղեցւոյ սուրբ խորանէն վառելով մոմը բերաւ ներկայ հաւատացեալներուն որպէսզի իրենց մոմերը վառելով, տանին եւ իրենց օճախները լուսաւորեն Քրիստոսի լոյսով։
Բացատրութիւն տալով Տեառնընդառաջի տօնին խարոյկ վառելու մասին, առաջնորդ Սրբազան Հայրը նշեց, որ մեր նախնեաց նախաքրիստոնէական հաւատալիքներուն հետ կապուած կրակի եւ լոյսի պաշտամունքը, հայ եկեղեցին փոխակերպեց աստուածային լոյսին՝ Քրիստոսի։ Իսկ խարոյկ վառելու աւանդութիւնը չխափանեց, որպէսզի հայ ժողովուրդը շարունակէ կապուած մնալ նախահայրերու պատմութեան խոր անցեալէն եկած դարաւոր արմատներուն եւ պատկանելիութեան։
Բարեպաշտական աւանդութեամբ լեցուն տօն ըլլալով Տեառնընդառաջը, առաջնորդ Սրբազան Հայրը, նաեւ ծնողներուն յորդորեց պահել ազգային եւ ժողովրդական աւանդութիւնները, որոնք ոչ թէ հին անցեալի յուշեր են, այլ մեր առօրեային կապուած ապրող աւանդութիւններ են։ Հետեւաբար, թելադրեց ծնողներուն որ չմոռնան ու պահեն Տեառնընդառաջի տօնին իրենց նորածին եւ փոքր մանուկները խորանին ընծայելու աւանդութիւնը եւ հրաւիրեց ծնողները մօտեցնելու իրենց զաւակները սուրբ խորանին, որոնք քահանայ հայրերու առաջնորդութեամբ ընծայուեցան սուրբ խորանին։
Արարողութեան աւարտին, հայ ժողովուրդի գեղեցիկ աւանդութեան համաձայն, գերշ. Տ. Գեղամ Ս. Արք. Խաչերեան եկեղեցւոյ բակին մէջ վառեց խարոյկը, որուն շուրջ բոլորը միասին երգեցին ազգային երգեր, ինչպէս նաեւ «Մեր հայրենիք» եւ «Կիլիկիա» ոգերգները։
Ապա առաջնորդ Սրբազան Հօր բարեմաղթութեան խօսքերէն ու օրհնութենէն ետք, հաւատացեալները եւ նա մանաւանդ փոքրիկները սկսան ցատկիլ կրակին վրայէն։
Տեառնընդառաջի արարողութեան աւարտին, Գոքինիոյ «Ս. Յակոբ» եկեղեցւոյ Տիկնանց մարմինը, առաջնորդ Սրբազան Հօր, քահանայ հայրերուն եւ հիւրերուն կազմակերպեց հիւրասիրութիւն մը։
ԹՂԹԱԿԻՑ
