Հայութեան պայքարի ոգիի աշխուժացումը՝ հրամայական պահանջ է այսօր
ՅԱՅՏԱՐԱՐՈՒԹԻՒՆ
Հայրենակիցներ,
Հայ ժողովուրդին դէմ Թուրքիոյ կողմէ գործադրուած Ցեղասպանութեան 105ամեակն է այս տարի։
Հայ ժողովուրդի բնաջնջման եւ հայրենազրկման թրքական պետութեան ոճրային ծրագրի բոլոր հանգրուանները՝ կանխամտածուած, սերտուած ու մանրամասնօրէն մշակուած ու գործադրուած ծրագիր մըն էր, որ կը միտէր ոչնչացնել մեր ազգը։ Մարդկութեան դէմ գործուած 20րդ դարու առաջին ցեղասպանութիւնն էր, որուն հետեւանքները մեր ազգը կը կրէ մինչեւ այսօր։
Վերջնական մեր յաղթանակը՝ պատմական մեր իրաւունքներու տիրացումն է։ Գլխաւոր մարտահրաւէրները կը յամենան մեր առջեւ, այնքան ատեն որ Թուրքիա կ’ուրանայ իր յանցապարտութիւնը եւ կը փորձէ թափանցել միջազգային հանրութեան մէջ, գործածելով իր պետական-տնտեսական ու դիւանագիտական լայն միջոցները, հայ ժողովուրդի պահանջատիրութեան ձայնը լռեցնելու նպատակով։ Թուրքիոյ գործադրած ոճիրը կը շարունակէ մնալ անպատիժ եւ անհատոյց։
Հայ ժողովուրդի նորանոր սերունդները նուիրական կտակ մը ժառանգած են մեր ազգի նահատակներէն։ Մեր ազգի հերոսական վերապրումը եւ վերակազմակերպումը՝ հայկական ոգիի յարատեւ պայքարի պատգամն է որ կը պարունակէ։ Պայքարի այս ոգիի աշխուժացումը, հրամայական պահանջ է այսօր, հայրենիքի եւ սփիւռքի մէջ ապրող հայ երիտասարդութեան համար։
Յաղթանակներ ապահովելու ճանապարհը մեր բոլորի ուժերով կարելի է հարթել, որեւէ պայմաններու տակ։
Այս տարի պարտաւորուած ենք համակերպելու համաշխարհային մեկուսացման արգելքներու օրէնքներուն, որ երկրէն ներս կը տիրեն՝ COVID 19 համավարակի պատճառով ստեղծուած կացութեան կանխարգիլման համար։
Այս նպատակով, համացանցային յատուկ սփռում մը նախատեսուած է, քաղաքական տարեկան մեր ձեռնարկին եւ պահանջատիրական ցոյցին փոխարէն, որ պիտի հաղորդուի`
Ուրբաթ 24 Ապրիլ 2020ին, երեկոյեան ժամը 19։30ին,
«Ազատ Օր» օրաթերթի կայքէջէն www.azator.gr,
Youtubeի կայանէն (Azat Or) եւ Հայ դատի
յանձնախումբի Դիմատետրի էջէն Facebook
(Αρμενική Εθνική Επιτροπή Ελλάδος)
Հ.Յ.Դ. Յունաստանի Կեդրոնական կոմիտէ
