Հ.Կ.Խաչի «Ա. Եւ Զ. Ճէնազեան» միջնակարգի, Ֆիքսի «Լ. եւ Ս. Յակոբեան», Գոքինիոյ «Զաւարեան» ազգային վարժարաններու, ինչպէս նաեւ Հ.Բ.Ը.Մ.ի «Ա. Գալփաքեան» վարժարանի զանազան դասարաններու աշակերտները, իրենց ուսուցիչներու ընկերակցութեամբ՝ հերթաբար այցելեցին «Արմենիքա» պարբերաթերթի եւ Նէա Զմիռնիի քաղաքապետութեան մշակութային հաստատութեան կազմակերպութեամբ, Նէա Զմիռնիի արդի ցուցադրութեանց թանգարանին մէջ բացուած, պատմական-վաւերագրական լուսանկարներու ցուցահանդէսը: Աշակերտները մեծ հետաքրքրութեամբ դիտեցին նկարները, որոնց ընդմէջէն իրենց առջեւ ներկայացուեցաւ յունահայ գաղութի առաջին տարիներու պատմութիւնը, երբ հայ գաղթականները ապաստան գտան Յունաստան՝ 1922-1940 տարիներուն:
