Կիրակի, 4 Դեկտեմբեր 2022-ին, Գոմոթինիի «Ս. Գրիգոր Լուսաւորիչ» եկեղեցւոյ Թաղային խորհուրդի կազմակերպութեամբ նշուեցաւ Ս. Յակոբի տօնը։
Ուրբաթ, 2 Դեկտեմբերի առաւօտեան ժամը 8։30-ին, կատարուեցաւ աղօրհնէք եւ ոչխարներու զենում, ապա եկեղեցւոյ Տիկնանց միութեան հետ միասին Հ.Գ.Խաչի անդամները եւ հաւատացեալ տիկիններ սկսան պատրաստել մատաղը։
Շաբաթ, 3 Դեկտեմբերի երեկոյեան ժամը 6։00-ին կատարուեցաւ երեկոյեան ժամերգութիւն եւ նախատօնակ Ս. Յակոբ Մծբնացի Հայրապետի յիշատակին։
Կիրակի առաւօտեան ժամը 10։30-ին մատուցուեցաւ Սուրբ եւ անմահ պատարագ, որ մատուցեց Յունաստանի Թեմի Բարեջան առաջնորդ Գերշ. Տէր Գեղամ Ս. արք. Խաչերեան։ Խորանին վրայ սպասարկեց Առաջնորդական փոխանորդ Հոգշ. Տ. Յովհաննէս Ծ. վրդ. Սաղտըճեան, Պատարագի երգեցողութիւնը կատարեց եկեղեցւոյ դպրաց դասը ղեկավարութեամբ Տէր Դանիէլ քհնյ. Գալօղլեանի։
Պատարագին ներկայ գտնուեցան պետական մարմիններու ներկայացուցիչներ Ալեքսատուպոլսոյ, Քսանթիի, Գաւալայի եւ Տիտիմօթիքոյի Թաղային խորհուրդներու անդամներ, ինչպէս նաեւ մեծ թիւով հաւատացեալ ժողովուրդ։
Պատարագիչ Սրբազան հայրը իր քարոզին մէջ նախ անդրադարձաւ հայ ժողովուրդի նախալուսաւորիչներուն՝ Ս. Թադէոս ու Ս. Բարթողիմէոս առաքեալներուն, որոնք Քրիստոսի խօսքն ու հաւատքը բերին հայ ժողովուրդին։ Ապա Ս. Գրիգոր Լուսաւորիչ այդ հաւատքը պաշտօնականացուց 301 թուին։
«Մենք հաւատքի ժողովուրդ դարձանք, որովհետեւ ճանչցանք Աստուծոյ եւ մեր անձն ու կեանքի նպատակները վստահեցանք Անոր։ Իսկ սուրբերը՝ Աստուծոյ ու մեր միջեւ միջնորդներն են, որոնք կը բարեխօսեն Աստուծոյ մօտ մեր մասին։ Եւ մենք որպէս երախտագիտութիւն, յատուկ յիշատակութեամբ շնորհակալութիւն կը յայտնենք անոնց։ Սուրբի մը տօնը ուխտաւորութիւն է եւ ոչ միայն հանդիսութիւն։ Ուխտը միաժամանակ խոստում է, որ պէտք է յարգուի ամբողջութեամբ»։ Սրբազան հայրը հաստատեց, թէ Քրիստոնէութիւնը ապրելու ու յաւիտենական կեանքի կրօնք է։ Եւ հայ ժողովուրդը կը սիրէ ապրիլ, որովհետեւ կը հաւատայ Աստուծոյ եւ յաւիտենական կեանքին։ Ապա Սրբազան հայրը հրաւիրեց բոլորը հաւատքի զօրութեամբ նորոգելու իրենց ուխտը։
Պատարագի աւարտին պատարագիչ Սրբազան հայրը կատարեց Ջրօհրհնէք եւ Մատաղօրհնէք, որմէ ետք տեղի ունեցաւ հոգեհանգիստ՝ եկեղեցւոյ մէջ ծառայած հանգուցեալ կղերական դասու, դպիրներու, Թաղային խորհուրդի անդամներու եւ բարերարներու յիշատակին։
Աւարտին, դպրաց դասը թափօրով մը ուղղուեցաւ եկեղեցւոյ սրահ, ուր միասնաբար երգեց «Կիլիկիա», Հայաստանի եւ Յունաստանի ոգերգները ու ստացաւ Սրբազան հօր օրհնութիւնը։
Պատարագէն ետք ժամանեց Գոմոթինիի Փանտելէիմոն Մետրապոլիտը։ Ան համայնքին ազգային սրահին մէջ Առաջնորդ Սրբազան հօր շնորհաւորեց Ս. Յակոբի տօնին առթիւ, ինչպէս նաեւ հոգեւոր հովիւներուն ու Թաղային խորհուրդին մաղթեց յաջողութիւն։
Եկեղեցական արարողութենէն ետք, սրահին մէջ տեղի ունեցաւ Հայ Գթութեան Խաչի «Էրեբունի» մասնաճիւղի վարչութեան պազարը։
Կէսօրուան ժամը 2։30-ին տեղի ունեցաւ տօնի ճաշկերոյթը քաղաքի պանդոկի մը ճաշասրանին մէջ։ Սրբազան հայրը նախ օրհնեց սեղանը, ապա Յովհաննէս Ծ. վրդ. Սաղտըճեան խօսք առնելով՝ յանուն Գոմոթինիի Թաղային Խորհուրդին բարի գալուստ մաղթեց ներկաներուն եւ անդրադարձաւ հայ եկեղեցւոյ աւանդութեանց ու սովորութեանց, որոնք կարեւոր մէկ մասնիկն են հայ ժողովուրդի գոյութեան ու գոյատեւման։
Ճաշկերոյթի ընթացքին, հայկական միօրեայ վարժարանի աշակերտութիւնը, գլխաւորութեամբ ուսուցչուհի տիկ. Ռուզաննա Զոհրապեանի, ներկայացուց գեղարուեստական յայտագիր մը։ Մշակութային միութեան պարախումբը ներկայացուց հայկական պարեր։
Միութեան «Էրեբունի» երգչախումբը հանդէս եկաւ 3 երգերով ղեկավարութեամբ Դանիէլ քհնյ. Գալօղլեանի։
Տիկնանց միութիւնը պատրաստած էր շատ գեղեցիկ տօնական զարդարանքներ, որուն հասոյթը պիտի յատկացուէր կարիքաւոր երեխաներուն։
Յայտագիրի աւարտին Սրբազան հայրը իր խօսքին մէջ նշեց հայերէն լեզուի կարեւորութիւնը եւ երեխաներու դպրոց յաճախելու եւ մեր ապագայ սերունդի դաստիարակելու մասին՝ եկեղեցւոյ, միօրեայ վարժարանի եւ մշակութային միութեան ճամբով։
ԹՂԹԱԿԻՑ
