Անցնող շաբաթավերջին, Գոմոթիննի Ս. Գրիգոր Լուսաւորիչ եկեղեցւոյ մէջ նշուեցաւ Ս. Յակոբի անուանակոչութիւնը: Արդարեւ, Ուրբաթ, 8 Դեկտեմբերի առաւօտեան ժամերգութեան յաջորդեց աղօրհնէք եւ ոչխարներու զենում, որոնցմէ ետք մատաղի պատրաստութիւն՝ մինչեւ երեկոյեան ուշ ժամերը: Յաջորդ օրը, Շաբաթ երեկոյեան, ժամը 7:30-ին, եկեղեցւոյ մէջ տեղի ունեցաւ ժամերգութիւն, նախագահութեամբ Յունաստանի թեմի առաջնորդ Գերշ. Տ. Գեղամ Արք. Խաչերեանի: Աւարտին սրտի խօսք արտասանեց Սրբազան հայրը: Ան նկատել տուաւ, որ կը տօնենք սուրբի մը տօնը ո՛չ միայն անոր կենսագրութիւնը սորվելու, այլ նաեւ ծանօթանալու անոր գործերուն եւ ապրելու անոր օրինակով: «Ապրինք Ս. Յակոբի օրինակով եւ ըլլանք հաւատքի մարդ, կամքի տէր մարդ», Սրբազան հայրը շեշտեց` աւելցնելով, որ հետաքրքրութեան աշխարհը փոխուած է մեր ժողովուրդի կեանքին մէջ, եւ մեր ժողովուրդը նահանջի մէջ է, սակայն մենք կը փորձենք միացնել մեր ազգային, հոգեւոր ու մշակութային ժառանգութիւնը: Աւարտին Տ. Յովհաննէս Ծ. Վրդ. Սաղտըճեան եկեղեցւոյ ընտանիքին անունով շնորհակալութիւն յայտնեց Սրբազան հօր եւ մեծապէս գնահատեց դպրաց դասի անդամներուն կատարումը:
Շաբաթ երեկոյեան ժամը 8:30-ին ուխտաւոր հաւատացեալ ժողովուրդը Գոմոթինիի սրահին մէջ մասնակցեցաւ սիրոյ սեղանին, հիւրընկալութեամբ Գոմոթինիի թաղականութան։ Կիրակի, 10 Դեկտեմբերի առաւօտեան ժամը 10:30-ին, Գոմոթինիի Ս. Գրիգոր Լուսաւորիչ եկեղեցւոյ մէջ տեղի ունեցաւ Ս. եւ անմահ պատարագ՝ նախագահութեամբ Յունաստանի հայոց թեմի բարեջան առաջնորդ Գերշ. Տ. Գեղամ արք. Խաչերեանի, առընթերակայութեամբ Յունաստանի թեմի առաջնորդական փոխանորդ Յովհաննէս Ծ. վրդ. Սաղտըճեանի եւ Թեսաղոնիկէիի հոգեւոր հովիւ Եղեա աբղ. Մալխասեանի։ Ներկայ էին շրջանի պետական մարմինները, թաղային խորհուրդի անդամները եւ շրջանի հաւատացեալ ժողովուրդը։ Ներկայ ժողովուրդին ուղղուած իր քարոզին մէջ, Առաջնորդ Սրբազան հայրը ըսաւ, որ դարեր շարունակ մեր ժողովուրդը երկիւղածութեամբ նշած է Ս. Յակոբ Մծբնայ հայրապետին տօնը` աւելցնելով, որ թէկուզ պատմութեան մէջ յստակ չէ անոր ծագումը, սակայն մեր ժողովուրդը 4-րդ դարէն մինչեւ այսօր զինք կը դաւանի որպէս հայ եւ որպէս յաղթող ու քաջ սուրբ մը: Սրբազանը դիտել տուաւ, թէ մեր ժողովուրդը համոզուած է, որ իր պաշտած սուրբը անկասկած իրեն համար Աստուծոյ մօտ բարեխօս կը մնայ` անոր փոխանցելով իր իղձերն ու բաղձանքները:
«Ս. Յակոբ եկեղեցւոյ անուանակոչութեան առիթով, Ս. Յակոբը յիշելով մենք ալ մեր սրտին իղձերը իրեն կ՚ուղղենք` խնդրելով, որ մեզի համար ինք բարեխօս ըլլայ Աստուծոյ մօտ եւ կեանքի պատահարներուն դիմաց իր օրինակով մենք ալ ջանանք ըլլալ յաղթող», շեշտեց Առաջնորդ Սրբազանը: Շարունակելով իր խօսքը, ան նկատել տուաւ, որ մեր կեանքին մէջ բազմաթիւ աւանդութիւններ եւ աւանդներ հաստատուած են նախորդ սերունդներուն կողմէ եւ հարց տուաւ, թէ արդեօք մերօրեայ կեանքին մէջ զանոնք ո՛րքանով պահած ենք եւ անոնք ո՛րքանով կ՚առնչուին մեր կեանքին, այդ բոլորով ինչպէ՛ս կը փորձենք զօրանալ, սրբութիւն բերել մեր կեանքին համար, յաղթանակ տանիլ բոլոր այն երեւոյթներուն դէմ, որոնք անդադար կը ձգտին աղաւաղել քրիստոնէական եւ ազգային մեր նկարագիրը: Սրբազան Հայրը կոչ ուղղեց` այդ նուիրական աւանդները պահելու եւ զանոնք անաղարտօրէն փոխանցելու սերունդէ սերունդ: Անդրադառնալով Ս. Յակոբին կեանքին, Սրբազան հայրը յայտնեց, որ մեր ժողովուրդը զինք կը յիշէ իբրեւ այն անձնաւորութիւնը, որ ժողովուրդին մօտ հաւատք ամրացնելու համար յառաջացած տարիքին առանձինն փորձեց բարձրանալ Արարատ լերան գագաթը եւ Նոյեան տապանէն մասնիկ մը բերել եւ զայն ժողովուրդին ներկայացնել որպէս հաւատքի փաստ: Եզրափակելով իր խօսքը` Առաջնորդ Սրբազան հայրը յորդորեց սրբութեամբ վարել մեր կեանքը, որպէսզի հարազատօրէն կարենանք տեսնել այն հորիզոնը, ուր պարտինք հասնիլ իբրեւ ժողովուրդի մը զաւակներ, որ տակաւին անկատար իղձեր եւ իտէալներ ունի: Ան նշեց, որ մեր զօրութիւնն ու մեծութիւնը կը կայանան մեր իսկութեան մէջ, հարազատօրէն ապրելով մեր հաւատքը, մեր ազգային գիտակցութեամբ եւ սուրբերուն առաջնորդութեամբ: Պատարագի աւարտին կատարուեցաւ մատաղօրհնէք եւ ջրօրհնէք:
Այնուհետեւ «Փոսիտոնիօ» ճաշարանին մէջ մատուցուեցաւ սիրոյ սեղան` նախագահութեամբ Սրբազան հօր եւ ներկայութեամբ յոյն պետական անձնաւորութիւններու, Թրակոյ շրջանի ժողովուրդին, Թեսաղոնիկէի ուխտաւորներուն եւ Գոմոթինիի հաւատացեալ ժողովուրդին: Եկեղեցւոյ թաղականութեան ատենապետ պր. Ստեփան Մատթէոսեան ներկաներուն բարի գալուստ մաղթեց։ Ան նաեւ շնորհակալական խօսք ուղղեց բոլոր անոնց, որոնք սատարեցին տօնախմբութեան առիթով տարուած աշխատանքներուն: Ս. Գրիգոր Լուսաւորիչ եկեղեցւոյ հովիւ Տ. Յովհաննէս Ծ. վրդ. Սաղտըճեան բացատրեց մէկտեղումին նպատակը, որն է` տէր դառնալ մեր նախնիներուն կտակած ժառանգին, վերանորոգել մեր ուխտը` եկեղեցւոյ ծառայելու, նաեւ` մեր ազգի յաւերժական գոյութեան եւ լինելութեան համար: Գոմոթինիի միօրեայ վարժարանի աշակերտութիւնը, տիկին Ռուզաննա Զօհրապեանի ղեկավարութեամբ, ներկայացուց փունջ մը հայրենասիրական բանաստեղծութիւններ եւ մշակութային միութեան երիտասարդները հանդէս եկան ազգային պարերով։ Գոմոթինիի Ս. Գրիգոր Լուսաւորիչ եկեղեցւոյ դպրաց դասը, ղեկավարութեամբ` Տ.Դանիէլ քհնյ. Գալողլեանի ներկայացուց հոգեւոր եւ ազգային երգեր: Յաջորդաբար, երկար տարիներ եկեղեցւոյ թաղականութեան անդամ եւ Գոմոթինի մշակութային միութեան ատենապետ տիար Պետրոս Մելքոնեան պատուոյ գիր ստացաւ եկեղեցւոյ թաղականութեան կողմէ՝ առ ի երախտագիտութիւն իր կատարած եկեղեցական-ազգային եւ մշակութային քառասնամեայ գործունէութեան։ Սիրոյ սեղանին եզրափակիչ խօսքը արտասանեց Առաջնորդ Սրբազան հայրը, որ գոհունակութիւն յայտնեց այն մասին, թէ մեր ժողովուրդին զաւակներուն մէջ տակաւին հաւատքը կ՚ապրի, եւ այդ հաւատքին շնորհիւ մեր եկեղեցիներուն եւ մեր կառոյցներուն մէջ անհատներ կամաւորաբար կը գործեն, որպէսզի մենք մեր նկարագիրով շարունակենք մեր կեանքին ընթացքը: Ան գնահատեց եկեղեցւոյ մեծ ընտանիքին տարած աշխատանքը` եկեղեցւոյ պայծառութեան համար:
Նշենք, որ ճաշկերոյթի ընթացքին Գոմոթինիի միօրեայ վարժարանի աշակերտները, ինչպէս նաեւ Մշակութային միութեան պարախումբերու անդամները իրենց երախտագիտութիւնը յայտնեցին պարուսոյց տիկ. Ռուզանա Զոհրապեանին, իրեն նուիրելով փունջ մը ծաղիկ եւ շնորհակալական գիր։
Տօնախմբութեան առիթով, Հայ Գթութեան Խաչի Գոմոթինիի մասնաճիւղի վարչութիւնը կազմակերպեց հայկական ճաշերու եւ իրերու պազար, որուն ընդառաջեց շրջանի ժողովուրդը եւ գնահատեց խաչուհիներու ժրաջան աշխատանքը։
ԹՂԹԱԿԻՑ
