Նէա Զմիռնիի քաղաքապետութեան «Գարուն 2019» երաժշտագեղարուեստական համերգներու հանգոյցի (ցուցադրութիւն, գիրքի ներկայացում, դասախօսութիւններ, համերգներ, թատերական ներկայացումներ, շարժապատկեր եւայլն) ծիրէն ներս, քաղաքապետ Սթաւրօ Ծուլաքիսի եւ քաղաքապետութեան մշակութային հարցերու պատասխանատու փոխ-քաղաքապետ Վակելի Խաչատուրեանի նախաձեռնութեամբ, Չորեքշաբթի՝ 27 Մարտ 2019ի երեկոյեան ժամը 8ին, քաղաքապետական մշակութային կեդրոն «Ղալաքսիաս» սրահին մէջ, տեղի ունեցաւ յունահայ երաժիշտ-յօրինող-նուագող ու երգիչ Ստեփան Թեքիրեանի մօտ երկուքուկէս ժամ անընդհատ տեւողութեամբ համերգը՝ իր նուագախումբին մասնակցութեամբ (երգ՝ Վասիա Զիլու եւ Էլսա Աֆէնտաքի, ջութակ՝ Օտիսէաս Զաֆիրոփուլոս, կիթառ՝ Սփիլիոս Զեֆքելիս, քոնթրա պասօ Աքիս Փեթրինիոթիս եւ դաշնակի, կիթառի ու երգի վրայ Ստեփան Թեքիրեան):
Հարուստ ու փառասէր յայտագիր, որակաւոր մեկնաբանութիւններ, սքանչելի ձայներ ու արհեստավարժ նուագողներ, որոնք իրենց երգերով, նուագներով ու երաժշտութեամբ խանդավառ ու լարուած մթնոլորտի մէջ պահեցին սրահը բերնէ-բերան լեցուած յոյն եւ մասամբ հայ գեղարուեստասէր հասարակութիւնը, որ յաճախակիօրէն իր ձայնը միացուց երգիչներուն, իրենց հետ երգելով, զգայնութեամբ հրամցուած ընդհանրապէս ծանօթ ու համբաւի տիրացած երգերն ու մեղեդիները:
«Ղալաքսիաս» մշակութային կեդրոնի բազմատեսակ ելոյթները առաջին անգամ նախաձեռնուեցան ճիշդ տասնամեակ մը առաջ եւ, ըստ քաղաքապետական տուեալներուն, մինչեւ այսօր ատոնց շարքին մասնակցութիւն բերած են աւելի քան 300.000 հանդիսատեսներ:
Մեր սիրելի յունահայ արուեստագէտ Ստեփան Թեքիրեանը, ի շարս իր գեղարուեստական այլազան ու բազմապիսի երաժշտական համերգներուն, տարին քանի մը անգամ կը հրաւիրուի «Ղալաքսիաս»՝ իրեն ելոյթներուն հետեւող եւ զինք հաւատարմօրէն սիրող գեղարուեստասէր հասարակութեան ճաշակը գոհացնող երաժշտական բազմազան սեռերու՝ ժողովրդականօրէն հաղորդակցական, անկեղծ, գունաւորուած, հիւմուրով եւ բծախնդրութեամբ պատրաստուած յայտագիրով:
Ստեփան Թեքիրեանի համերգները լոկ միաձեւ ու միակտուր ելոյթներ չեն, այլ համեմուած են բազմալեզու ու տարբեր երանգաւորումներ գոհացնող լայնածիր միջավայր ու մթնոլորտ ստեղծելու զգուշաւոր ընտրանքով: Յունարէն, անգլերէն, ֆրանսերէն, սպաներէն, փորթուկալերէն, իտալերէն, ռուսերէն, թրքերէն եւ անշուշտ հայերէն կարօտի երգեր, որոնց շարքին Խաչատուր Աւետիսեանի «Բալէնի»ն, «Պինկէօլ»ը, եւայլն: Երգեր՝ Եւրոպայէն, Միջերկրականէն, Ատլանտեանէն անդին, Լատին Ամերիկա, Պրազիլ, Քուպա՝ իր բազմագոյն երաժշտական երանգաւորումներով (Քոմանտանթէ Չէ Կէվարա, Նինօ Ռոթա, Լէոնարտ Քոհէն, Ֆրանք Սինաթրա, Շարլ Ազնաւուր, Մանօ Խածիտաքիս, Քաթ Սթիվէնս եւայլն):
Իւրաքանչիւր արուեստագէտ կը յատկանշուի իր ընտրանքներով եւ ինք այդ ընտրանքներու անհատականութիւնը եւ ինքնավստահութիւնը բնորոշող արտայայտիչն է: Արուեստագէտին ձայնը պէտք է տեւաբար լսուի, որպէսզի ան երաժշտական բնագաւառի ճամբով կարենայ հին թէ նոր այժմէական պատգամներ փոխանցել մարդութիւնը բարելաւող ու մէկ քայլ առաջ տանող տեսլականներու հարազատ ընկալումով:
Համերգները՝ բացի վայելքի ու յարգանքի իրենց մատուցած պատգամներէն, մշակոյթի դաստիարակութեան ու վերապատրաստման միջավայր կը զարգացնեն ե՛ւ փոխանցողին, ե՛ւ ընկալողին համար: Այս համերգին միջավայրը ա՛յդ կը թելադրէր եւ ներկաներուն դէմքերը դիտելով, կարծեմ դրական ու շնորհակալ այդ արտայայտութիւնը կը տիրէր բոլոր ցոլացող արտայայտութեան պատկերին վրայ:
Հասարակութիւնները առանց յարաբերական մշակոյթի չեն կրնար ապրիլ ու գոյատեւել: Համոզուինք, որ մշակոյթը կ՚ամոքէ տառապած մարդոց վիշտը, գէթ այդ է իր հաղորդական դիտաւորութիւնն ու ցանկութիւնը:
Շնորհակալ ենք, Ստեփա՛ն, այս իսկապէս սքանչելի երաժշտական ճամբորդութեան համար: Մենք այսպէս որակաւոր կրկնութիւններէ չենք վախնար: Ընդհակառա՜կը, արուեստի ճանապարհը վերջ չունի եւ պաշտպանուած է քաղաքակրթութեան պատմուճանով:
Թո՛ղ քու կեանքդ նոյնացած ըլլայ քու երաժշտական առօրեայիդ, քու առօրեադ ալ քու երաժշտական կեանքիդ հետ՝ քեզի, մեզի, բոլորի՛ս համար:
Յ. Պ.
