Կիրակի՝ 24 Փետրուար 2019ի առաւօտեան ժամը 10։30ին, Թեսաղոնիկէի «Ս. Աստուածածին» եկեղեցւոյ մէջ մատուցուեցաւ Ս. եւ Անմահ Պատարագ։ Ս. եւ Անմահ Պատարագը մատուցեց եւ յաւուր պատշաճի քարոզեց շրջանի հոգեւոր հովիւ Ստեփանոս Վրդ. Փաշայեան։ Հայր Սուրբը՝ Ճաշու աւետարանական հատուածը բացատրելէ ետք, անդրադարձաւ Սումկայիթի զոհերուն եւ, իր խօսքը ուղղելով մեր ժողովուրդի երիտասարդ սերունդին, ըսաւ.- «Միշտ վառ պահեցէք մեր անմեղ զոհերուն յիշատակը, գէթ խունկ ու աղօթք մատուցէք անոնց մատղաշ հասակին, ու մանաւանդ՝ պատրաստ եղէք ամէն պարագայի մեր հայրենիքի պաշտպանութեան։ Այսօր ֆիզիքապէս չկան այդ անմեղ զոհերը, սակայն մեր հոգիներուն մէջ միշտ ներկայութի՛ւն են եւ, աւելի՛ն, կան անոնց յաջորդները. շարունակեցէք ձեր պայքարը յանուն արդարութեան ու ազգի գոյատեւման, միշտ եկեղեցւոյ հովանիին ներքոյ»։ Պատարագի աւարտին, կազմակերպութեամբ՝ Հ.Յ.Դ. Թեսաղոնիկէի «Ս. Թեհլիրեան» Երիտասարդական Միութեան, եկեղեցւոյ մէջ տեղի ունեցաւ գեղարուեստական ձեռնարկ, նուիրուած Սումկայիթի զոհերու յիշատակին։ Օրուան բացման խօսքը կատարեց Հայր Սուրբը, որ նշեց օրուան յիշատակի ձեռնարկին կարեւորութիւնն ու անհրաժեշտութիւնը։
Ապա, հրաւիրուեցաւ Հ.Յ.Դ. Յունաստանի Կեդրոնական Կոմիտէի շրջանի մօտ ներկայացուցիչ պրն. Կարօ Նատեան, որ փոխանցեց Կեդրոնական Կոմիտէի սրտի խօսքը՝ նուիրուած Սումկայիթի կոտորածին։ Ապա, օրուան բանախօս Հ.Յ.Դ. Թեսաղոնիկէի «Յ. Գասապեան» Կոմիտէի ատենադպիր Յովիկ Գասապեան մանրամասնօրէն ներկայացուց Սումկայիթի պատմականը՝ բոլորիս տանելով 31 տարիներ առաջ տեղի ունեցած այդ ահաւոր ու դատապարտելի կոտորածին ու տեղահանութեան՝ ատրպէյճանական իշխանութիւններու կողմէ իրականացուած՝ ընդդէմ հայ բնակչութեան, որուն մէջ կային մեծաւ մասամբ երեխաներ, կիներ եւ ծերեր։ Ձեռնարկը իր աւարտին հասաւ գաղութի երիտասարդուհիներէն տիկ. Աստղիկ Գանապետեանի կողմէ արտասանուած Դանիէլ Վարուժանի «Ջարդը» ոտանաւորով։
