7 Օգոստոս 2019ի լուսաբաց, Երեւանի ժամով առաւօտեան ժամը 3:00ին, Aegean ընկերութեան օթանաւը վայրէջք կատարեց Երեւանի «Զուարթնոց» օթակայանը։ Ուղեւորներուն թիւին 19ը Հ. Յ. Դ. Յունաստանի Երիտասարդական միութեան անդամներէն խումբ մըն էր, որոնք 12 օրուայ պտոյտ մը կազմակերպած էին «Դէպի հայրենիք»։ Երեք օր վերջ, Օգոստոս 10ին խումբին միացան 7 ընկերներ եւս, թիւը բարձրացնելով 26ի։
Պտոյտին առաջին հանգրուանը Օգոստոս 7-10ը՝ Արցախն էր։ Ուրեմն, 19 ընկեր-ընկերուհիները «փուլման» ինքնաշարժով մը ուղղուեցան դէպի Արցախ։ Առաջին կայանը Սիւնիքի, Գորիս քաղաքն էր։ Կէսօրուայ ժամերուն հասանք «Եղեւնադ» հիւրանոցը, որ նախապէս ապահովուած էր, տեղաւորուեցանք, ճաշեցինք, հանգչեցանք։ Մեր առաջին այցելութիւնը եղաւ Տաթեւի վանք։ Բոլորս միասին բարձրացանք «Տաթեւի թեւերը» կոչուած «թելեֆերիքը»։ Մեր հետ բերինք Սիւնեաց բնութեան կանաչ գեղեցկութիւնը եւ անշուշտ վանքին դարաւոր կանգուն արժէքը։ Երեկոյեան, պտտեցանք Գորիս գիւղաքաղաքը, անուշիկ բնութիւն ունէր եւ հանդարտութիւն մը կը զգացուէր։ Եղանակը ամառ ըլլալով հանդերձ, բաւական զովուկ էր։
Առտուն մեծ խանդաւարութեամբ, մեր ճամբան շարունակեցինք դէպի Արցախ։ Հասանք Ստեփանակերտ, կէսօր էր։ Ինքնաշարժէն իջած ժամանակ, հանդիպեցանք տարեց կնոջ մը իր թոռնուհիին հետ։ Կինը մեծ ուրախութեամբ մեզ դիմաւորեց, հարց ու փորձ ըրաւ եւ երբ հայերէն պատասխանեցինք մեծ գոհունակութեամբ մեզ գրկեց։
Մեզմէ շատերուն համար առաջին անգամը չէր որ Արցախ կ՚ այցելէինք։ Ստեփանակերտը փոխուած էր դէպի լաւ, կեանքը բնականոն ընթացք ունէր, նոր խանութներ բացուած էին՝ գրենական պտոյքներու, հագուստներու, երեխաներու հագուստներու, եւայլն։ Մեր հիւրանոցին դիմացի նորակարոյց եկեղեցիին մէջ պսակադրութեան արարողութիւն մըն ալ տեղի կ՚ ունենար։ Ուրախ եւ հաճելի անակնկալ մըն էր մեզի համար։
Արցախ մեր կեցութեան օրերուն, զանազան այցելութիւններ ունեցանք, որոնք կազմահերպուած էին մեր Կեդրոնական վարչութեան ընկերներուն կողմէն։ Գացինք Շուշի, Ղազանչեցոց եկեղեցին, Ճտրտուզ, «Մամիկ եւ Պապիկ»ի յուշահամալիրը, Արցախի հանրապետութեան խորհրդարանը, Հ. Յ. Դ. Արցախի Երիտասարդական միութեան գրասենեակը, ուր հանդիպեցանք Մայիսին Աթէնքի մէջ տեղի ունեցած խորհրդաժողովին առիթով ծանօթացած ընկերներու։ Վերադարձի ճամբուն, Հ. Յ. Դ. Ֆրանսայի Երիտասարդականի միութեան ընկերներուն հետ հասանք, մինչեւ Հունոտ ձորի մէջ գտնուող «Զոնտիկ» (հովանոց) ջրուէժները։ Աւելցնենք, որ Երեւան վերադարձանք Վարդենիսի ճամբով եւ կրցանք Թադիվանք ալ մտնել։
Օգոստոս10ի երեկոյեան Երեւան հասանք, ուր մեր եօթը ընկերները, նոյն օրը Աթէնքէն ժամանած մեզի կը սպասէին։ Յաջորդող օրերուն 26 ընկեր-ընկերուհիներով պտտեցանք մեր հայրենիքի պատմական արժէք ներկայացնող հնութիւնները, եկեղեցիները, վանքերը, դիտեցինք եւ սորվեցանք մեր մշակոյթին մաս կազմող արհեստներ եւ արուեստներ եւ վայելեցինք մեր հայրենի բնութեան գեղեցկութիւնը իր լեռներով, անտառներով, լիճերով եւ գետերով։ Այս պտոյտներուն մէջ չմոռցանք այցելել Հ. Յ. Դ. Հայաստանի Երիտասարդական միութեան Երեւանի գրասենեակը։
Հայրենիքին մէջ նաեւ ապրեցանք Արցախեան եւ Երեւանեան գիշերները։ Թէեւ ամառ էր եւ սփիւրքահայերով լեցուն էր մեր հայրենիքը, քանի որ նոյն օրերուն Համահայկական խաղերն ալ կ՚ ընթանային, նկատեցինք որ մեր տարեկից հայրենաբնակ երիտասարդները եւ մենք նոյն ձեւով կը զուարճանանք։
***
Այս ամփոփ նկարագրանին մէջէն, կ՚ուզենք աւելցնել որ «Դէպի հայրենիք» այս պտոյտի ընթացքին, մեր 26 հոգինոց խումբի ընկերները կրցան սերտացնել իրենց միջեւ կապերը, իւրաքանչիւրս իր ձեւով կապուեցաւ Հայրենիքին եւ մեզմէ շատերուն մէջ արթնցաւ Հայրենիք վերադառնալու եւ հոն հաստատուելու զքացումն ու երազանքը։ Մեր փափաքն է, որ այս երազանքը, օր մը, ոչ շատ ուշ, իրականանայ։ Մինչ նոր հանդիպում՝ սիրելի Հայրենիք…
Մասնակցող մը
