Կիրակի, 2 Յուլիս 2023-ին, առաւօտեան, Թեսաղոնիկէի Ս. Աստուածածին եկեղեցւոյ մէջ, շրջանիս հոգեւոր հովիւը մատուցեց Ս. եւ Անմահ Պատարագ, ներկայութեամբ՝ Մեծի Տանն Կիլիկիոյ կաթողիկոսութեան երէց միաբան հայրերէն՝ գերշ. Տ. Մուշեղ արք. Մարտիրոսեանին:
Պատարագին ընթացքին, Մեծի Տանն Կիլիկիոյ արժանընտիր գահակալ Ն.Ս.Օ.Տ.Տ. Արամ Ա. Վեհափառ Հայրապետին ընտրութեան եւ օծման 28-րդ ամեակին առիթով, տեղի ունեցաւ Հայրապետական մաղթանք, նախագահութեամբ Մուշեղ արք. Մարտիրոսեանին, մասնակցութեամբ Հայր սուրբին եւ սարկաւագներուն: Հայրապետական մաղթանքէն ետք, Սրբազան հայրը նախ փառք եւ գոհութիւն յայտնեց Աստուծոյ, որ տարիներ ետք առիթը ընծայեց իրեն՝ ներկայ գտնուելու Թեսաղոնիկէի Ս. Աստուածածին եկեղեցւոյ Ս. Խորանին վրայ եւ աղօթակից դառնալու Ս. Պատարագին:
Սրբազան Հայրը անդրադառնալով Հայրապետական մաղթանքին, ըսաւ. «28 տարի առաջ, Աստուծոյ օրհնութեամբ, Արամ Ա. Վեհափառ հայրապետը արժանացաւ կաթողիկոսութեան»: Ան հայրապետը նմանցուց մեր եկեղեցւոյ սուրբերուն, որոնք հսկայ ծառայութիւններ մատուցած են վասն մեր եկեղեցւոյ բարգաւաճման: Նշեց, թէ Հայրապետի 28 տարուան ընթացքին իրականացան բազմաթիւ ազգօգուտ ծրագիրներ. ան իր կեանքը ծառայութեամբ արժեւորեց, ինչ որ առիթ հանդիսացաւ Մեծի Տանն Կիլիկիոյ Ս. Աթոռին պայծառութեան, շքեղութեան, վերաշինութեան եւ գոյատեւման:
Սրբազան Հայրը իր աղօթքը բարձրացուց առ Աստուած՝ հայցելով, որ անսասան պահէ Մեծի Տանն Կիլիկիոյ կաթողիկոսութիւնն ու անոր արժանընտիր գահակալը:
Սրբազան Հօր խօսքէն ետք, Հայր սուրբը իր կարգին Թեսաղոնիկէի Ս. Աստուածածին եկեղեցւոյ համայնքին կողմէ շնորհաւորեց Ն.Ս.Օ.Տ.Տ. Արամ Ա. Վեհափառ հայրապետին ընտրութեան եւ օծման 28-րդ տարեդարձը, անոր մաղթելով արեւշատ օրեր, ինչպէս նաեւ երախտագիտութիւն յայտնեց, որ իբրեւ հոգեւոր առաջնորդ եւ առոյգ հովուապետ, մօտէն կը հետեւի իր հօտին բոլոր զաւակներուն կարիքներուն: Ապա շնորհակալութիւն յայտնեց Մուշեղ արք. Մարտիրոսեանին, որ ընդառաջեց Հայր սուրբի առաջարկին եւ մասնակից դարձաւ Ս. Պատարագին:
ԹՂԹԱԿԻՑ
