Մայիս 18-ին, Ֆիքսի «Արամ Մանուկեան» ակումբին մէջ, Համազգայինի «Արշաւիր Գազանճեան» թատերախումբի կողմէ տեղի ունեցաւ Հայկ Յակոբեանի «Չմօտենաք ինծի տիկին» թատերախաղի ներկայացումը. մէկ արարով կատակերգութիւն «wine bar theater» ոճով, այսինքն` գինիի ընկերակցութեամբ թատրոն։
Գարնանային երեկոյեան` բաւական թիւով թատերասէրներ ժամանեցին ակումբ, սպասելով ելոյթին։ Արդէն 8 տարի անցած էր վերջին թատերական ներկայացումէն։ Բացառելով թագավարակի պահը, թատերախումբը այս ժամանակի ընթացքին կը մնար գործօն. կը կատարուէին յատուկ դասեր արհեստավարժ յունահայ դերասաններու ղեկավարութեամբ։
Վերջերս, զուգահեռ, կ‘ընթանան հայրենասիրական «Զարթօնք» թատերախաղի փորձերը։ Այս գործերուն` զարմանալի է տաղանդաւոր դերակատարներու բացայայտումը և երիտասարդ անդամներու խանդավառ ներկայութիւնը։ Բարձրորակ բեմադրութիւն` ընկ. Յակոբ Պարսամեան, Համազգայինի փորձարու դերասան, որ իր առաջին գործը իբրեւ գլխաւոր բեմադրիչ լոյս տեսաւ այդ երեկոն։
Սրահին մէջ արդէն շարուած էին սեղանները, զարդարուած յատուկ ոճային մօմերով, որպէսզի ներկաները վայելեն իրենց խմիչքն ու թեթեւ խորտիկները։ Մուտքը` նոյնպէս խորհրդաւոր, սիրուած յունահայ երաժիշտ Լեֆթերիս Խավուցաս դաշնամուրի աքորտներու գեղեցիկ հայկական մեղետիներու ներքոյ։
Յաջորդաբար` Գայանէ Մալխասեանի նախապատրաստական զաւեշտալի խօսքը, որ մեզի կը փոխանցէր «տիկին Յասմիկին պատմած տարօրինակ ընտանեկան պատմութիւններ»։
Ապա` պահն էր յիշելու «ինչ եղած էր 8 տարի առաջ պարոն Վարդեվառեանի տունը»… Այսպէս` պաստառին վրայ ցուցադրուեցան դրուագներ «Մարդասպանութիւն մը» թատերախաղէն, որ ներկայացուած էր նոյն վայրին մէջ։ Գլխաւոր դերերը կը մարմնաւորէին Ժագ Տամատեան և Մարօ Մաթեան։ 8 տարի ետք, անգամ մը եւս պատրաստ էին դարձեալ հմայելու հասարակութեան, իրենց խաղարկութեամբ։
«Չմօտենաք ինծի տիկին» ժամանակակից փիեսը, կը կեդրոնանայ մարդկային հոգեբանութեան ու թաքնուած ցաւերուն, զաւեշտի մը միջոցաւ ներկայացնելով ծաղրանքի ու անձնաւորութեան նուաստացման հետեւանքները։ Տղամարդը, կանացի բժիշկ, չար կատակներու զոհ դարձած իր մթնոլորտի անձերէն, փորձելով փախչիլ իր ետեւէն վազող հիւանդապահուհիներէն կը մտնէ անծանօթ կնոջ մը տունը, որոշելով անձնասպան ըլլալ։ Ան` կարծելով որ «իր ամուսնու ազգականներէն մէկն է, որ սիրահարուեցաւ ու լքեց իր ընտանիքը», յարձակողական է իր հանդէպ։ Սակայն, ծանօթանալով զայն, «կը մեղքնայ, ո՛չ ո՛չ կը հիանայ իրմով» ու զանազան ձեւերով կը փորձէ փրկել։ Բժիշկը խոստովանելով իր թուլութիւնը կ‘անդրադառնայ` «տկարներն ալ ապրելու իրավունք չունի՞ն»։
Մինչ այդ «դեւեր» հիւանդապահուհիները, Լուիզա Պօղոսեան, Անայիս Բարսեղեան և Ժասմին Շամամեան, կը շարունակեն փնտրել իրեն…
Հասարակութիւնը ծափողջոյններով «վարձատրեց» գործը, որ ամիսներու աշխատանքի արդիւնք էր։ Իսկ «wine bar» թատրոնը կարծես թէ կրնայ դառնալ աւանդոյթ, կեդրոնական ելոյթով մը զուգահեռ։
Ցտեսութիւն, սպասելով յաջորդ ներկայացմանը։
Թղթակից
