Կազմակերպութեամբ Հ.Գ.Խ.ի Թեսաղոնիկէի «Անի» մասնաճիւղին եւ Հ.Յ.Դ. Երիտասարդական միութեան Թեսաղոնիկէի «Ս. Թեհլիրեան» խումբին, Կիրակի՝ 22 Դեկտեմբեր 2019ի կէսօրուան ժամը 12։00էն սկսեալ, «Տէր Զաքարեան» սրահէն ներս տեղի ունեցաւ Նոր Տարուան եւ Ս. Ծննդեան պազար, ներկայութեամբ հոգեւոր հովիւ Ստեփանոս վրդ. Փաշայեանի եւ Թաղական խորհուրդի անդամներուն, ինչպէս նաեւ շրջանէն ներս գործող միութիւններու ներկայացուցիչներուն եւ հոծ բազմութեան։ Պազարի ընթացքին վաճառուեցան զանազան տեսակի ուտեստեղէններ, ձեռագործներ, իրեր, օրացոյցներ, կրպակներ, զանազան նուէրներ, որոնք պատրաստուած էին կամաւոր անհատներու կողմէ, ինչպէս նաեւ Թեսաղոնիկէի «Մալաքեան-Գասպարեան» Ծաղկոց շաբաթօրեայ դպրոցի աշակերտութեան եւ Հ.Յ.Դ. Պատանեկան Միութեան Թեսաղոնիկէի «Լ.Շանթ» խումբի անդամներուն կողմէ։ Սոյն պազարի հասոյթէն բաժին մը պիտի տրամադրուի նաեւ դպրոցի կարիքներուն։
Գեղարուեստական յայտագիրով հանդէս եկան Ծաղկոցի աշակերտները, իրենց Նոր Տարուան եւ Ս. Ծննդեան արտասանութիւններով, ինչպէս նաեւ «Համազգային» հայ կրթական եւ մշակութային միութեան Թեսաղոնիկէի «Ղ. Սարեան» մասնաճիւղի «Մասիս» պարախումբը, որոնք իրենց բարձրօրակ պարերով՝ ուրախ մթնոլորտ ստեղծեցին եւ առաւել փայլ տուին օրուան ձեռնարկին։
Այս ուրախ առթիւ, Հ.Գ.Խ.ի Թեսաղոնիկէի «Անի» մասնաճիւղն ու Հ.Յ.Դ. Երիտասարդական Միութեան Թեսաղոնիկէի «Ս. Թեհլիրեան» իր խորին շնորհակալութիւնները կը յայտնեն բոլորին անխտիր, որոնք օգտակար դարձան սոյն պազարի յաջողութեան համար։ Յատկանշելի է, որ սոյն պազարին, Թեսաղոնիկէի ազգայիններէն՝ տիկ. Անայիս Գասապեան նաեւ նկատի առած էր սեղանի մը վրայ զանազան իրեր վաճառել եւ յայտնած էր, որ հասոյթը ամբողջութեամբ պիտի տրամադրուի Ծաղկոցի կարիքներուն։
Այս առթիւ, Հ.Գ.Խ.ի Մակեդոնիոյ եւ Թրակիոյ Շրջանային վարչութիւնը իր խորին շնորհակալութիւնը կը յայտնէ Տիկ. Անայիս Գասապեանին, որ մշտական կերպով կ’օժանդակէ Ծաղկոցի վերելքին եւ իր ներդրումը կը բերէ դպրոցի յարատեւման ջանքերուն։
Վարձքը կատար բոլորին։
ԹՂԹԱԿԻՑ
