«Հայաստան» Համահայկական Հիմնադրամը կը տեղեկացնէ, թէ Ապրիլ 2ին, «Հայաստան» Համահայկական Հիմնադրամը Ստեփանակերտի մէջ հանդիսաւորութեամբ բացաւ նորակառոյց ուռուցքաբանական կեդրոն, որ կեանքի կոչուեցաւ ֆրանսահայ բարերար Ռիշար Օհանէսեանի հովանաւորութեամբ: Կեդրոնի կառուցումը համատնտեսաւորեց Լ.Ղ.Հ. կառավարութիւնը:
Հանդիսութեան մասնակցելու նպատակով Հիմնադրամի Ֆրանսայի տեղական մարմնոյ ատենապետ Պետրոս Թերզեանի եւ իր տիկնոջ ուղեկցութեամբ Արցախ ժամանեց բարերար Ռիշար Օհանէսեան՝ իր տիկնոջ հետ: Բացման արարողութեան ներկայ էին Լ.Ղ.Հ. նախագահ Բակօ Սահակեան, Լ.Ղ.Հ. վարչապետ Արայիկ Յարութիւնեան, «Հայաստան» Հիմնադրամի գործադիր տնօրէն Արա Վարդանեան, բարձրաստիճան այլ պաշտօնեաներ եւ հիւրեր:
Նորակառոյց կեդրոնը կը սպասարկէ Արցախի եւ Հայաստանի հարաւային շրջանները: Եռայարկ ժամանակակից բժշկական հաստատութեան մէջ կը գործեն արդի բժշկական ախտորոշիչ հետազօտութիւններ: Կեդրոնը նախատեսուած է 35 հիւանդի համար: Բուժական այլ ծառայութիւններու անհրաժեշտութեան պարագային հիւանդները ստորգետնեայ անցումով կը տեղափոխուին յարակից հանրապետական բժշկական կեդրոն: Նկուղային յարկին վրայ կառուցուած են լայնարձակ պահուստային հիւանդասենեակներ՝ նախատեսուած արտակարգ իրավիճակներու համար:
«Մեծ ուրախութիւն է տեսնել, որ օրէցօր Արցախը զարգանում է, ստեղծւում է նորը, բնակիչների կենսամակարդակն էլ զուգահեռաբար բարձրանում է: Շնորհակալութիւն բոլոր նրանց, ում շնորհիւ այս կեդրոնը իրականութիւն է դարձել»,- ողջոյնի խօսքին մէջ ըսաւ բարերար Ռիշար Օհանէսեան, որ նոյն օրը Լ.Ղ.Հ. նախագահ Բակօ Սահակեանի կողմէ պարգեւատրուեցաւ «Երախտագիտութիւն» մետալով՝ «Հայաստան» Հիմնադրամի արցախեան ծրագրերուն ներդրած մեծ աւանդին համար:
«Պատահական չէ, որ այս կեդրոնի բացումը տեղի է ունենում Ապրիլ 2ին: Սա խորհրդանշական է եւ ուղերձ՝ բոլորին, որ պէտք է շարունակենք կառուցել Արցախի հողում եւ մասնակցել նրա վերելքին»,- ողջունելով ներկաներուն՝ ըսաւ Հիմնադրամի Ֆրանսայի տեղական մարմնոյ ատենապետ Պետրոս Թերզեան:
Լ.Ղ.Հ. գլխաւոր ուռուցքաբան, ուռուցքաբանական կեդրոնի գործադիր տնօրէն Արմէն Հայրիեան կը ներկայացնէ.- «Ժամանակակից առողջապահական կեդրոնի կարիք Արցախում վաղուց կար: Այստեղ տարուայ կտրուածքով ուռուցքաբանական խնդիրներ ունեցող շուրջ 650 հոգի մասնագիտացած բուժման կամ վերահսկողութեան կարիք է ունենում: 60ական թուականներից սկսած՝ այս հիւանդները սպասարկւում էին այլ նպատակով կառուցուած մի շէնքում, որը չէր համապատասխանում առողջապահական ոլորտի պահանջներին»:
Ֆրանսայի տեղական մարմնոյ օժանդակութեամբ հաստատութեան կը նուիրաբերուի կահոյք եւ նորագոյն բժշկական սարքաւորում: Արդէն տեղադրուած են մահճակալները: Յառաջիկայ շաբաթներու ընթացքին Արցախ պիտի հասնին անհրաժեշտ սարքաւորումներ: Արցախի կառավարութիւնը Հիմնադրամի հետ համատեղ կը շարունակէ հոգալ մնացած կարիքները: Կեդրոնին մէջ արդի չափանիշներուն համապատասխան բժշկական սպասարկում իրականացնելու նպատակով՝ մասնագէտներու խումբ մը ներկայիս կը վերապատրաստուի Ֆրանսայի մէջ: Հայ-Մեդ ֆրանսական բժշկական կազմակերպութեան թեքնիք աջակցութեամբ իրականացուող այս նախաձեռնութիւնը շարունակական պիտի ըլլայ:
