Հ.Յ.Դ. Յունաստանի Հայ Դատի Յանձնախումբին կողմէ «Մեր հերոսական Արցախը» նիւթով եռօրեայ ելոյթներուն առընթեր, նախապէս առնուած ժամադրութեամբ, Արցախի Հանրապետութեան արտաքին գործոց նախարար Կարէն Միրզոյեան հանդիպումներու շարք մը ունեցաւ Հելլէն Խորհրդարանէն ներս, Յունաստանի պետական-քաղաքական-կուսակցական ներկայացուցիչներու հետ։ Նախարարին կ‘ընկերակցէին Յունաստանի մօտ ՀՀ արտակարգ եւ լիազօր դեսպան Ֆադէյ Չարչօղլեանը եւ Հ.Յ.Դ. Հայ Դատի Յանձնախումբի ընկերներ։ Հանդիպումները առանձին կայացան Հելլէն Խորհրդարանին մէջ, իւրաքանչիւր քաղաքական ուժի ներկայացուցիչներուն հետ։
-Կառավարական համադաշնութեան մաս կազմող ԱՆ.ԷԼ. («Անկախ Յոյներ») կուսակցութեան փոխ նախագահ եւ Կեդրոնական Խորհուրդի նախագահ պրն. Փանաեոթիս Զղուրիտիսի հետ։
-Համայնավար կուսակցութեան երեսփոխան, նախկին եւրոերեսփոխան տիկին Լիանա Քանելիի հետ։
-ՓԱՍՕՔ ընկերվարական կուսակցութեան երեսփոխան, նախկին եւրոերեսփոխան տիկին Սիլվանա Ռափթիի եւ ՏԻ.ՄԱՐ (Դեմոկրատական համախմբում) կուսակցութեան երեսփոխան,աշխատանքի-ընկերային ապահովագրական եւ առողջապահական հարցերու պատասխանատու տիկին Էվի Խրիսթոֆիլոփուլուի հետ։
-Նոր Հանրապետութիւն կուսակցութեան երեսփոխան, արտաքին հարցերու պատասխանատու պրն. Եորղոս Քումուցաքոսի հետ։ Հանդիպումներուն ժամանակ պրն. նախարարը իր զրուցակիցներուն ուշադրութեան յանձնեց Լեռնային Ղարաբաղի բնակչութեան նկատմամբ Ատրպէյճանի կողմէ հետեւողականօրէն իրականացուող զինեալ ծանր ուժերով յարձակումները, անընդհատ հնչող ուժի կիրառման սպառնալիքները եւ հրադադարի յաճախակի խախտումները, ինչպէս նաեւ ռազմական այս յարձակողապաշտութեան դէմ՝ սեփական ժողովուրդի անվտանգութիւնը պաշտպանելու պարտականութիւնը։ Դիտել տրուեցաւ նաեւ միջազգային հանրութեան պատասխանատուութիւնը տարածաշրջանէն ներս խաղաղութիւնը ապահովելու գործին կապակցութեամբ։ Զարկ տրուեցաւ Արցախի զարգացման եւ միջազգային ներկայացուածութեան գործին մէջ հետագայ կարելիութիւններուն, տնտեսական եւ ժողովրդավարական յառաջխաղացքին եւ ժողովուրդի ընկերային իրավիճակին կապուած հարցերու ներկայացման։ Հանդիպումներուն ընթացքին միտքեր փոխանակուեցան տարածաշրջանային իրավիճակի եւ երկիրներու առընչութիւններու հարցերու շուրջ։
