«Մեր հերոսական Արցախը» խորագրով կազմակերպուած Արցախի Հանրապետութեան արտաքին գործոց նախարար Կարէն Միրզոյեանի Աթէնք այցելութեան եռօրեայ յայտագրի ծիրէն ներս, Երեքշաբթի 14 Մարտ 2017ին, այցելութիւն տրուեցաւ Աթէնքի արուարձաններէն Նէա Զմիռնիի քաղաքապետարան, ուր պրն. նախարարն ու իրեն ընկերակցող Հ.Յ.Դ. Հայ Դատի Յանձնախումբի ընկերները, ընդունուեցան քաղաքապետ պրն. Սթաւրոս Ծուլաքիսի կողմէ։
Ջերմ մթնոլորտի մէջ կայացած հանդիպման ընթացքին պրն. քաղաքապետը՝ քաջատեղեակ ըլլալով Արցախի ժողովուրդի ու առօրեայի մասին, զօրակցական խօսքերով արտայայտուեցաւ եւ իր անձնական, ինչպէս նաեւ Քաղաքապետական Խորհուրդի զօրակցութիւնն ու օգտակար հանդիսանալու պատրաստակամութիւնը արտայայտեց։ Ան յիշատակեց Նէա Զմիռնիի եւ հայրենի Սիսիան քաղաքապետութեան հետ բարեկամական սերտ յարաբերութիւնները եւ երկար տարիներու ընթացքին տարբեր տեսակի առնուած նախաձեռնութիւնները, հաւաստիացնելով թէ միշտ հայութեան կողքին պիտի գտնուին: Պրն. նախարարը իր կարգին, գնահատեց համագործակցութեան բարձր մակարդակը, որ զարգացման եւ ընդլայնման լայն հնարաւորութիւններ կ’ընձեռէ եւ Արցախ այցելելու հրաւէր ուղղեց պրն. քաղաքապետին։
Յաջորդաբար, պրն. նախարարի պատուիրակութիւնը ուղղուեցաւ Հայոց Ցեղասպանութեան նուիրուած յուշարձան՝ ուր յարգանքի տուրք մատուցուեցաւ զոհերու յիշատակին։
Այցելութիւն Հ. Կ. Խաչի ազգային «Ճէնազեան» միջնակարգ եւ Ֆիքսի
«Լեւոն եւ Սոֆիա Յակոբեան» վարժարան
Առաւօտեան ժամերուն այցելութիւն տրուեցաւ Հ. Կ. Խաչի ազգային «Ճէնազեան» միջնակարգ վարժարան եւ Ֆիքսի Հ. Կ. Խաչի ազգային «Լեւոն եւ Սոֆիա Յակոբեան» նախակրթարան ու մանկապարտէզ։ Խանդավառ մթնոլորտի մէջ ընդունուեցաւ պրն. նախարարն ու իրեն ընկերակցող Հ.Յ.Դ. Հայ Դատի Յանձնախումբի ընկերները՝ զոյգ տնօրէնութեանց, ուսուցչական կազմերու եւ աշակերտութեան կողմէ։
Պրն. նախարարը փոքրիկներուն յանձնեց իրենց հասցէագրուած նամակներու ծրարը, որ յատկապէս ղրկուած էր աշակերտներուն, որպէս պատասխան՝ իրենց կողմէ գրուած նամակներու։
«Մենք պիտի յաղթենք, որովհետեւ իրաւունք ունինք»
Այս առիթով, տեղ կուտանք Հրայր Փաշայեանի կողմէ գրի առնուած գրութեան, որ լոյս տեսած է Արցախի Մարտիկ թերթին մէջ, 8-22 Հոկտեմբեր 2016ին, եւ կþանդրադառնայ Յունաստանի հայ աշակերտներուն կողմէ Արցախի զինուորներուն ղրկուած նամակներուն։
«Ապրիլեան մարտական գործողութիւնները նորովի բացայայտելով յանուն հայրենիքի հայ զինուորի մինչեւ վերջ մաքարելու, նոր ու անօրինակ սխրագործութիւններ կատարելու պատրաստակամութիւնը, կրկին համախմբեց աշխարհասփիւռ հայութեանը՝ յանուն Արցախի եւ նրա քաջարի պաշտպանների։ Աշխարհի տարբեր մասերում ապրող մեր հայրենակիցները ձեռնամուխ եղան հայ զինուորին ինչ-որ բանով օգնելու նախադէպը չունեցող քայլերի, ինչի շնորհիւ օրէցօր աւելի են ամրապնդւում Արցախի սահմանները։ Բացի նիւթական օգնութիւնից, որն, անշուշտ, կարեւոր նշանակութիւն ունի դիրքերի ամրապնդման համար, առաւել կարեւորւում է այդ դիրքերն օր ու գիշեր անառիկ պահող զինուորի մարտական ոգին, ոգի, որի շնորհիւ 18-20 տարեկան մեր տղաները պարտութեան են մատնում յատուկ պատրաստութիւն անցած թուրք ասկեարներին։ Դիրքապահ զինուորների մօտ անկոտրում մարտական ոգին ամրապնդելուն էր ուղղուած նաեւ Յունաստանի Հայ Կապոյտ Խաչի ազգային երեք վարժարաններու՝ «Զաւարեան» վարժարանի, Աթէնքի «Լեւոն եւ Սոֆիա Յակոբեան» ազգային վարժարանի, «Ազնիւ եւ Ժիրայր Ճենազեան» ազգային միջնակարգ վարժարանի սաների նամակներն ու ձեռակերտ նկարները՝ բնորոշող Արցախն ու նրա պաշտպաններին։
Նրանցից մէկում կարդում ենք. «Սիրելի հայ զինուոր, մենք աշակերտներս Ազգային «Ճէնազեան» վարժարանի, թէպէտ մեր բոլորին հարազատ հայրենիքէն հեռու կը գտնուինք, բայց եւ այնպէս կþապրինք ու կը շնչենք մեր պապերուն ժառանգ ձգած անգին ու թանկարժէք հայրենիքով։ Կþուրախանանք մեր հայրենիքին մէջ ապրող քոյր-եղբայրներու ուրախութեամբ, ինչպէս նաեւ կը տխրինք անոնց վիշտով ու ցաւով։ Այս նամակով կը յայտնենք մեր սրտի անկեղծ խօսքը եւ երախտագիտութիւնը՝ ձեր բոլորին կատարած քաջագործութիւններուն եւ սխրանքներուն համար։ Ձեզմէ իւրաքանչիւրը մեզի համար Հերոս մըն է։ Անզուգական ու անօրինակելի անձնաւորութիւն»։
Կարեւորելով սաներից իւրաքանչիւրի Հայ զինուորին ուղղուած նամակ-ցանկութիւնները, ներկայացնենք նրանցից մէկի՝ «Զաւարեան» վարժարանի աշակերտուհի Մարիա Հիլվաճեանի մաղթանքը, որն, անշուշտ, արժանի է յատուկ ուշադրութեան իր լակոնիկ, բայց խորիմաստ բովանդակութեամբ. «Հայ զինուորներ, մի վախնաք, բոլորս ալ գիտենք որուն կը պատկանի Արցախը։ Մենք պիտի յաղթենք, որովհետեւ իրաւունք ունինք։ Պատերազմեցէք ու յաղթեցէք։ Ես ձեր հետն եմ»։
Յաւելենք, որ ինչպէս նախորդ դէպքերում, այս անգամ եւս հայ մանչուկների նամակներն ու նկարները բաժանուեցին դիրքապահներին, որոնք, ինչպէս տողերիս հեղինակն է մի քանի անգամ ականատես եղել, նուէրներ ստանալու դէպքում, նախքան դրանց պարունակութեանը ծանօթանալը, փութաջանօրէն ընթերցում են իրենց հասցէագրուած մաղթանքները, նոր ոգի եւ ուժ ստանում եւ ներքուստ իւրաքանչիւրն ինքն իրեն պարտաւորւում, որ երբեք յուսախաբ չի անի սպասելիքները»։
Այցելութիւն՝ փոքրերու հոգատարութեան «Խածիքիրիաքիօ» կեդրոն
Աւելի քան 22 տարիներէ ի վեր, Յունաստանի Սիրոս կղզիին մէջ իրենց ամառնային արձակուրդի շրջանը անցնող Արցախէն ժամանած պատանիները, միշտ ալ Աթէնք կեցութեան օրերուն, հիւրընկալուած են Փիրէայի փոքրերու հոգատարութեան ու պաշտպանութեան «Խածիքիրիաքիօ» հաստատութեան մէջ։ Այս հաստատութեան մօտ գտնուեցաւ Արցախի Հանրապետութեան արտաքին գործոց նախարար պրն. Կարէն Միրզոյեանը, Երեքշաբթի 14 Մարտ 2017ի կէսօրին, ընկերակցութեամբ Հ.Յ.Դ. Հայ Դատի Յանձնախումբի ընկերներու։
Իւրայատուկ այս ծրագիրը, սկսած է 1996էն, Հ.Յ.Դ. Հայ Դատի Յանձնախումբի նախաձեռնութեամբ եւ առիթը կու տայ Արցախի տարբեր քաղաքներէ 9-15 տարեկան փոքրիկներու 15-օրեայ արձակուրդի շրջան մը անցընելու Յունաստանի մէջ։
Պրն. նախարարին ընդունեցին «Խածիքիրիաքիօ» հաստատութեան տնօրէնուհի տիկին Անասթասիա Քացիլիէրի, հաստատութեան ընկերային բաժանմունքի պատասխանատու տիկին Էվա Քալիմնիու եւ խնամատարական մարմնոյ անդամներ։
Պրն. նախարարը շնորհակալութեան խօսքերով արտայայտուեցաւ, գնահատելով Արցախի պատանիներուն հանդէպ ցուցաբերուած գուրգուրանքն ու հոգատարութիւնը եւ յոյս յայտնեց որ երկար տարիներ եւս պիտի շարունակուի գործադրուիլ բոլորին ոգեշնչող իւրայատուկ այս ծրագիրը։
