Գերմանիոյ մէջ հաստատուած եւ համահայկական հետազօտութիւններ կատարող Յուշամատեան հաստատութիւնը Նոյեմբերին մէջ պիտի այցելէ Թեսաղոնիկէ, յիշողութեան նիւթեր հաւաքելու համար տեղացի հայ ընտանիքներու հաւաքածոներէն։ 13 եւ 14 Նոյեմբերին, Յուշամատեանի աշխատակիցները ներկայ պիտի գտնուի Թեսաղոնիկէի «Ս. Աստուածածին» եկեղեցւոյ գրասենեակը, ուր պիտի ընդունին հայկական ընտանեկան արժէքաւոր իրեր թուայնացումի համար։
Այս առիթով հաստատութիւնը հրապարակեց հետեւեալ հաղորդագրութիւնը։
«13 եւ 14 Նոյեմբեր 2021-ին, Յուշամատեանի խումբը պիտի գտնուի Թեսաղոնիկէի մէջ, ուր գործակցաբար «Արմենիքա» պարբերաթերթին եւ Համազգայինի Թեսաղոնիկէի մասնաճիւղին՝ պիտի կազմակերպէ յիշողութեան նիւթեր հաւաքելու աշխատանոց մը։
Յուշամատեանի վերջին աշխատանոցը տեղի ունեցաւ Աթէնքի մէջ՝ ՝Նոյեմբեր 2019-ին։ Անկէ ետք աւելորդ է յիշատակել, որ համաճարակը մեր բոլորին կեանքը տակնուվրայ ըրաւ եւ մենք եւս ստիպուած եղանք դադրեցնելու մեր աշխատանոցները, որոնք այնքան կարեւոր են հանրութեան հետ ուղղակի եւ կենդանի կապ հաստատելու, ընտանեկան պատմութիւններու մասին վկայութիւններ հաւաքելու եւ յիշողութեան իրեր թուայնացնելու համար։
Մեծ ուրախութիւն է մեզի համար այս ընդհատուած գործը վերստին շարունակելը։ Յաջորդ ամիսներուն առիթ կ՚ունենաք Թեսաղոնիկէի մէջ մեր հաւաքած թանկագին նիւթերն ու պատմութիւնները տեսնելու մեր կայքէջին մէջ։
Այս առիթով մեր աշխատակից Կարին Կէօքճեան տեսաերիզ մը պատրաստած է (հայերէն եւ յունարէն), ուր բացատրութիւններ կը տրուի աշխատանոցին մասին։
Նշենք որ այս աշխատանոցին հովանաւորն է Stiftung Erinnerung, Verantwortung und Zukunft հիմնադրամը»։
Տեսանիւթը կարելի է դիտել հետեւեալ հասցէին վրայ՝
