25 Մարտին լոյս տեսած վիճակագրական տուեալներուն համաձայն, Յունաստանի մէջ վարակումի դէպքերը հասած էին 821ի։ Մինչեւ այդ պահուն, 22 քաղաքացիներ զոհ գացին «Քորոնա» վարակէն, որոնց միջին տարիքը 75 էր։ Վարակուածներու 75% կը գտնուի 18-64 տարիքի սահմանին մէջ, սակայն անոնք թեթեւ ախտանշաններ ցոյց կու տան։ Ներկայիս, 134 անձեր կը գտնուին հիւանդանոցներու բժշկական անմիջական խնամքին տակ։ Առողջապահութեան նախարարութեան ներկայացուցիչները, իրենց ամէնօրեայ ասուլիսներու ընթացքին, կը նշեն տուն մնալու կարեւորութիւնը եւ աւելորդ տեղաշարժերէ խուսափումը։ Նաեւ, անոնք նշեցին թէ, այսուհետեւ կիրարկուած սեղմումներու հսկողութիւնը աւելի խիստ պիտի դառնայ եւ ծանր տուգանքներու պիտի ենթարկուին բոլոր անոնք, որոնք կ՚անտեսեն շրջագայութեան արգիլման կանոնը։
