Թագավարակի պատճառով գաղութային գործունէութեան կասեցման երկար ժամանակաշրջանէ մը ետք, Յունաստանի Հ.Մ.Ը.Մ.-ի ընտանիքը գումարեց 73-րդ Շրջանային ներկայացուցչական ժողովը, Միութեան գործունէութեան նոր թափ եւ սկիզբ մը տալու նախանձախնդրութեամբ։
Կիրակի՝ 20 Յունիս 2021-ին, Հ.Մ.Ը.Մ.-ականներու ժամադրավայրը եղաւ Գոքինիոյ «Զաւարեան» կեդրոնը, ուր՝ ներկայութեամբ Հ.Մ.Ը.Մ.-ի Կեդրոնական վարչութեան անդամ եղբ. Ֆետի Գազանճեանի, Հ.Յ.Դ. Յունաստանի Կեդր. Կոմիտէի, Յունաստանի ընթացաւարտ Շրջ. վարչութեան, Աթէնքի եւ Գոքինիոյ շրջաններու մասնաճիւղերէն եկած պատգամաւորներու, սկաուտական խմբապետական կազմերուն եւ խորհուրդներուն, ընթացք առաւ եւ ամբողջացաւ Ներկայացուցաչական ժողովը։
Շրջանաւարտ վարչութեան փոխատենապետ եղբ. Հայկազ Տէօքմէճեան բարի գալուստ մաղթեց բոլորին եւ յայտնեց, որ սոյն ժողովը կոչուած է արդիւնաւէտ գործունէութեան սկիզբի մը ազդանշանը տալու՝ հեռու թագավարակի ստեղծած խոչընդոտներէն։
Յաջորդաբար, կարդացուեցաւ յունահայոց թեմի Առաջնորդ Գեղամ Արք. Խաչերեանի ողջոյնի խօսքը:
Յատուկ խօսք ուղղեց Հ.Յ.Դ. Կ.Կ.-ի անունով ընկ. Յարութիւն Մանուկեան։ Նաեւ, կարդացուեցան յունահայ գաղութի կառոյցներու՝ Հ.Կ.Խաչի, Համազգայինի եւ «Ազատ Օր» օրաթերթի ողջոյնի նամակները, իսկ ողջոյնի գիրեր ղրկած էին նաեւ Հ.Մ.Ը.Մ.-ի «Արժանեաց» շքանշանակիր եղբայրներ Կարօ Յովակիմեան եւ Պօղոս Չոլաքեան։
Յաջորդաբար, ժողովի մնայուն դիւան ընտրուեցան՝ որպէս նախագահ եղբ. Վիգէն Մինասեան եւ որպէս քարտուղար քոյր Գոհար Ալէանաքեան։ Բանաձեւի եւ քուէախոյզ յանձնախումբերու ընտրութեամբ, ժողովը անցաւ իր գլխաւոր օրակարգի քննութեան։
Նախապէս, կարդացուեցաւ շրջանաւարտ կազմերու տեղեկագիրը, որմէ ի յայտ եկաւ, թէ հակառակ երկրին եւ գաղութին մէջ ստեղծուած պայմաններուն, Հ.Մ.Ը.Մ.-ը կարողացաւ համադրել եւ գործադրել զանազան աշխատանքներ ու ծրագիրներ, որոնք մեծապէս գնահատուեցան ժողովականներէն։ Նշելի էր Հ.Մ.Ը.Մ.-ի երիտասարդական առաջին համագումարը, որ կազմակերպուեցաւ 2019-ի Մայիսին Յունաստանի մէջ եւ համախմբեց բոլոր շրջաններէն եկած տասնեակ երիտասարդ անդամներ։ Հակառակ որ մարզական գործունէութիւնը ստիպողաբար կանգ առաւ, այսուհանդերձ գովելի էր նաեւ սկաուտական միաւորներու աշխատանքը, որոնք Շրջանային վարչութեան զօրակցութեամբ իրագործեցին զանազան առցանց ծրագիրներ եւ ելոյթներ։
Նոր նստաշրջանի գործունէութիւնը հունաւորելու նպատակով, Ներկայացուցչական ժողովը մշակեց կարգ մը բանաձեւեր՝ նախ եւ առաջ զարկ տալով իր անդամներու եւ վարչական եղբայրներու դաստիարակութեան, հաշուապահական միաձեւ դրութեան մը որդեգրումին, մարզական յատուկ խաղերու կազմակերպումին, համաեւրոպական բանակումի մը ծրագրումին, սկաուտական աստիճանաւորական կազմերու վերապատրաստումին, նիւթական աղբիւրներու ստեղծումին, վեթերան Հ.Մ.Ը.Մ.-ականներու աշխոյժ ներկայութեան, եւ այլ հետաքրքրական ծրագիրներու։
Բոլոր հարցերուն շուրջ տեղի ունեցաւ լայն քննարկում եւ մասնակից եղբայրները արտայայտեցին շինիչ միտքեր՝ նկատի ունենալով Միութեան հզօրացման հրամայականը եւ դէպի ժողովուրդ բացուելու անհրաժեշտութիւնը։
Աւարտին, յաջորդ երկամեակին համար ընտրուեցաւ նոր Շրջանային վարչութիւն բաղկացած հետեւեալ անդամներէն՝ Գէորգ Պօղոսեան, Մարլէն Տաքէսեան, Գոհար Ալէանաքեան, Խաչիկ Մինասեան եւ Սերգօ Եդիմեան։
Հ.Մ.Ը.Մ.ի Կեդրոնական
վարչութեան ներկայացուցիչ
եղբ. Ֆետի Գազանճեանի խօսքը
Սիրելի՛ քոյրեր եւ եղբայրներ,
Հ.Մ.Ը.Մ.-ի Յունաստանի 73-րդ Ներկայացուցչական ժողովը հասաւ իր աւարտին եւ ընտրեց հինգ անդամէ բաղկացած Շրջանային վարչութիւնը, որ պիտի գործէ յառաջիկայ երկամեակին։
Այս ժողովին մասնակցիլս ինքնին զգացական է ինծի համար, որովհետեւ տարիներ շարունակ ծառայած եմ այս կառոյցներուն մէջ, ինչպէս նաեւ եղբ. Պաղտիկին հետ միասնաբար Ներկայացուցչական ժողովի մը դիւանի անդամ ընտրուած ենք։
Խօսքս սկսիմ եւ ուղղեմ ընթացաւարտ Շրջանային վարչութեան. երբ կազմին ատենապետը՝ եղբ. Յակոբ Եդիմեանը առողջապահական լուրջ վիճակի մէջ գտնուեցաւ, կազմը յատուկ նամակով մը դիմեց Կ. Վարչութեան՝ նշելով, թէ իրենք չեն ուզեր կազմը համալրել 5-րդ անդամով, այն յոյսով, թէ եղբայրը կը վերագտնէ իր առողջութիւնը եւ կրկին կը ստանձնէ իր պարտականութիւնը. եղբ. Տէօքմէճեան մերժեց ստանձնել ատենապետի պաշտօնի անուանումը, թէկուզ այդ պաշտօնը կատարեց լիուլի. կազմը մէկ բռունցքի նման շարունակեց իր աշխատանքները եւ այս դժուար օրերուն շրջանը հասցուց մինչեւ Ներկայացուցչական ժողով։ Իսկապէս Հ.Մ.Ը.Մ.-ականի բարոյական պատկերի բարձրագոյն օրինակը փոխանցեցինք այս կեցուածքով եւ այս երկու օրերուն ընթացքին նոյնիսկ չզգացուցիք եղբ. Յակոբին բացակայութիւնը. կը խոնարհիմ ձեր այս առած քայլին առջեւ։
Այս ժողովը տուաւ իր գնահատումը անցած շրջանին, մտահոգութիւններ ներկայացուց, ինչպէս նաեւ ապագայի նոր պատկերացումներ հրամցուց շրջանին եւ նորընտիր Շրջանային վարչութեան։ Մեր դիմաց ունինք նոր երկամեայ մը. մեր յոյսն է, որ անիկա չնմանի «Քորոնա» ժահրին պատճառով անցեալի օրերուն պարզած վիճակին, այլ ըլլայ բնականոն, որպէսզի նորընտիր կազմը կարողանայ Հ.Մ.Ը.Մ.-ի Յունաստանի կառոյցը հասցնել նոր վերելքներու։ Դժուարութիւնները՝ ըլլան անոնք նիւթական, մարդուժի ծառայութեան պակասի, ժամանակ տրամադրելու, ամէն տեղ են. բայց այս օրերուն է, որ իսկական ղեկավարները կը ծնին, այս օրերու է, որ պիտի փաստենք, թէ մեր «ես»-երը կը դադրին գոյութիւն ունենալէ՝ «մենք»-ը նկատելով գերադաս, ամէն ինչ փոքր կը թուի ազգային եւ հանրային ծառայութիւններուն դիմաց, պիտի փաստենք, որ մեր մտահոգութիւնները մէկ են ու հաւաքական, իսկ լուծումները պէտք է տրուին այդ ուղղութեամբ եւ համապատասխանաբար՝ իբրեւ Շրջանային վարչութիւն կամ մասնաճիւղերու վարչութիւններ, որոնց թիրախն ու նպատակը միշտ պիտի ըլլայ միութենական գերագոյն շահը եւ հաւաքական նուաճումները։
Յունաստանի շրջանին համար, տարիներու փորձառութիւնը ցոյց տուած է, որ չկան լուծում չունեցող հարցեր։ Յաջող աշխատանքներու եւ ծրագիրներու արդիւնքները նիւթականը կ՚ապահովեն անպայման, նաեւ փայլուն պատկերը կը պարզեն Հ.Մ.Ը.Մ.-ին, իսկ երբ դրական արդիւնքներ ներկայացնենք համայնքին, դժուարութիւնները քիչ-քիչ կը սկսին վերանալ, միութեան նկատմամբ կապուածութիւնը անպայման կ՚ամրապնդուի, իսկ մեր տարած ամէն ձեւի աշխատանք անպայման կը ծառայէ առողջ միտքով, առողջ մարմինով սերունդներու կազմաւորման ու կերտման, սերունդներ, որոնք յառաջիկային պիտի լծուին հայութեան, իրենց գաղութներու եւ հայրենիքի ծառայութեան ու մեր վեհ դատերու պաշտպանութեան։ Պէտք է լաւապէս գիտակցիլ, որ այս միութեան շարքերուն մէջ տողանցողները, Հ.Մ.Ը.Մ.-ի դրօշը բարձրացուցած սերունդները տարբեր պիտի ըլլան անպայման, իսկ մեր բոլորին աշխատանքը, իսկ հոս՝ Յունաստանի մէջ, ձեր աշխատանքը պիտի ըլլայ անպայման համախմբել նոր սերունդը, անոր մէջ վառ պահել ազգայինն ու հայկականը, «Բարձրացիր բարձրացուր» նշանաբանը, որ մանուկին, պատանիին եւ երիտասարդին համար ոչ թէ պիտի ըլլայ միութեան մը կարգախօսը, այլ կեանքի սկզբունք, որպէսզի անոնք սորվին, որ բարձրանալուն կողքին կարեւոր է բարձրացնելը, ուրիշին ծառայելն ու օգնելը, ընդհանուրը անձնականէն կարեւոր նկատելը։ Այս բոլորին համար ալ մենք պարտինք աշխատիլ անդադար եւ առանց երբեք յուսահատելու, որովհետեւ մեր այսօրուան գործունէութենէն կախեալ է ապագան։
Հ.Մ.Ը.Մ.-ի ընտանիքին համար, Յունաստանը Եւրոպայի ամէնէն հին շրջաններէն է, ուր տարիներու ընթացքին հրամցուցած է մեր միութեան տարբեր տեսակի աշխատանքներ՝ համաՀ.Մ.Ը.Մ.-ական մակարդակի վրայ, ինչպէս՝ բանակումներ, սեմինարներ եւ Հ.Մ.Ը.Մ.-ի առաջին երիտասարդական համագումարը. ուրեմն, այս շրջանը իրաւունք չունի գանգատելու, թէ՝ դժուարութիւնները, նեղ օրերը կրնան յուսալքել մեզ. այլ ընդհակառակը, մեզի համար՝ այս շրջանը, պէտք է ըլլայ Եւրոպայի լոյսը, առաջնորդը, յոյս ներշնչողը՝ իր ծրագիրներով եւ յաջողութիւններով, իրաւունք չտանք մենք մեզի խղճալի վիճակի մէջ իյնալու եւ յանձնուելու։ Յուսալքութիւնը երբեք արտօնուած չէ եւ վայել չէ մեզի, հակառակ ամէն տեսակ դժուարութիւններուն եւ խոչընդոտներուն։ Այստեղ ունինք յաջող ՀԱՅ մնալու բոլոր կարելիութիւնները՝ եկեղեցի, դպրոց, տարբեր կառոյցներ, մինչ եւրոպական այլ շրջաններ զրկուած են այս առաւելութիւններէն։ Հո՛ս է, որ պէտք ունինք նախ իրարու կողքին կանգնելու, միաւորուելու, զօրանալու, սերունդներ պատրաստելու եւ ետքը բարձրացնելու Հ.Մ.Ը.Մ.-ի Եւրոպայի ջահը։
Յաջողութիւն եւ վերելք կը մաղթեմ Հ.Մ.Ը.Մ.-ի Յունաստանի նորընտիր Շրջանային վարչութեան՝ այն հաւատքով եւ համոզումով, որ ան ատակ ու յանձնառու պիտի ըլլայ միութեան աշխատանքը լաւագոյնս կատարելու, Հ.Մ.Ը.Մ.-ի դրօշը բարձր պահելու Յունաստանի երկինքին տակ եւ ամէն տեղ, իր շուրջ համախմբելու միութենականները՝ միասնաբար գործելու աւելի պայծառ ապագայի մը տեսլականով։
