Շաբաթ՝ 2 Յունիս 2018ի յետմիջօրէին եւ Կիրակի՝ 3 Յունիս 2018ի ամբողջ օրը, Ֆիքսի «Արամ Մանուկեան Կեդրոն»ին մէջ, Հ.Մ.Ը.Մ.ի Յունաստանի Շրջանային Վարչութիւնը գումարեց իր 71րդ Շրջանային Ներկայացուցչական Ժողովը։
Ժողովին ներկայ գտնուեցաւ եւ իր ելոյթներով ժողովի աշխատանքներուն իր մասնակցութիւնը բերաւ Հ.Մ.Ը.Մ.ի Կեդրոնական Վարչութեան անդամ եղբայր Բագրատ Եսայեան Հայաստանէն։ Ներկայ եղան եւ ժողովի գումարումը ողջունեցին յունահայոց Ազգային Վարչութեան, Հ.Յ.Դ. Կեդրոնական Կոմիտէի, Հայ Կապոյտ Խաչի եւ Համազգայինի Շրջանային Վարչութեանց ներկայացուցիչներ, ինչպէս նաեւ «Ազատ Օր» օրաթերթի ներկայացուցիչը։
Ժողովը իր աշխատանքներուն սկսաւ՝ լսելով Շրջանային Վարչութեան շրջանաւարտ կազմի տեղեկագիրը, ուրկէ ի յայտ եկաւ, թէ Շրջանային Վարչութիւնը իր անդրանիկ նիստին պատրաստեց իր երկամեայ աշխատանքներու ծրագիրը՝ հիմնուելով 70րդ Շրջանային Ներկայացուցչական Ժողովի որոշումներուն վրայ, որոնք բաժնուած էին հետեւեալ գլուխներուն.- Համերաշխութիւն, միութեան օրինականացում, երկամեայ գործունէութիւն եւ Հ.Մ.Ը.Մ.ի 100ամեակ: Այս հիմնական գլուխները դարձան միութեան երկամեայ գործունէութեան ուղեցոյցը եւ աշխատանքները կեդրոնացան անոնց գործադրութեան վրայ։
Տեղեկագրին մէջ գրուած էր, թէ «երկու տարուան ընթացքին նշանակեցինք յանձնախումբներ եւ, աշխատելով միասնաբար՝ բոլորս, յաջողութեամբ պսակեցինք հետեւեալները.
Ա.- Կատարեցինք սկաուտական խումբի պաշտօնական գրանցումը Յունաստանի Սկաուտական Ազգային Համակարգին (ՍԵՓ) մօտ՝ պահպանելով մեր ինքնութիւնը եւ Հ.Մ.Ը.Մ.ի նպատակներն ու արժէքները։
— Յառաջիկային որեւէ մասնաճիւղ/ներ, որ պիտի հիմնուին Յունաստանի մէջ, պիտի պատկանին միութեան ու հաշուետու պիտի ըլլան Շրջանային Վարչութեան նշանակած Շրջանային Խմբապետ/ուհիին:
— Պահեցինք՝ եռագոյն փողկապը, Հ.Մ.Ը.Մ.ի խոստման, Վկայեալ եւ Արարատեան կարգերու պէճերը, մեր ազգային ու միութեան դրօշակները՝ յունաց ազգային տողանցքներուն ժամանակ։
— Նաեւ՝ ընդունուեցաւ յունահայ գաղութի եւ շրջանի Հ.Մ.Ը.Մ.ի լրիւ կառոյցը:
Բ.- Հետեւելով 70րդ Ներկայացուցչական Ժողովի որոշումին՝ քննեցինք կարելիութիւնները Շրջանային Վարչութեան օրինականացման, իբրեւ «Ένωση Αρμενίων Αθλητών και Προσκόπων Ελλάδος (Էնօսի Արմէնիօն Աթլիթօն քէ Բրոսքօբօն Էլատօս ), սակայն Ատիկէի մարզպետի մեկնաբանութեամբ՝ «միութիւն մը չի կրնար ունենալ միաժամանակ մարզական եւ սկաուտական գործունէութիւններ»: Այսպէս, վարչութիւնս նկատի առնելով՝ թէ մարզական խումբերը պաշտօնական ճանաչում ունին մասնաճիւղներու միջոցաւ, որոշեց Շրջանային Վարչութեան պաշտօնական ճանաչումով ընդգրկել սկաուտական լրիւ կազմը: Փաստաբանուհի Մարի Եղիշէեանի ցուցմունքներուն հետեւելով՝ հասանք Շրջանային Վարչութեան պաշտօնական օրինականացման, իբրեւ «ΑΡΜΕΝΙΟΙ ΠΡΟΣΚΟΠΟΙ ΕΛΛΑΔΟΣ ΧΟΜΕΝΕΤΜΕΝ-H.A.S.K (Արմէնիի Բրօսքօբի Էլատոս Հ.Մ.Ը.Մ.-ՀԱ.ՍԿ):
Գ.- Ամբողջացան աշխատանքները միութեան թանգարանին ու եղբ.Կարպիս Գույումճեանի անունը կրող գրասենեակին, որոնք կը գործեն «Ս. Յակոբ» եկեղեցւոյ կից տրամադրուած սրահներուն մէջ:
Դ.- Պահեցինք մտերիմ կապերը Թեսաղոնիկէի Հ.Մ.Ը.Մ.ի վարչութեան հետ եւ երկու հոգի նշանակուեցան ու մաս կազմեցին միութեան 100ամեակի յանձնախումբին:
Տեղեկագրի ընթերցումէն ետք ժողովը շարունակեց իր աշխատանքները։
Պաշտօնավարութեան շրջանը աւարտած վարչութեան եւ Շրջանային Սկաուտ Խորհուրդի անդամներուն կողքին, ժողովին կը մասնակցէին Հ.Մ.Ը.Մ.ի Աթէնքի, Գոքինիոյ եւ Թեսաղոնիկէի անդամական ժողովներէն ընտրուած ներկայացուցիչները։
Նաեւ՝ ժողովի աշխատանքներուն հետեւեցան ու օրակարգերու քննարկման ժամանակ իրենց ներդրումը բերին հրաւիրեալ քոյրեր եւ եղբայրներ։
Ժողովը իր քննարկումները գլխաւորաբար կեդրոնացուց Յունաստանի Հ.Մ.Ը.Մ.ի ներքին կազմակերպական վերաշխուժացման եւ, այդ ճամբով, յունահայ նորահաս սերունդին հայեցի կազմաւորման ու դաստիարակութեան օգնելու գործին ուղղուած առաջարկներով։ Քննուեցաւ նաեւ միութեանց 100ամեակի օրակարգը։ Քննարկուեցաւ նախորդ նստաշրջանի գործունէութեան ընդհանուր գործելադաշտը, որու համար հաստատուեցաւ, թէ գնահատելի էր։
Այլ հարցերու կողքին քննարկուեցաւ մարզական խումբերու միացման հարց, տնտեսական հաւասարակշռուած պատկեր յաջողցնելու հեռանկարով։
Ժողովը իր աշխատանքներու աւարտին ընտրեց Հ.Մ.Ը.Մ.ի Յունաստանի Շրջանային Վարչութիւն՝ հետեւեալ կազմով.
— Քոյր Ագնէս Թոքաթլեան
— Քոյր Արշա Սամուէլեան
-Քոյր Մարլէն Տաքէսեան
— Եղբայր Հայկազ Տէօքմեճեան
— Եղբայր Յակոբ Եդիմեան։
Վարձքը կատար բոլորին
Բարձրացիր-Բարձրացուր՝
Հ.Մ.Ը.Մ.ի Շրջանային
Վարչութեան թղթակից
