ՎԻԳԷՆ ՄԻՆԱՍԵԱՆ
1-6 Օգոստոս 2023-ին, Սիրոս կղզիին մէջ տեղի ունեցաւ միջփաղանգային բանակումը, որուն մասնակցեցան փաղանգի 15 քոյրեր եւ եղբայրներ, Յունաստանի Հ.Մ.Ը.Մ.-ի 4 սկաուտական մասնաճիւղերէն (Աթէնքի, Գոքինիոյ, Գարէայի եւ Թեսաղոնիկէի), իրենց պատասխանատու խմբապետներուն առաջնորդութեամբ։ Այս տարուայ բանակումը ընթացաւ ոչ մնայուն բանակավայրի մը մէջ, այլ կղզիին զանազան վայրերը։
Բանակումի ընդհանուր յայտագիրը պատրաստուեցաւ փաղանգի անդամներէն, խմբապետներու ուղղութեամբ։ Մասնակիցները խաղերու միջոցով առիթը ունեցան ծանօթանալու Էրմուբոլի քաղաքի տարբեր հետաքրքրական վայրերը։ Կատարեցին այցելութիւններ լոխումի գործարանը, ուր ծանօթացան անոր պատրաստութեան ձեւին, կղզիի կաւագործարան մը, ուր պատրաստեցին կաւէ գաւաթներ, Սիրոսի ձիավարութեան միութեան վայրը եւ վերջապէս կղզիի ջրարանը, ուր տեսան ձուկերու բազմաթիւ տեսակներ։ Բանակումի ընթացքին ստացան սկաուտական եւ այլ գիտելիքներ, ընդարձակելով իրենց մտային եւ գործնական փորձառութիւնները: Արդէն հասած էր փաղանգի բանակումի վերջին օրը, որուն ընթացքին քոյրերն ու եղբայրները կատարեցին փայտէ շինութիւններ (դրօշի արարողութեան ցող, մուտք եւ այլն) որոնք պիտի օգտագործուէին վոհմակի եւ խումբի բանակումին։
7 Օգոստոսը արդէն իսկ հասած էր։ Սիրոսի յունական սկաուտական խնամակալութեան «Ֆինիքա»-ի բանակավայրը ժամանեցին 45 քոյրեր եղբայրներ, Շրջանային խմբապետ եղբայր Օննիկ Աւագեանի եւ Շրջանային ու տեղւոյն Խորհուրդի անդամներու առաջնորդութեամբ, միանալով փաղանգի անդամներուն, որոնք այս անգամ բանակող չէին այլ մաս պիտի կազմէին աստիճանաւորական կազմին, վայելելու համար անմոռանալի օրեր մինչեւ 12 Օգոստոս։ Վոհմակի բանակումի նիւթը հիմնուած էր հայկական դիցաբանութեան վրայ, ուր խաղերու եւ գիտելիքներու միջոցով ծանօթացան հայ չաստուածներու պատմութեան։ Արի արենուշներու յայտագիրը հիմնուած էր յայտնի սեղանախաղերու վրայ։
Խումբի քոյրերն ու եղբայրները «արգելափակուած» էին այն խաղերուն մէջ, ուր զանազան փորձութիւններէ ետք, նիշեր հաւաքելով կարողացան յաղթահարել ու ազատիլ։ Բանակումի ընթացգին վոհմակը եւ խումբը ստացան նոր գիտելիքներ, սորվեցան կանչեր ու երգեր։ Իրենց յայտագիրին մէջ կային նաեւ ծովագնացութիւն եւ միօրեայ այցելութիւն Էրմուփոլիի քաղաքը ու լոխումի գործարան մը։ Խումբին համար պատրաստուած էր քաղաքի մեծ խաղ մը, որուն միջոով ծանօթացան քաղաքի կարեւոր վայրերուն։
Ամէն գիշեր խարոյկահանդէսը անպակաս էր իրենց կեանքէն, ուր երգերով, կանչերով եւ թատերականներով ուրախ ժամանակ կ՚անցնէին։ Բանակումի այս 6 օրերուն Խորհուրդի անդամները յանձն առած էին բանակողներու ճաշի պատրաստութիւնը, ինչպէս նայեւ բանակումի լաւ ու յաջող ընթացքը։ Վերջին օրը դրօշակի արարողութենէն ետք, խօսք առին Շրջանային խմբապետ եղբայր Օննիկ Աւագեան, Շրջանային խորհուրդի ատենապետուհի քոյր Սոֆիա Խայտեմենու-Միքայէլեան, Աթէնքի ու Գոքինիոյ մասնաճիւղի խմբապետներ եղբայրներ Եղիշէ Շահպազեան եւ Վիգէն Մինասեան, որոնք գնահատանք յայտնեցին բոլոր անոնց, որոնք իրենց բարոյական եւ նիւթական օժանդակութիւնը բերին այս բանակումներուն իրականացման համար։ Եղբայր Օննիկը իր խօսքին մէջ շնորհաւորեց նաեւ եղբայր Վիգէն Մինասեանը, որ վերջին երկու տարիներուն հետեւեցաւ Հ.Մ.Ը.Մ.-ի խմբապետի դաստիարակութեան գիտելիքներու բարձրագոյն կարգը, Յունաստանի մէջ առաջին անձը ըլլալով, որ կը ստանայ «Արարատեան» կարգի վկայագիրը եւ իրեն վարձատրեց Շրջանային խորհուրդին եւ Շրջանային խմբապետին կողմէ վկայագիրով մը եւս։ Յունաստանի Շրջանային վարչութեան կողմէ նաեւ կարդացուեցաւ եղբայր Յարութիւն Մանուկեանէն ստացուած գնահատանքի նամակ մը։
Այս տարուան երկու բանակումները իրականացան Աթէնքէն բաւական հեռու՝ նոր միջավայրի մը մէջ։ Հակառակ հեռաւորութեան եւ մասնակցութեան թիւին շուրջ մտահոգութիւններուն, բանակումը մեծ յաջողութեամբ ընթացաւ եւ 60 բանակողները լաւագոյն տպաւորութիւններով վերադարձան։
Կը մաղթենք բարի վերամուտ ակաուտական նոր տարեշրջանի կեանքին։
Բարձրացիր- Բարձրացուր,
Եղբայրական բարեւներով
