Արձագանգ սկաուտական կեանքէն
Նախապատրաստական հանդիպում
Կիրակի՝ 12 Սեպտեմբեր 2021-ին, Շրջանային Սկաուտական խորհուրդի եւ խմբապետին կազմակերպութեամբ, Ֆիքսի «Ա. Մանուկեան» ակումբէն ներս կատարուեցաւ Աթէնքի եւ Գոքինիոյ խորհուրդներու ու աստիճանաւորական կազմերուն առաջին հանդիպումը, որուն ընթացքին մասնակիցները պատրաստեցին 2021-2022 տարեշրջանի տարեկան յայտագիրը: Սոյն հանդիպումին, որոշուեցաւ երկու մասնաճիւղերու բացումներէն զատ, կատարել նաեւ միջ-մասնաճիւղային միօրեայ արշաւ մը:
Միջմասնաճիւղային միօրեայ արշաւ
Կիրակի՝ 19 Սեպտեմբեր 2021-ին, Այիոս Անտրէայի յունական սկաուտական բանակավայրին մէջ, տեղի ունեցաւ տարեկան առաջին միջմասնաճիւղային միօրեայ արշաւը, որուն մասնակցեցան 110 քոյրեր եւ եղբայրներ:
Արշաւին նպատակն էր՝ երկու տարուան կանոնաւոր հաւաքոյթներէ եւ արշաւներէ զրկուելէն ետք, ինչպէս նաեւ երկու տարուան ամառնային բանակումներու չեղարկումներէն ետք, քոյրերուն եւ եղբայրներուն մէջ վերակենդանացնել սկաուտական ոգին, ուրախ ժամանց ունենալ եւ սկաուտական գիտելիքները վերյիշել:
Արշաւը սկսաւ դրօշակի արարողութեամբ: Շրջանային խմբապետ եղբ. Օննիկ Աւագեան բարի գալուստ մաղթելէ ետք, կոճղի մը վրայ կացին մը գամելով, 2021-2022 սկաուտական տարեշրջանի բացումը յայտարարեց: Ապա, խմբակները իրենց պատասխանատու աստիճանաւորներուն հետ, կատարեցին իրենց յայտագիրը:
Երկու մասնաճիւղերու խորհուրդներու անդամները, վոհմակի (գայլիկ-արծուիկ) բոլոր քոյրեր- եղբայրներուն յանձնեցին կաւէ ծաղկամաններ եւ իրենք, պատասխանատու աստիճանաւորներուն օգնութեամբ, գունաւորելով եւ հող լեցնելով, ցանեցին մէկական բոյս: Այս գործունէութեամբ, փոքրիկները առիթը ունեցան սորվելու բոյսերու հոգատարութեան մասին:
Խումբի պատասխանատու աստիճանաւորական կազմը, պատրաստած էր խաղեր, որոնց ընթացքին քոյրերը եւ եղբայրները ստացան զանազան սկաուտական գիտելիքներ:
Փաղանքի անդամնրը, իրենց խմբապետներուն հսկողութեամբ, վրան լարեցին եւ փայտէ շինութիւններ պատրաստեցին:
Արշաւը աւարտեցաւ դրօշակի արարողութեամբ եւ փոքրիկները լաւ տպաւորութիւններով ունենալով վերադարձան տուն:
Մասնաճիւղերու գործունէութեան բացում
Շաբաթ՝ 18 Սեպտեմբերին եւ Շաբաթ 25 Սեպտեմբերին, Աթէնքի եւ Գոքինիոյ սկաուտական մասնաճիւղերը կատարեցին իրենց պաշտօնական տարեշրջանի բացումը:
Արարողութիւններուն ներկայ էին Աթէնքի եւ Գոքինիոյ հոգեւոր հովիւները, Հ.Մ.Ը.Մ.-ի Շրջանային եւ տեղւոյն վարչութիւններու անդամներ, Շրջանային եւ տեղւոյն խորհուրդնրու անդամներ եւ Շրջանային խմբապետը:
Դրօշակի արարողութենէն ետք, հոգեւոր հայրերը աղօթքի եւ ջրօրհներքի արարողութեամբ օրհնեցին մասնաճիւղերը եւ անոնց բոլոր անդամները:Շրջանային վարչութեան ներկայացուցիչները բարի վերամուտ մաղթելէ ետք, սրտի խոր կսկիծով, քոյրերուն եւ եղբայրներուն ծանուցեցին Հ.Մ.Ը.Մ.-ի Կեդրոնական վարչութեան անդամ եղբ. Արմանտօ Թորգոմեանի կանխահաս մահը եւ կարդացին իր յիշատակելի կենսագրութիւնը:
Բացումի ընթացքին կատարուեցան նաեւ փոխանցման, խոստման, երդման արարողութիւններ ու վոհմակի միաստղի տուչութիւն:
Գոքինիոյ մասնաճիւղի աստիճանաւորական կազմի քոյրեր Մարլէն Տէր Ղազարեան, Աղաւնի Յարութիւնեան եւ Տիանա Պօղոսեան ստացան փաղանքի բարձր աստիճանի հաստատագիրը՝ ծառայութեան յատուկ փաստաթուղթը: Ապա, բոլոր քոյրեր եւ եղբայրները անցան իրենց շաբաթական հաւաքոյթի յայտագիրին:
Հոգեհանգստեան արարողութիւն
Կիրակի՝ 3 Հոկտեմբեր 2021-ին, Գոքինիոյ «Ս. Յակոբ» եկեղեցւոյ մէջ, Հ.Մ.Ը.Մ.-ի Յունաստանի Շրջանային վարչութիւնը կատարեց հոգեհանգստեան պաշտօն Հ.Մ.Ը.Մ.-ի կեդրոնական վարչութեան անդամ եղբ. Արմանտօ Թորգոմեանի մահուան քառասունքին, ինչպէս նաեւ Հ.Մ.Ը.Մ.-ի Կեդրոնական վարչութեան նախկին ատենապետ եղբ. Գառնիկ Մկրտիչեանի յիշատակին: Հոգեհանգիստի արարողութեան ներկայ եղաւ Աթէնքի եւ Գոգինիոյ սկաուտական մասնաճիւղերու տարազաւոր տասնանդամ պատուիրակութիւն մը:
Արտաքին գործունէութիւն
2-3 Հոկտեմբեր 2021-ին, Աթէնքի մասնաճիւղի քոյրեր եւ եղբայրները, Նէա Զմիռնիի հրապարակին վրայ կատարեցին գործածուած գիրքերու պազար: Աստիճանաւորական կազմը, փաղանքի անդամներուն հետ, պատրաստած էին փայտէ շինութիւն մը, որուն վրայ զետեղեցին վաճարելիք գիրքերը: Պազարը ընթացաւ մեծ յաջողութեամբ:
Յունաստանի Սկաուտական խնամակալութեան (Σ.Ε.Π.) փափաքին հետեւելով, Շաբաթ՝ 2 եւ 9 Հոկտեմբերին, Գոքինիոյ սկաուտական մասնաճիւղի ակումբին մէջ դպրոցական գոյքերու հաւաք կատարուեցաւ, որոնք բաժնուեցան այն փոքրիկներուն, որ տուժած էին անեալ ամառ պատահած հրդեհներէն:
Կիրակի՝ 17 Հոկտեմբեր 2021-ին, Աթէնքի սկաուտական խումբի կազմակերպութեամբ, տեղի ունեցաւ սկաուտական «Open day», Նէա Զմիռիի պուրակէն ներս: Ելոյթին հրաւիրուած էին բոլոր հայ 11-15 տարեկան պատանիները, ծանօթանալու համար սկաուտական կեանքին: Օրուան յայտագիրը ստանցնած էին խումբի պատասխանատու խմբապետները, որոնք զանազան սկաուտական խաղերով զբաղեցուցին պատանիները:
1936-ի ողիմպիական խաղերուն Հ.Մ.Ը.Մ.-ի երկու հայրենակիցներու մասնակցութենէն ետք, Յունաստանի Հ.Մ.Ը.Մ.-ը ձեռք բերած էր ողիմպիական առաջին ջահը: Կիրակի՝ 31 Հոկտեմբեր 2021-ի առաւօտեան, Աթէնքի մասնաճիւղէն սկաուտական ջոկատ մը դրօշակներով մասնակցեցաւ ջահին յանձնումին Մարաթոնի վազքի թանգարանին, ծանօթացնելով այսպէս Հ.Մ.Ը.Մ.-ը յոյն եւ օտար այցելուներուն:
Արցախեան 44-օրեայ պատերազմի տարելից
Շաբաթ՝ 23 Հոկտեմբեր 2021-ին, Հ.Յ.Դ.-ի Յունաստանի Հայ դատի յանձնախումբի կազմակերպութեամբ, Նէա Զմիռնիի Հայոց ցեղասպանութեան յուշարձանին առջեւ, Արցախեան 44-օրեայ պատերազմի առաջին տարելիցին առիթով, կատարուեցաւ զոհուած հերոսներու յիշատակին նուիրուած հոգեհանգստեան արարողութիւն, որուն պաշտօնապէս ներկայ եղան տարազաւոր քոյրեր եւ եղբայրներ, Շրջանային խմբապետ եղբ. Օննիկ Աւագեանի գլխաւորութեամբ:
28 Հոկտեմբերի տողանցք
Հինգշաբթի՝ 28 Հոկտեմբեր 2021-ին, երկու տարուայ տողանցքներու չեղարկումէն ետք, այս տարի երկու մասնաճիւղերը, Նէա Զմիրնիի եւ Նիքէայի քաղաքապետերու հրաւերներուն ընդառաջելով, կարողացան իրենց մասնակցութիւնը բերել Յունաստանի ազգային տօնին առիթով կազմակերպուած քաղաքապետական տողանցքներուն: Դժբախտաբար, համաճարակին պատճառով, ըստ պետական ուղղութիւններուն, տողանցքը կատարուեցաւ սահմանաբակ թիւի մասնակցութեամբ: Աւարտին տեղի ունեցաւ հաւաք ակումբներէն ներս, ուր ներկայ էին նաեւ հոգեւոր հայրերը ու Շրջանային վարչութեան ներկայացուցիչները, որոնք ուղեցին իրենց խօսքը:
ՎԻԳԷՆ ՄԻՆԱՍԵԱՆ
