Փրոքոփիս Փաւլոբուլոս. «Մենք կը ճանչնանք եւ նեցուկ կը
կանգնինք Հայաստանի արդար իրաւունքներուն Լեռնային
Ղարաբաղի մէջ, հիմնուած միջազգային իրաւունքին վրայ»
Երեքշաբթի՝ 5 Նոյեմբեր 2019ի առաւօտուն, Հայաստանի Հանրապետութեան նախագահ Արմէն Սարգսեանի պաշտօնական հրաւէրով, Երեւան ժամանեցին Յունաստանի հանրապետութեան նախագահ Փրոքոփիս Փաւլոբուլոս եւ իր տիկինը, պատուիրակութեան ուղեկցութեամբ։ Օդակայանին մէջ յոյն նախագահը դիմաւորուեցաւ Շրջակայ միջավայրի նախագահ Էրիկ Գրիգորեանի կողմէ։
Ժամանումէն անմիջապէս ետք, Յունաստանի նախագահը եւ իր պատուիրակութիւնը ուղղուեցան դէպի Ծիծեռնակաբերդ՝ յարգանքի տուրք մատուցելու համար Հայոց ցեղասպանութեան զոհերու յիշատակին։ Նախագահին կ՚ուղեկցէին նախարար Էրիկ Գրիգորեան եւ Երեւանի քաղաքապետի տեղակալ Հայկ Սարգսեան։
Հայոց ցեղասպանութեան յուշահամալիրին առջեւ, նախագահ Փաւլոբուլոս դիմաւորուեցաւ զինուորական ջոկատի եւ նուագախումբին կողմէ, ապա ծաղկեպսակ զետեղեց եւ խոնարհեցաւ մէկ ու կէս միլիոն նահատակներու յիշատակին։ Յաջորդաբար, Հայոց ցեղասպանութեան թանգարանի տնօրէն Յարութիւն Մարութեան նախագահին ներկայացուց յուշահամալիրի ստեղծման պատմութիւնը։ Նախագահը շրջեցաւ թանգարանէն ներս եւ գրառում կատարեց յուշամատեանին մէջ։ Այնուհետեւ, յոյն նախագահը խորհրդանշական եղեւին մը տնկեց։ https://www.youtube.com/watch?v=hng2KnJy930
Պաշտօնական ընդունելութիւն
նախագահ Արմէն Սարգսեանի կողմէ
Յաջորդաբար, նախագահ Փրոքոփիս Փաւլոբուլոսին պաշտօնապէս դիմաւորեց Հայաստանի Հանրապետութեան նախագահ Արմէն Սարգսեան նախագահական ապարանքին մէջ։ Զինուորական ջոկատի կատարած պատիւով եւ երկու երկիրներու ազգային ոգերգներու հնչումէն ետք, երկու նախագահներուն առջեւ կատարուեցաւ հանդիսաւոր տողանցք։ Ապա, տեղի ունեցաւ նախագահներ Փաւլոբուլոսի եւ Սարգսեանի պաշտօնական հանդիպումը, որուն ընթացքին քննուեցան երկու երկիրներու սերտ յարաբերութիւնները եւ գործակցութեան խորացման հնարաւորութիւնները։ Հանդիպումէն անմիջապէս ետք, երկու նախագահները մամլոյ ներկայացուցիչներուն առջեւ կատարեցին պաշտօնական յայտարարութիւններ։
Հայաստանի նախագահը ողջունելով իր յոյն պաշտօնակիցը յայտնեց.- «Ուրախ եմ ձեզ տեսնել Երեւանում, եւ յոյս ունեմ, որ կը տեսնեմ ապագայում կրկին, ոչ միայն պաշտօնական, այլեւ աշխատանքային այցերով: Մեր հանդիպումն այսօր անցաւ շատ ջերմ, բարեկամական մթնոլորտում, երկու բազմադարեայ բարեկամ ժողովուրդների եւ նաեւ երկու շատ գործնական եւ իրենց պետութեանը ծառայող մարդկանց աշխատանքային մթնոլորտում: Շատ բովանդակալից քննարկումներ ունեցանք լայն շրջանակով խնդիրների վերաբերեալ: Պայմանաւորուեցինք, որ պէտք է ջանքեր ներդնենք, որ հայկական եւ յունական մեծ սփիւռքները, որոնք տարածուած են ամբողջ աշխարհով, համագործակցեն եւ ծառայեն մեր երկու պետութիւնների եւ ազգերի շահերին»։
Նախագահ Սարգսեան նշեց, որ զրոյցի ընթացքին անդրադարձ եղաւ նաեւ երկու երկիրներու պատմութեան.- «Չէինք կարող չխօսել մեր պատմութեան մասին: Երկու ժողովուրդներ, որոնք ոչ միայն ընդհանուր պատմութիւն, ընդհանուր մշակոյթ ունեն, նաեւ ընդհանուր մօտեցումներ ունեն: Մեր բարեկամութիւնը հազարամեակների պատմութիւն ունի: Մօտ 100 տարի առաջ հայերն անցել են Մեծ Եղեռնի օրհասական ճանապարհով, Պոնտոսի յոյները եւս նմանատիպ ցեղասպանութեան ճանապարհ են անցել, եւ երկու ազգերը վերականգնել են իրենց, որպէս փոքր, բայց գլոբալ պետութիւններ», նշեց Արմէն Սարգսեան:
Յունաստանի նախագահը իր խօսքը ուղղելով Հ.Հ. նախագահ Արմէն Սարգսեանին յայտնեց.- «Սիրելի բարեկամ Արմէն, Յունաստանի եւ Հայաստանի երկկողմանի կապերը կը գտնուին բացառիկ մակարդակի մը վրայ, կը հասնին ժամանակի խորերը եւ խարսխուած են հաստատ բարեկամութեան, իրար հասկացողութեան եւ շինիչ գործակցութեան վրայ։ Չեմ զլանար յայտնել, որ այս ուղղութեամբ իրենց կարեւորագոյն դերը ունեցած են մեր երկու համայնքները, մասնաւորապէս՝ հայկական համայնքը Յունաստանի մէջ եւ յունական համայնքը Հայաստանի մէջ»։
Փրոքոփիս Փաւլոբուլոս անդրադառնալով Հայոց ցեղասպանութեան անժխտելի իրողութեան յայտնեց։ «Մենք, 1996ին խորհրդարանի մակարդակով ճանչցանք Հայոց ցեղասպանութիւնը, սահմանեցինք Ապրիլի 24ը հայերու ցեղասպանութեան յիշատակի օր եւ 2014ին քրէականացուցինք Հայոց ցեղասպանութեան ժխտումը: Իր կարգին, Հ.Հ. Ազգային ժողովը ճանչցաւ Պոնտոսի յոյներու ցեղասպանութիւնը: Մենք կ՚ողջունենք օրեր առաջ Հայոց ցեղապանութեան ճանաչումը Միացեալ Նահանգներու Ներկայացուցիչներու տան կողմէ։ Ուղերձ կ՚ուղղենք Թուրքիոյ՝ ներողութիւն խնդրելու հայերուն եւ յոյներուն դէմ իր գործած ոճիռներուն համար»։ Նշենք, որ պաշտօնական յայտարութիւններուն ընթացքին, նախագահ Փաւլոփուլոս յայտնեց Յունաստանի զօրակցութիւնը Լեռնային Ղարաբաղի հարցի կարգաւորման համար, իսկ յոյն նախագահի պաշտօնական կայքէջին վրայ երեւցող «Արմենփրես»ին կատարած յայտարարութեան մէջ կը նշուի՝ «Մենք կը ճանչնանք եւ նեցուկ կը կանգնինք Հայաստանի արդար իրաւունքներուն Լեռնային Ղարաբաղի մէջ, հիմնուած միջազգային իրաւունքին վրայ։ Այսպէս, Յունաստան նեցուկ կը կանգնի Ե.Ա.Հ.Կ.ի Մինսքի խումբի ջանքերուն՝ հիմնահարցի խաղաղ կարգաւորման համար»։
Նոյն գիշեր, նախագահ Արմէն Սարգսեան պաշտօնական ընթրիք սարքեց ի պատիւ նախագահ Փաւլոբուլոսին եւ իր գլխաւորած պատուիրակութեան, որուն ընթացքին երկու նախագահները պաշտօնական բաժակաճառերով հանդէս եկան, ընդգծելով երկու երկիրներու ամուր բարեկամութեան եւ գործակցութեան կապերը։