«Համազգային»ի պարախումբի վարչութիւնը երկար տարիներէ ի վեր իր տարազները ապահով, անվնաս եւ խնամուած վայրի մէջ պահելու շարք մը խնդիրներ դիմագրաւած է։ Յունաստանի Հայ Կապոյտ Խաչը տրամադրած էր յարկաբաժին մը Փ. Ֆալիրօ շրջանին մէջ, եւ որոշ ժամանակ տարազները այնտեղ տեղակայուեցան։
Արդէն տարիէ մը աւելի, պարի միաւորի վարչական անդամները աշխատանք կը տանէին Գոքինիոյ «Ս. Յակոբ» եկեղեցւոյ թաղականութեան տրամադրած սենեակը մաքրելու, նորոգելու, ներկելու եւ կահաւորելու համար։ Աւարտելով, անոնք փոխադրեցին տարազները՝ խնամքով զետեղելով պահարաներու մէջ. սենեակը կը գտնուի եկեղեցւոյ բակին կից շէնքի յարկին վրայ։
Ընթացքի մէջ է նաեւ տարազներու վերականգնումի, նորոգումի, ինչպէս նաեւ նոր տարազներ կարելու ձեռնարկումները եւ աշխատանքները։
«Համազգային»ի Շրջանային վարչութեան կողմէ մեր ջերմ շնորհակալութիւնները կը յայտնենք Յունաստանի Հայ Կապոյտ Խաչի Շրջ. վարչութեան եւ «Ս. Յակոբ» եկեղեցւոյ թաղականութեան։
«Համազգային»ի Յունաստանի Շրջանային վարչութիւն
