Հայաստանի մէջ տեղի ունեցած Հ.Յ.Դ. Բիւրոյի լիագումար նիստէն ետք, 17 Յուլիսին, գումարուած է Հ.Յ.Դ. Բիւրոյի եւ Հ.Յ.Դ. Հայաստանի Գերագոյն Մարմինի միացեալ ընդլայնուած նիստ, որուն մասնակցած են Հայաստանի մէջ Դաշնակցութեան Մարզային Կոմիտէներու ներկայացուցիչներ, Հայաստանի Ազգային ժողովի Հ.Յ.Դ. խմբակցութեան պատգամաւորներ, ինչպէս նաեւ Հայաստանի գործադիր իշխանութեան Դաշնակցութեան բարձրաստիճան պաշտօնատարներ: Հրապարակուած է հետեւեալ միացեալ յայտարարութիւնը.
«Քննելով Հայաստանի Հանրապետութեան ներքին եւ արտաքին քաղաքական, տնտեսական, ընկերային իրավիճակը, երկրի ռազմավարական զարգացման առաջնահերթութիւնները եւ այդ ուղղութիւններով կուսակցութեան կատարած աշխատանքներն ու անելիքները, ինչպէս նաեւ՝ հաւատարիմ մեր նախընտրական խոստմանը, այն է` պարբերաբար հանդէս գալ կատարուած եւ առաջիկայ աշխատանքների հանրային հաշուետուութեամբ, Հ.Յ.Դ. Հայաստանի Գերագոյն Մարմինը կատարում է հետեւեալ հաստատումները.
«– Հայաստանի Հանրապետութիւնը թեւակոխել է զարգացման որակապէս նոր փուլ: Սահմանադրութեան բարեփոխումներից բխող օրէնսդրական եւ պետական կառավարման համակարգի փոփոխութիւնները նոր հնարաւորութիւններ են բացում պետութեան ու հասարակութեան զարգացման, ժամանակակից ժողովրդավարական պետութեան կառուցման համար:
«– Հայաստանի Հանրապետութիւնը շարունակում է դիմակայել արտաքին քաղաքական մարտահրաւէրներ, որոնք ստիպում են անցում կատարել առաջանցիկ զարգացման քաղաքականութեան: Առաջնահերթ է դառնում մեր երկրի զարգացման ռազմավարական տեսլականի մշակումը եւ դրանից բխող ծրագրերի իրագործումը:
«– Հայաստանի եւ Արցախի Հանրապետութիւնների անվտանգութեան հիմնախնդիրը շարունակում է հիմնական օրակարգ մնալ եւ էապէս պայմանաւորում է թէ՛ առկայ իրավիճակը, թէ՛ զարգացման ռազմավարական ծրագրերի առաջնահերթութիւնները:
«– Խորհրդարանական ընտրութիւններից յետոյ ձեւաւորուած Հայաստանի Հանրապետութեան կառավարութեան ներկայացրած գործունէութեան ծրագիրը բխում է քաղաքական համախմբական դաշինքի յուշագրով ամրագրուած սկզբունքներից ու առաջնահերթութիւններից եւ ներառում է Հ.Յ.Դ. քաղաքական ուղեգծի սկզբունքային հաստատումները:
«Մասնաւորապէս.
«– Կարեւորւում է սահմանադրական բարեփոխումներով սկսուած համակարգային եւ որակական փոփոխութիւնները խորացնելու եւ անշրջելի դարձնելու անհրաժեշտութիւնը,
«– Առաջնահերթ է համարւում հասարակութեան մէջ պետութեան եւ ապագայի հանդէպ վստահութեան ու լաւատեսութեան հիմքերի ստեղծման նպատակով նոր որակի իշխանութեան ձեւաւորումը,
«– Կատարւում են համապատասխան անհրաժեշտ քայլերն` ամբողջացնելու մարդու արժանապատուութեան անխախտելիութեան ու իրաւունքի գերակայութեան սկզբունքների լիարժէք իրացումը երաշխաւորող մարդու իրաւունքների ու ազատութիւնների ապահովման համակարգը,
«– Լուրջ քայլեր են իրականացւում ապահովելու իշխանութեան բոլոր մարմինների թափանցիկ, հաշուետու եւ արդիւնաւէտ աշխատանքը` ձեւաւորելով սահմանադրական նոր կարգից բխող ներ-իշխանական յարաբերութիւններ,
«– Նոր թափ է հաղորդւում հակափտածութիւն պայքարին, հակափտածութիւն քաղաքականութիւնը աշխուժացնելու եւ հաստատութենական դարձնելու հիմք է ստեղծուած,
«– Ամբողջացւում է «ազգ-բանակ» հայեցակարգը` յատուկ ուշադրութիւն դարձնելով հայրենական գիտական եւ արհեստագիտական մտքի վրայ հիմնուած ռազմարդիւնաբերական համալիրի ձեւաւորմանը,
«– Աստիճանաբար ձեւաւորւում է կայուն զարգացում ապահովող ընկերային-շուկայական տնտեսական համակարգ, վերանայւում է իրականացուող ընկերային քաղաքականութիւնը, որակապէս նոր մակարդակի է բարձրացուել տարբեր ոլորտներում պետութիւն-մասնաւոր հատուած համագործակցութիւնը, աճել են արտահանման կշռոյթները, փորձ է արւում ներմուծուող ապրանքների մի մասը փոխարինել տեղական արտադրութեամբ, ստուերի դէմ արդիւնաւէտ պայքարի արդիւնքում աւելացել են պիւտճէի հաւաքագրումները, էապէս բարելաւուել են հարկային եւ մաքսային մարմինների աշխատանքը, թեթեւ արդիւնաբերութեան, արդիւնաւէտ գիւղատնտեսութեան, զբօսաշրջութեան խթանման մեխանիզմներ (աշխատակարգեր) են ստեղծւում, կան նոր եւ լուրջ ներդրումների ծրագրումներ` այդ թւում մարզերի մակարդակում,
«– Էականօրէն փոխուել է Հայաստանի Հանրապետութեան կառավարութեան աշխատանքի որակը, հանրութեան մէջ ձեւաւորւում են վիճակի փոփոխութեան դրական սպասումներ, որոնք կարող են առարկայանալ հետեւողական եւ սկզբունքային աշխատանքով,
«– Կառավարութիւնը երկրի զարգացման իր տեսլականը պատկերում է` ըստ էութեան որդեգրելով Հ.Յ.Դաշնակցութեան կողմից բազմիցս յիշատակուած «զարգանալ` չզիջելով» դժուարին, սակայն արժանապատիւ սկզբունքը: Կառավարութեան այս ծրագիրը կառուցուած է այն գաղափարախօսութեան վրայ, ըստ որի` չնայած նրան, որ Հայաստանը դիմակայում է անվտանգութեան լրջագոյն սպառնալիքների եւ մարտահրաւէրների, երկիրը պարտաւոր է եւ կարող է զարգանալ առանց զիջելու մեր ազգային ռազմավարական շահերը: Կառավարութիւնը փաստացի ստանձնում է հէնց այսպիսի յանձնառութիւն եւ յայտ է ներկայացնում ապացուցել, առանց մեր սերունդների ձեռք բերածը կորցնելու, երկրի առաջանցիկ զարգացումը ապահովող հայեցակարգի կենսունակութիւնը,
«– Լուրջ նախադրեալներ են ստեղծուել Հայաստան-սփիւռք համատեղ ներուժի արդիւնաւէտ օգտագործման իրական մեխանիզմներ ստեղծելու առումով,
«– Կառավարութիւնը, քաջ գիտակցելով երկրի դէպի ծով ելք չունենալու, շրջափակման մէջ լինելու ծանրագոյն պայմանները, յանձնառութիւն է ստանձնում երաշխաւորել Հայաստանի եւ Արցախի միասնական անվտանգութիւնը, անհրաժեշտ թափ հաղորդել մեր երկրի զարգացմանը` ձեւաւորելով դրա համար բաւարար արտաքին եւ ներքին պաշար:
«Քննելով կատարուած աշխատանքների արդիւնքները` Հ.Յ.Դ. Բիւրոյի եւ Գերագոյն Մարմնի համատեղ նիստն արձանագրում է, որ քաղաքական համախմբական դաշինքի մէջ Հ.Յ.Դ. մասնակցութիւնը դրական արդիւնքներ է արձանագրել եւ կարեւոր նշանակութիւն ունի երկրում համակարգային եւ խորքային համալիր բարեփոխումներ իրականացնելու համար:
«Անդրադառնալով առաջիկայ անելիքներին` Հ.Յ.Դ. Բիւրոյի եւ Գերագոյն Մարմնի համատեղ նիստն արձանագրում է.
«– Մեզ համար առաջնահերթ են Հայաստանի ու Արցախի Հանրապետութիւնների անվտանգութիւնը, բոլոր ուղղութիւններով կայուն զարգացումը եւ երկրում ընկերային արդարութիւնը: Մեր համոզումն է, որ այս փոխ-կապակցուած եւ փոխ-լրացնող ռազմավարական ուղղութիւնները «- անվտանգութիւն, արդարութիւն, զարգացում — ապահովելու են մեր երկրի ու հասարակութեան բնականոն զարգացումը, Հայաստանի ու հայութեան արժանապատիւ տեղն ու դերը ազգերի ընտանիքում:
«– Համախմբական դաշինքի մէջ Հ.Յ.Դ. մասնակցութիւնը կարեւոր նշանակութիւն ունի՝ համակարգային եւ խորքային համալիր բարեփոխումներ իրականացնելու եւ վերոնշեալ ռազմավարական ուղղութիւններով երկրի զարգացման համար:
«– Մեր արտաքին պաշարը հմուտ դիւանագիտութիւն իրականացնելու, սփիւռքի մեր ներուժը զօրաշարժի բերելու միջոցով՝ բազմակողմանի քաղաքական եւ տնտեսական կապերն ամրապնդելու, դաշնակից ու բարեկամ երկրների շրջանակը հետեւողականօրէն ընդլայնելու մէջ է:
«Ներքին պաշարը բազմապատկելու գրաւականը հայ մարդու իրաւունքների եւ ազատութիւնների երաշխաւորումն է, ներազգային համերաշխութեան ու արդարութեան ապահովումը:
«Դրան հասնելու համար բարենպաստ միջավայր ձեւաւորելուն են կոչուած ծրագրային այնպիսի առաջնահերթութիւններ, ինչպիսիք են`
«– Սահմանել արդիւնաւէտ կառավարման չափորոշիչներին համապատասխանող կառավարութեան նոր կառուցուածք եւ գործունէութեան կարգ,
«– Կառավարման խորհրդարանական ձեւին անցնելու այս փուլում, Հայաստանի Հանրապետութեան սահմանադրութեանը համահունչ եւ միջազգային լաւագոյն փորձի հաշուառմամբ, ձեւաւորել համապատասխան օրէնսդրութիւն,
«– Հետեւողական լինել հակափտածութիւն պայքարի հաստատութենականացման փուլում դրա թափանցիկութիւնը, վստահելիութիւնն ապահովող մեխանիզմների որդեգրման հարցում,
«– Դատական իշխանութեան բարեփոխումների հետ են կապուած մարդու իրաւունքների պաշտպանութիւնը եւ արդարութեան հաստատումը: Դրա հիմնաքարը դրուելու է դատական օրէնսգիրք ընդունելով եւ դրան համապատասխան բարձրագոյն դատական խորհուրդ ձեւաւորելով,
«– Շարունակել ընտրական համակարգի բարեփոխումները` նկատի ունենալով մեր հասարակութեան եւ միջազգալին դիտորդական առաքելութիւնների դիտողութիւնները, առաջարկները,
«– Միջազգային խորհրդարանական համակարգերի առաջադէմ փորձի տեղայնացումը` ապահովելով պետական կառավարման, տարածքային եւ տեղական ինքնակառավարման արդիականացումն ու արդիւնաւէտութիւնը, մասնաւորապէս կառավարութիւն-վարչապետ-նախարար սահմանադրութեամբ նախատեսուած կարգավիճակներին համապատասխան լիազօրութիւնների եւ պարտականութիւնների պատշաճ օրէնսդրական կարգաւորումը,
«– Խոշորացուած համայնքներում համայնքի ղեկավարի անուղղակի ընտրութեան մոտելի (բնօրինակի) եւ համայնքների աւագանիների համամասնական ընտրական համակարգի ներդրումը,
«– Հասարակութեան լայն վստահութիւնը վայելող փտածութեան դէմ պայքարի անկախ հաստատութենական համակարգի հիմնումը, ինչի համար անհրաժեշտ օրէնսդրական կարգաւորումներն արդէն կատարուած են,
«– Բարձր որակաւորում ունեցող, մրցունակ, արժանավայել ու վստահելի մարդկային դրամագլուխ ձեւաւորելուն կոչուած արդար ու թափանցիկ քատրային քաղաքականութիւնը,
«– Հայաստանի, Արցախի եւ սփիւռքի` որպէս մէկ միասնական հայութեան ամբողջացում, հայութեան ճակատագրում բոլոր հայերի մասնակցութիւնն ապահովող համապատասխան իրաւաքաղաքական միջավայրի ստեղծումը,
«– «Ազգ-բանակ» հայեցակարգի ամբողջականացման հիմքում հակառակորդին խաղաղութիւն պարտադրելու մօտեցումը որդեգրելը, Արցախի հարցում ամբողջական ներուժի համախմբմամբ քաղաքական ամբողջ դաշտի փոխ-համաձայնութեան ապահովումը»:
Հ.Յ.Դ. ՀԱՅԱՍՏԱՆԻ ԳԵՐԱԳՈՅՆ ՄԱՐՄԻՆ
17 Յուլիսի 2017
