Կիրակի՝ 19 Մարտ 2017ին, «Տէր Զաքարեան» սրահէն ներս տեղի ունեցաւ մշակութային հաւաք՝ կազմակերպութեամբ Թեսաղոնիկէի Համազգայինի «Ղազարոս Սարեան» մասնաճիւղին:
Ինչպէս ամիսներ առաջ յայտարարուած էր վիճակահանութեան մասին, ժամանակը հասած էր կատարելու սոյն վիճակահանութիւնը: Վիճակահանութիւնը կ՛ընդգրկէր երկու տոմս դէպի Հայաստան եւ վեցօրեայ պանդոկի ապահովութիւն:
Ձեռնարկի բացման խօսքը կատարեց Թեսաղոնիկէի Ս. Աստուածածին եկեղեցւոյ հոգեւոր հովիւ Սմբատ Վրդ. Սապունճեան, որ նաեւ Համազգայինի «Ղազարոս Սարեան» մասնաճիւղի ատենադպիրն է:
Հայր Սուրբը ըսաւ.- «Համազգայինը՝ ըլլալով համաշխարհային միութիւն մը, իր առաքելութեան մէջ կը մնայ կանգուն, Հայ մշակոյթի բարգաւաճումը որպէս նպատակ ունենալով՝ վարչութիւնս միշտ կը փորձէ տալ այն, ինչ որ պէտք է մեր համայնքին որպէս մշակոյթ, եւ այսօր ահաւասիկ հաւաքուած ենք իրարու հետ վայելելու հայ մշակոյթի բարիքները:
Այսօրուան կատարուելիք վիճակահանութիւնը լոկ խաղարկութիւն մը չէ, որովհետեւ անոր արդիւնքը պիտի ծառայէ անձի մը ուրախութեան, եւ հայրենիքին կարօտն ու երազը ունեցող հոգիի մը իրականացման:
Այսօրուան համար նաեւ յայտարարած էինք անակնկալ ձեռնարկ մը. «Ղազարոս Սարեան» մասնաճիւղի «Մասիս» պարախումբը նոր պարազգեստներով պիտի ներկայացնէ հայկական պարեր. Հայաստանէն եկած նոր զգեստները նոր շունչ ու նոր ոգի կու տան պարախումբին:
Որպէս Միութիւն, եսասիրութիւնը մէկդի թողած, կը խոստնանք ըլլալ հաւատարիմ հայ մշակոյթին եւ լաւագոյնը կատարել ու ներկայացնել ձեր բոլորին»:
Ապա՝ վարչութեանս ատենապետուհի տիկին Տիրուհի Ղալիլէա-Գալֆայեան յունարէնով իր սրտի խօսքը արտայատեց, նկատի ունենալով յոյն հասարակութեան մասնակիցները սոյն ձեռնարկին, որմէ ետք «Մասիս» պարախումբը ներկայացուց հայկական պարի գեղեցիկ ելոյթ մը, որուն ընթացքին նաեւ երգեց Մարիա Սբիրիտոնիտուն:
Պարախումբի ներկայացումէն ետք տեղի ունեցաւ վիճակահանութիւնը, մեծ խանդավառութենէ մը ետք յայտարաուեցաւ վիճակահանութեան շահող թիւը՝ 455, Աթէնքէն:
Բարի վայելում կը մաղթենք շահողին, եւ որպէս վարչութիւն կը խոստանանք աւելին կատարել եւ մեր համայնքի զաւակները պահել միշտ ուրախ հայ մշակոյթով լիցքաւորուած:
Ս.Ս.
