«Հայ Օգնութեան Միութիւն» բարեգործական-հասարակական կազմակերպութիւնը, Հայաստանի նախագահի աշխատակազմին կողմէ յատկացուող դրամաշնորհի եւ Հայաստանի Երիտասարդական Հիմնադրամի յայտարարած մրցոյթի ծիրէն ներս, այցելած է Արցախի զօրամասերէն մէկը։
«Մենք ուժեղ ենք, երբ միասին ենք» խորագիրով ծրագիրը մեկնարկեց Քարվաճառի այն տարածքին մէջ, ուր զոհուած էր Շուշիի գումարտակի փոխ-հրամանատար Պետրոս Ղեւոնդեանը` Պետօ: Այստեղ ծրագիրի մասնակիցները ծաղիկներ խոնարհեցին Պետոյի յիշատակին կառուցուած յուշաքարին:
Յաջորդ կանգառը Արցախի սահմանային զօրամասն էր: Այստեղ հայրենիքի համար նահատակուած ազատամարտիկ Վահէ Բաղդասարեանի անունը կրող պահակակէտներուն մէջ բացուեցան Վահէի յիշատակը յաւերժացնող յուշատախտակներ, զինծառայողներուն եւ ներկաներուն բաժանուեցան Վահէ Բաղդասարեանի մասին պատմող թերթիկներ:
Հ.Օ.Մ.ի Հայաստանի շրջանային վարչութեան ատենապետուհի Դիանա Յովսէփեան նշեց, որ իւրաքանչիւր զոհուածի յիշատակը մեզի համար սուրբ է, եւ մենք երբեք իրաւունք չունինք մոռնալու, որ մեր կողքին ապրած են լուռ, անխօս հերոսներ: Ծրագիրի ծիրէն ներս բացուեցաւ նաեւ լուսանկարիչ Յակոբ Պօղոսեանի «25 տարի անց» խորագիրով լուսանկարներու ցուցահանդէսը: Լուսանկարները կը պատմէին 1992-93 թուականներու Արցախեան եւ 2016ի Ապրիլեան քառօրեայ պատերազմներու ու ատոնց մասնակից հերոսներու մասին:
