Վերջերս, մահացաւ նախկին յունահայ, արժանթինահայ յայտնի երգահան եւ խմբավար Ժան Ալմուխեան:
Ծնած էր 1932-ին, Յունաստան, 1947-ին ընտանիքով հաստատուած էր Արժանթին: Ուսանած էր Արժանթինի ականաւոր երաժիշտ վարպետներուն մօտ:
1957-ին խումբ մը արուեստասէր ընկերներու հետ հիմնած էր «Հայ երաժշտութեան բարեկամներ» ընկերակցութիւնը եւ անոր «Արաքս» երգչախումբը, որուն հիմնադիրն ու գեղարուեստական խմբավարը եղած էր տասնամեակներ շարունակ: Իր բարձր նուիրումին ու երկաթեայ կարգապահութեան շնորհիւ` «Արաքս»-ը դարձած էր Պուէնոս Այրեսի սիրողական լաւագոյն խումբերէն մին` աւելի քան 350 հայկական, արժանթինեան եւ այլ ժողովուրդներու խմբերգներէ բաղկացած հարուստ երգացանկով: «Արաքս»-ի ճամբով Ժան Ալմուխեանի կատարած մեծ աշխատանքին շնորհիւ կարելի եղած է հայ երաժշտութիւնը իր արժանի բարձունքին վրայ պահել ու տարածել ոչ միայն հայ հասարակութեան, այլ նաեւ տեղացի ժողովուրդին մէջ: Երկար տարիներ Ալմուխեանի ղեկավարած երգչախումբին ճամբով ջամբուող հայապահպանութեան շնորհիւ շատեր հայ մնացած են:
Երաժշտահան Ժան Ալմուխեան ունեցած էր բեղուն գործունէութիւն:
Շրջած էր զանազան երկիրներ, ուր դասախօսութիւններով ներկայացուցած էր
երգչախումբին պատմախօսը, նաեւ երգահանդէսներ տուած էր: «Արաքս» երգչախումբը մեծ ընդունելութիւն գտած էր հանրութեան մէջ
իսկ մաէսթրօ Ժան Ալմուխեան բազմիցս պարգեւատրուած անձնաւորութիւն եշղած էր:
Ան 1972-ին ստացած էր Մեծի Տանն Կիլիկիոյ Խորէն Կաթողիկոսին կողմէ «Ս. Մեսրոպ Մաշտոց» շքանշանը՝ «Բարսեղ Կանաչեան» երգչախումբին համար:
1982-ին Խորէն Վեհափառի ձեռամբ ստացած էր «Կիլիկեան ասպետներ» շքանշանը: Ամենայն հայոց Վազգէն Կաթողիկոսի ձեռամբ ստացած էր «Սահակ Պարթեւ» շքանշանը:
1990-ին Հայաստանի մշակոյթի նախարարութիւնը եւ հայ երգահաններու միութիւնը միասնաբար պարգեւատրած են մաէսթրօն՝ Հայաստանի «Կոմիտաս» մետալով:
2011-ին, Հայաստանի անկախութեան 20-ամեակին առիթով, Սփիւռքի նախարարութիւնը Ժան Ալմուխեանը պարգեւատրած էր «Կոմիտաս» շքանշանով:
2012-ին, անոր ծննդեան 80-ամեակին եւ երաժշտական գործունէութեան 55-ամեակին առիթով, Հայաստանի Սփիւռքի նախարարութեան «Իմ Հայաստան» համահայկական փառատօնի ծիրին մէջ տեղի ունեցած է անոր եւ ծաւալած գործունէութեան մեծարման նուիրուած երեկոյ` Երեւանի «Արամ Խաչատրեան» համերգասրահին մէջ:
Ժան Ալմուխեանի վաստակը գնահատելով` Հայաստանի օրուան սփիւռքի նախարար Հրանուշ Յակոբեան զայն պարգեւատրած է Հայաստանի սփիւռքի նախարարութեան ոսկի մետալով:
18 Մարտ 2014-ին, Հայաստանի անկախութեան 22-րդ տարեդարձին առիթով, Պուէնոս Այրէսի Հայ կեդրոնի «Սիրանոյշ» սրահին մէջ տեղի ունեցած է Ժան Ալմուխեանի մեծարման երեկոն, ուր անոր յանձնուած է Հայաստանի օրուան նախագահ Սերժ Սարգսեանի հրամանագիրը, որով Ժան Ալմուխեան կը պարգեւատրուէր «Մովսէս Խորենացի» մետալով:
Ժան Ալմուխեանը հեղինակած էր մեծ թիւով երաժշտական ստեղծագործութիւններ` երգչախմբային, սենեկային, սիմֆոնիք, դաշնամուրային, մեներգներ, որոնք բազմիցս կատարուած են Արժանթինի, եւ այլ երկիրներու մէջ, ինչպէս` Իտալիա, Պոլիվիա, Զուիցերիա, Ուրուկուէյ եւ այլն:
Ալմուխեան անդամ էր «Սատաիք»-ի (Արժանթինի յօրինողներու ընկերութեան):
Յունաստանի մէջ, Համազգայինի «Յ. Փափազեան» երգչախումբը տասնամեակներ շարունակ երգած է Ժան Ալմուխեանի յօրինած ստեղծագործութիւնները, որոնք միշտ ալ գնահատուած են հասարակութեան կողմէ։
Յիշեցնենք, որ Սեպտեմբեր 2011-ին, Հայաստան իր այցելութեան ճամբուն վրայ, Ժան Ալմուխեան քանի մը օրով մնացած էր Յունաստան։
Այս առիթով, «Ազատ Օր» շահեկան հարցազրոյց մը ունեցած էր մեծահամբաւ արուեստագէտին հետ, ուր ան յիշած էր իր մանկական առաջին տարիները Գոքինիոյ մէջ, յարգանքի տուրք մատուցելով իր ուսուցիչին՝ Օննիկ Զաքարեանին։
