Շաբաթ՝ 7 Հոկտեմբերի 2017ին, բազում տարիներու աւանդութեան համաձայն՝ Թեսաղոնիկէի «Մալաքեան-Գասպարեան» Ծաղկոց դպրոցը իր հիւրընկալ դռները բացաւ իր սաներուն առջեւ։
Եկեղեցւոյ մէջ տեղի ունեցաւ ջրօրհնէքի արարողութիւն՝ ներկայութեամբ գաղութի յարգարժան անձնաւորութեանց, միութիւններու ներկայացուցիչներու՝ յանձինս Ազգային Վարչութեան անդամուհի Վերա Պլէճեանի, Թաղային Խորհրդոյ ատենապետ Արթին Աբրահամեանի, «Համազգային»ի ատենապետուհի Տիրուհի Գալֆայեանի, Հ.Մ.Ը.Մ.ի ատենապետուհի Մարօ Մագսութեանի, Հ. Գթ. Խաչի «ԱՆԻ» Մասնաճիւղի ատենապետուհի Սիրլէի Փափազեանի, Հ. Գթ. Խաչի Շրջանային Վարչութեան ատենապետուհի Նուէր Տէրէյեանի եւ անդամուհիներուն, դպրոցի տնօրէնուհի Զապէլ Գալֆայեանի, վարժուհիներու, Ծնողական Միութեան, ծնողներու եւ աշակերտութեան։
Հոգեշնորհ Հայր Սուրբն իր խօսքին մէջ քաջալերեց բոլոր ծնողներուն զօրավիգ կանգնելու Հ.Օ.Մ.ին եւ վարժուհիներու անձնուէր գործին, քանի որ ազգապահպանման եւ լեզուի պահպանման միջոցաւ անոնք ընտրեցին ծառայել հայրենիքին։
Բոլոր ներկաներուն իր ողջոյնի խօսքը ուղղեց Թաղական Խորհուրդի ատենապետը, իսկ այնուհետեւ իր ուղերձով հանդես եկաւ Հ.Գ.Խ.ի Շրջանային Վարչութեան ատենապետուհին, որ գեղեցիկ եւ յուզական խօսքով ողջունեց բոլորին եւ բարի ուսումնական տարի մաղթեց մեր սաներուն։ Իր ամփոփող եւ յուզական խօսքը ներկաներուն ուղղեց տնօրէնուհին, ինչպես նաեւ՝ կատարեց շարք մը յայտարարութիւններ դպրոցի աշխատանքներուն վերաբերեալ։
Դպրոցին մէջ այնուհետեւ «ԱՆԻ» Մասնաճիւղի անդամուհիները սաներուն ողջունեցին համեղ խորտիկներով եւ հիւթերով։ Դպրոցին մէջ մեծ եռուզեռ կը տիրէր, տնօրէնուհին եւ վարժուհին կը դիմաւորէին նորեկ աշակերտները։ Մեծ ուրախութեամբ արձանագրեցինք 18 առաջին դասարանցիներ՝ այսպիսով մեր դպրոցին թիւը առաւել աճելով 116ի։
Հարկ է նշել եւ անսահման երախտիքի խօսքեր ուղղել Թաղային Խորհուրդին, որ ամբողջովին նորոգած էր դպրոցը, եւ մեր աշակերտները իրենց ուսումնական տարին սկսան մաքուր եւ գեղեցիկ դասասենեակներու մէջ։
Բարի վերամուտ եւ արգասաբեր ուսումնական տարի։
Հ. Գթ. Խաչի Մակեդոնիոյ եւ
Թրակիոյ Շրջանային Վարչութիւն
