Անուշ Ֆենտեան
2017-2018 դպրոցական տարեշրջանի սկիզբը, Հ.Կ.Խ.ի «Զաւարեան» եւ «Լ. եւ Ս. Յակոբեան» վարժարաններու հայ ուսուցչական կազմերուն լիագումար նիստին, որոշուեցաւ Հոկտեմբեր ամսուան մէջ, «Թարգմանչաց օր»ուան առթիւ կազմակերպել հայկական «Մշակոյթի օր» 2017ի Հոկտեմբեր 19ին, «Զաւարեան Կեդրոն»ի սրահին մէջ, զոյգ դպրոցներու աշակերտներուն մասնակցութեամբ։
Այս նորարար ծրագիրին նպատակն էր նախ մօտիկ բերել եւ ծանօթացնել իրարու երկու դպրոցներուն աշակերտները, ապա՝ զանոնք ոգեւորել ու աւելի մօտեցնել հայկական մշակոյթին, զանազան խաղերու ու հետաքրքրական զբաղումներու միջոցաւ։
Գործի անցանք ու օրը հասաւ…
Ըստ պատրաստուած յայտագրին, առաջին քայլը խումբերու բաժնուիլն էր։ Այսպէս՝ աշակերտները բաժնուեցան վիճակախաղով 9 խումբերու եւ ամէն մէկ խումբ խաղերուն հսկող- բացատրող հայ ուսուցչուհի մը ունեցաւ։ Յաջորդեց՝ «Ծանօթացման խաղ»ը, որու ընթացքին ամէն մէկ խումբի աշակերտները նուագարան (դափ կամ թմբուկ) մը ձեռքը առնելով կը ներկայացնէր ինքզինք։
Շարունակուեցաւ՝ հայկական պատմութեան եւ լեռնաշխարհի նիւթերով նկարաշարով մը, որ բաժնուեցաւ աշակերտներուն եւ պահանջուեցաւ անոնցմէ՝ դիտելով այդ պատկերները՝ մտածել եւ հիւսել այնպիսի պատմութիւն մը, որ առնչուի եւ կապուի հայկական ոգիին։
Այստեղ՝ անգամ մը եւս զարմանքով մնացինք երեխաներու ճոխ երեւակայութեան եւ ստեղծագործութեան վրայ։ Յետոյ՝ տեսալսողական սարքի միջոցաւ, աշակերտներուն ներկայացուեցաւ հայկական մշակոյթի պատկերներու շարան մը, հայկական նոր եւ աւանդական նուագակցութեամբ։ Հոս երեխաները խանդավառ՝ «ապրեցան» այդ պատկերներու եւ երգերու մէջէն, լսելով եւ դիտելով մեր մշակոյթի ամէն մէկ բջիջը՝ Հայկական Բարձրաւանդակը, կոթողները, վանքերը, գիրերը, ամէնօրեայ եւ գաւառային կեանքը, երգերն եւ պարերը, աւանդական կերակուրներուն տեսակները… Այս ներկայացումին զուգահեռ, ամէն մէկ աշակերտ գծեց ինչ որ տպաւորեց զինք եւ կամ հնարեց ու գծեց նոր պատկեր մը։ Ետքը՝ կտրեց եւ փակցուց մեծ խաւաքարտի մը վրայ։ Այսպէ՛ս, ամէն մէկ խումբ հայկական մշակոյթի գեղեցիկ պատկերով «քոլաժ» մը շինեց, եւ յետոյ՝ բոլոր խումբերու աշխատանքը ցուցադրուեցաւ ու կախուեցաւ սրահին պատերէն։ Ծրագիրը աւարտեցաւ հայկական մե՜ծ շուրջպարով մը, ուր բոլորս միասին, մեծ ու պզտիկ՝ ձեռք-ձեռքի բռնած՝ հրաժեշտ տուինք եւ խոստացանք նորէն հանդիպելու…
Այդ օրէն ետք եւ անոր ուղղութեամբ, Հ.Կ.Խ.ի «Զաւարեան» վարժարանի Դ.դասարանի աշակերտները իրենց միտքերը շարադրեցին՝ արտայայտելով իրենց տպաւորութիւնները եւ ազդեցութիւնը, որ կրեցին «Մշակոյթի օր»էն։ Այս ձեւով պարզուեցաւ այս ծրագիրին արդիւնաւէտութիւնը։
Ահա՛ հատուածներ՝ անոնց շարադրութիւններէն.-
«Մշակոյթին օր»ը՝ Ֆիքսի աշակերտները առաջին անգամ եկան մեր դպրոցը։ Սկիզբը ծանօթացանք իրարու եւ յետոյ գործակցութեան միջոցաւ հիւսեցինք հայկական պատմութիւններ եւ շինեցինք հսկայ քոլաժ մը, հայկական մշակոյթի պատկերներով։
Տիմիդրի
Ամէնէն սիրածս «քոլաժ»ին կազմութիւնն էր։ Նախ՝ ցուցադրուեցան մեր հայրենիքէն բազմաթիւ նկարներ, հայկական երգերով։
Յետոյ՝ այդ մթնոլորտին մէջ, սկսանք գծելու ու կտրելու, եւ ետքը՝ փակցնելու մեր բոլոր գծագրութիւնները մեծ խաւաքարտի մը վրայ։ Այդպէ՛ս շինեցինք փոքրիկ Հայաստան մը։
Ալին
«Քոլաժ»էն ետք՝ մե՜ծ հայկական շուրջպար մը պարեցինք բոլորս միասին։ Այդ օրէն հասկցայ, որ պէտք չէ մոռնամ մեր հայրենիքը, լեզուն եւ մշակոյթը։ Յոյս ունիմ՝ նորէն ընենք նման աշխատանք մը եւ աղուոր ժամանակ անցընենք։
Մարիա
Պարեցինք, երգեցինք, պատմութիւններ ներկայացուցինք, հայկական համո՜վ պտուղներ եւ ճաշեր տեսանք, ինչպէս՝ խաղող եւ ծիրան, լահմաճուն եւ մանթը։ Տեսանք նաեւ պատկերներ՝ հայկական գիւղական կեանքէն եւ տարբեր տեսարժան վայրեր։
Տիգրան
Նկարեցինք՝ կարմիր նուռեր, գեղեցիկ տարազներով պարուհիներ, թոնիրին մէջ լաւաշ եփող հայ տիկիններ եւ համո՜վ մանթը։ Շատ լաւ անցուցինք մշակոյթին օրը։
«Մնաք բարո՛վ» ըսինք Ֆիքսի աշակերտներուն՝ հայկական պարով մը։
Մարիէլ
«Մշակոյթի օր»ը, մեր դպրոցը կրցաւ ծանօթանալ եւ գործակցիլ «Լ. եւ Ս. Յակոբեան» վարժարանի աշակերտներուն հետ։
Նաեւ հասկցայ, որ այս օրը նուիրուած է հայկական մշակոյթին, որովհետեւ մենք հայ ենք։
Լեւոն
