60 տարի հայ պատանիներ համախմբուած ակումբներուն մէջ առաջին պատառիկները ստացան ազգային ոգիի, հայրենասիրութեան եւ հայկական մշակոյթի:
60 տարի մեծ թիւով պատանիներ եւ պարմանուհիներ անցան այս միութենէն դաստիարակուեցան եւ ստանձնեցին իրենց կարգին, պատասխանատու դիրքեր, շարունակելու համար իրենց փոխանցուած ազգային ոգին եւ հայրենասիրութիւնը, դպրոցի եւ ընտանիքի կողքին:
60 տարիներ առաջ, նուիրեալ ընկերներ հիմնեցին Հ.Յ.Դ. Յունաստանի Պատանեկան միութիւնը, իրենց շուրջը հաւաքելով հայ պատանիներ եւ երիտասարդաներ, որոնք շարունակեցին այս աշխատանքը:
Հ.Յ.Դ. Յունաստանի Պատանեկան միութեան Վարիչ մարմինը այս բոլորը եկաւ յիշեցնելու Շաբաթ, 15 Յունիս 2024-ին, Ֆիքսի «Արամ Մանուկեան» ակումբի մարզադաշտին մէջ, տօնելով միութեան 60-ամեակը:
Մարզադաշտին մէջ, թապլօներու վրայ զետեղուած էին միութեան 60 տարիներու գործունէութենէն պատանիներու նկարները բանակումներէն, հանդէսէներէն, ընկերային կեանքերէն, մարզանքի փորձերէն, ներկայացնելով միութեան ամբողջ աշխատանքը:
Օրուան հանդիսավար ընկ. Արմէն Աճէմեան երեկոյի բացումը կատարելէ եւ ներկայացնելէ ետք նպատակը այս ձեռնարկին, հրաւիրեց ընկ. Ժաննա Յովսէփեանը փոխանցելու համար Հ.Յ.Դ. Յունաստանի Պատանեկան միութեան Վարիչ մարմնոյ խօսքը:
Պատանիներուն կողմէ խօսք ուղղեց ընկ. Ալեքս Բարսեղեան:
Խումբ մը պատանիներ երգեցին երկու երգ եռանդով եւ ուրախութեամբ:
Ապա, տեղի ունեցաւ վիտէօ երիզի ցուցադրութիւն:
60 տարիներու Հ.Յ.Դ. Յունաստանի Պատանեկան միութեան գործունէութիւնը արձանագրուած էր վիտէօ երիզներու մէջ: Ժապաւէնին մէջ, մեծ թիւով նկարներ եւ վիտէօներ՝ հին տարիներէն մինչեւ այսօր, ներկայացուցին պատանիներու գործունէութիւնը:
Յուզիչ էր տեսնել անցեալի պատանիները՝ այսօրուան վարիչներու պաշտօն ստանձնած ըլլալը:
Երեկոն շարունակուեցաւ վիճակահանութեամբ եւ հիւրասիրութեամբ:
Ներկաները, խանդավառ մթնոլորտի մէջ գաւաթ մը գինիով, Պատանեկան միութեան կենացը խմեցին, մաղթեցին շատ տարիներ գոյատեւէ ու դաստիարակէ հայ պատանիները, կազմաւորելով հայրենասէր, պատասխանատու եւ պատրաստ ծառայելու հայ ազգին եւ հայրենիքին պատանիներ:
***
Ընդհանուր Վարիչ մարմնոյ խօսքը՝ ընկ. Ժաննա Յովսէփեանին կողմէ
Սիրելի ներկաներ՝
Ընդանուր Վարիչ Մարմնոյ եւ օգնական վարիչներու կողմէ ձեզ կ‘ողջունեմ Հ.Յ.Դ. Յունաստանի Պատանեկան Միութեան 60-ամեակին նուիրուած երեկոյին։
Շատ ուրախ ենք, որ այսօր բոլորս միասին հաւաքուած ենք տօնելու համար Յունաստանի Պատանեկան Միութեան 60-րդ տարեդարձը, մէկը միւսին տեսնելով եւ յիշելով բոլոր այն գեղեցիք պահերը, որ ապրեցանք իբրեւ պատանի կամ վարիչ եղած ժամանակներէն։
Այս էր մեր նպատակը։ 6 կամ 7 ամիս առաջ որոշեցինք ձեռնարկ մը կազմակերպել… ձեռնարկ մը, որ տարիներէ ի վեր չէր իրագործուած։
Ժամերով եւ օրերով կը մտածէինք, թէ ինչպէ՞ս պիտի ըլլայ այս օրուան յայտագիրը, ի՞նչ եւ ինչպէ՞ս պիտի ընենք։
Բայց մեր նպատակը յստակ էր՝ կազմակերպել հաւաքոյթ մը բոլոր այն անձերով, որ անցած են Պատանեկան Միութեան շարքերէն եւ բանակումներէն։ Պատանիներ՝ հանդիպիլ իրենց հին վարիչներուն, վարիչներ՝ որ գործակցած են միասին, իրարու հանդիպիլ։ Եւ այս բոլորը մեր ակումբէն ներս, ուր ամէն Շաբաթ պարտաւոր ենք ներկայ գտնուիլ՝ անցեալէն մինչեւ այսօր։
Այս ձեռնարկը կազմակերպելով հաւատացէք, որքան բաներ առիթը ունեցանք սորվելու եւ մէջտեղ բերելու։ Փորփրելով Պատանենան Միւթեան սենեակները եւ հոն գտնուող թղթածրարները՝ գտանք հին նկարներ, ձայնարեզներ, «Արձագանգ»՝ Պատանեկան միութեան թերթիկներ, ատենագրութիւններ, հին բանակումներու դիմումնագիրներ եւ անդամներու անուններով ցանկեր։
Սակայն, ինչպէս որ յաջորդաբար պիտի տեսնէք, առիթը ունեցանք խօսելու եւ հարցազրոյց ունենալու քանի մը նախկին վարիչներու հետ, իմանալու՝ ինչպէս էր Պատանեկան Միութեան կեանքը եւ ժողովները այն ատենները, ինչպէս կազմակերպուեցաւ առաջին բանակումը, որոնք էին դժուարութիւնները եւ այլ հարցեր։
Ը.Վ.Մ.ոյ անդամները ներկայ ըլլալով այս հանդիպումներուն հասկցանք, թէ որքան բան փոխուած է, բայց միաժամանակ, շատ սովորութիւններ նոյնը մնացած են: Ամէնէն կարեւորը՝ մեր միութեան նպատակը, որը մնացած է կայուն եւ անփոփոխ:
Այսինքն պատրաստել՝ հայկական մթնոլորտի մէջ, հայ պատանիներ՝ քաղաքական եւ ընկերային զգայնութիւններով, հայրենասէր եւ հայապաշտպանող երիտասարդներ, պատասխանատու վարչութեան եւ խումբի մը անդամներ, ստանձնելով պարտականութիւններ, հասկնալով պատասխանատուութեան կարեւորութիւնն ու արժէքը՝ եւ այսպէս զարգացնելով կարգապահութիւնը։
Կը փափաքինք պատանիները ունենալ իրենց քննադատական մտածողութիւնը, մշակել սեփական կարծիք, հասնելով իրենց եզրակացութիւններուն։ Այսպիսով, մեր միութիւնը կը փորձէ պատրաստել պատանիներ՝ որոնք հաւանաբար պիտի ըլլան մեր շարունակութիւնը, ինչպէս որ յաջողութեամբ արդէն կը կատարուի վերջին 60 տարիներուն ընթացքին։
Եւ ինչպէ՞ս կրնանք համարել այս 60 տարիներու գործը յաջող:
Պատասխանը… այսօրուան մեր ներկայութիւնը։
Բոլոր անոնք, որ աշխատած են կամաւորութեամբ՝ վստահ եմ, որ կը ճանչնան իրենց գործի կարեւորութիւնը եւ արդիւնքը, տեսնելով իրենց պատանիները ոչ միայն վարիչ ըլլալ, բայց որեւէ միութեան մէջ աշխատիլ եւ անդամ ըլլալ։
Մեր գաղութէն դուրս, շատեր կարելի դժուարութեամբ կը հասկնան, ինչու կ‘ընենք այս ամէն ինչը։ Ի՞նչ է պատանեկանը։ Ինչո՞ւ ամէն Շաբաթ կը մասնակցինք ժողովներուն եւ ինչո՞ւ արձակուրդի օրերը կ‘օգտագործենք բանակումի մը համար։
Բայց ինչպէ՞ս բացատրել այս բոլոր յիշատակները եւ զգացումները։ Ինչպէ՞ս պատմել ամէն մէկ պահը, որ մնացած է անմոռանալի մեր մտքին մէջ, այնպիսի ձեւով, որ մե՛նք ալ փափաքը ունինք, որ նո՛յն յիշատակները փորձենք ստեղծել մեր պատանիներուն համար։
Երբ ինծի կ‘ուղղեն այս հարցումները … պատասխանը մէկ է։
Ես ալ կը մասնակցէի իբրեւ հայ պատանի այս ժողովներուն եւ բանակումներուն, եւ ամէնէն հաճելի եւ աղուոր պահերը իմ մանկութենէն, պատանեկանի կեանքի ընթացքին ունեցած եմ։ Ուրէմն, ես ալ իմ կարգին կ‘ուզեմ, որքան որ կրնամ, նոյն ձեւով շարունակել այս ամէն ինչը, նոյն ժամուն հաւատալով միութեան նպատակին։
Կը վստահիմ, որ շատերուս համար այս պատասխանը նոյնն է։
Վերջանալու համար, կ‘ուզեմ շնորհակալութիւն յայտնել բոլոր նախկին վարիչներուն, Կեդրոնական Կոմիտէի անդամներուն, Հ.Յ.Դ. Երիտասարդական միութեան Կեդրոնական Վարչութեան անդամներուն, Հ.Կ.Խաչին, գաղութին մէջ գործող միութիւններուն, ինչպէս նաեւ բոլոր անոնց, որոնք օգնութեան ձեռք երկարած են, երբ որ պէտք եղած է։
Բոլոր անոնց, որոնք ամէնէն պզտիկ մինչեւ ամէնէն կարեւոր գործերը ստանձնած են, որպէսզի Հ.Յ.Դ. Յունաստանի Պատանեկան Միութեան գործունէութիւնը յաջողութեամբ կատարուի եւ այսօր հոս գտնուինք։
Շարունակելով՝ շնորհակալութիւն կ‘ուզեմ յայտնել՝
իմ սերունդի վարիչներուն, որոնք շատեր անոնցմէ ձեր միջեւ նստած են այսօր
վարչութեանս անդամներուն, որոնց հետ միասին եղած ենք պատանիներ, Պատանեկանի վարչութեան անդամներ, երիտասարդականի վարչութեան անդամներ եւ դեռ կը շարունակենք միասին գործակցիլ։
ծնողներուն, որ իրենց զաւակները կը վստահին մեզի։
ձեզ բոլորին, որ մեր հրաւէրը ընդառաջելով, այսօր մեր մօտ կը գտնուիք։
***
Պատանիներու խօսքը՝ ընկ. Ալեքս Բարսեղեանին կողմէ
Սիրելի ներկաներ, ընկերներ եւ ընկերուհիներ…
Նախ եւ առաջ պիտի ուզէի ես ալ իմ կարգին եւ բոլոր ըկներներուս եւ ընկերուհիներուս կողմէ՝ ձեզ ողջունել այս շատ իւրայատուկ երեկոյին։
Հ.Յ.Դ. Յունաստանի Պատանեկան Միութիւնը ոչ միայն առիթ մը եղած է որպէսզի մեր ընկերներուն հետ հաւաքուինք մէկ օր եւս, բայց առիթը ունենանք տեսնուելու հայկական ակումբներէն ներս, մանաւանդ մեզի համար որ հեռու կ՝ապրինք կամ հայկական միջնակարգը աւարտած ենք։ Նաեւ, առիթ մըն է, որպէսզի հայերէն խօսինք, կարդանք եւ գրենք, քոնէ շաբաթը մէկ անգամ։
Բայց, ասոնցմէ զատ, Պատանեկանի միջոցաւ սորված ենք, թէ որքան կարեւոր է բարեկամութիւնը եւ համերաշխութեան ոգին մարդու մը համար։
Սորված ենք, ինչպէս գործակցիլ իրարու հետ, խումբի անդամ ըլլալ եւ պարտականութիւններ ունենալ։ Արժէքներ, որ շատ կարեւոր են եւ մեզի կը պատրաստեն ապագային համար։
Տարեշրջանի ընթացքին բացի ժողովներէն, միջակ եւ մեծ պատանիները անհամբեր կը սպասենք եռօրեայ արշաւին։ Ամէն տարի այդ ժամանակը երբ կը մօտենայ, Յունուար ամիսէն մեր վարիչներուն կը հարցնենք, թէ ո՛ւր պիտի ըլլայ, որպէսզի պատրաստուինք։
Կը հասկնաք, որքան աղուոր է մեզի համար մեր ընկերներուն հետ երեք օր միասին գտնուիլ, քանի որ ազատ կը զգանք, կատակներ կ‘ընենք եւ հաճելի ժամանակ կ‘անցնինք։
Հարկաւ, արշաւի ընթացքին Workshop-ի կը մասնկացինք՝ խումբերու կը բաժնուինք եւ ամէն խումբ վարիչի մը հետ կ‘աշխատի նիւթի մը շուրջ։ Տեղեկութիւններ կը փնտռենք համացանցի միջոցով, մտածումներ եւ կարծիքներ կը փոխանակենք մեր միջեւ, եւ վերջաւորութեան ամէն խումբը իր գործը կը ներկայացնէ։
Հիմա… բանակումի համար ինչ պատմել առաջինը… բոլոր անոնք որ բանակումի մասնակցած են, ամէնէն աղուոր յիշատակները ունին մինչեւ այսօր։ Հաւանաբար 42 բանակումներու ընթացքին եղած են փոփոխութիւններ, բայց գիտեմ, որ զգացումները բոլորիս համար նոյն էն։
10 անմոռանալի օրեր, որ լեցուած են խնդալով եւ հաճոյքով մեր ընկերներուն եւ վարիչներուն հետ, մարզանքով, օրակարգերով, պահակութիւններով, ընկերային կեանքով, երգերով եւ պարերով։
Յուսամ, որ այս շատ կարեւոր գործունէութիւնը շարունակուի տեղի ունենալ յաջորդ սերունդներուն համար։
Ինչպէս որ ըսի, այսօր շատ յատուկ օր մըն է։ Բոլորս միասին կը հետեւինք եւ կը հասկնանք Հ.Յ.Դ. Յունաստանի Պատանեկան Միութեան պատմութիւնը եւ յառաջացումը այս 60 տարիներու ընթացքին։ Մեզի համար շատ հետաքրքրական է տեսնել մեր այսօրուայ վարիչներուն իբրեւ պատանի, որովհետեւ այսպիսով կը գիտակցինք, որ մեր վարիչներն ալ մեր տեղը եղած են անցեալին։
Վերջանալով՝ կ’ուզեմ շնորհակալութիւն յայտնել վարիչներուն, որ մեզի համար կը ստեղծեն այս անմոռանալի յիշատակները եւ զգացումները։
