Հ.Յ.Դ. Յունաստանի Պատանեկան Միութեան 10օրեայ բանակումը՝ 17 Օգոստոսէն մինչեւ 27 Օգոստոս, Քալամոսի նոր բանակավայրին մէջ, աւարտեցաւ Երկուշաբթի՝ 27 Օգոստոսի առաւօտեան, երբ տղաքն ու վարիչները հաւաքեցին իրենց իրեղէնները եւ Աթէնք վերադարձան, իրենց հետ առնելով 10օրեայ բանակումի ընկերային կեանքի յուշերը:
95 պատանիներ մասնակցեցան միութեան 38րդ բանակումին, անգամ մը եւս համախմբուելով իրարու հետ, իրենց 14 վարիչներու աչալուրջ հսկողութեան տակ:
95 պատանիներու հաւաքականութեան մէջ ընդգրկուեցան Արցախէն ժամանած 23 պատանիներ՝ իրենց 2 ուղեկցողներուն հետ, որոնց այս տարի Յունաստանի Հայ Կապոյտ Խաչի Շրջանային Վարչութիւնը հիւրընկալեց Պատանեկան Միութեան բանակումին՝ ստանձնելով բանակավայրին մէջ անոնց կեցութեան ծախսը:
Բանակումի առօրեան կը սկսէր Եռագոյնի, Արցախի եւ Հ.Յ.Դ.ի դրօշակներու արարողութեամբ՝ «Մեր հայրենիք», «Մշակ Բանուոր» եւ Արցախի քայլերգներու երգեցողութեամբ:
Յաջորդաբար, բանակումի յայտագիրը կը շարունակուէր նախաճաշով, վրաններու մաքրութեամբ, մարզանքով, յանձնախումբներու աշխատանքով, դաստիարակչական յատուկ օրակարգով ու կ՚ամբողջանար գիշերուան ընկերային կեանքով, զոր կը պատրաստէին պատանիները, ուրախ եւ զուարճանալի ժամեր անցընելով:
Պատանիները կը գործէին յանձնախումբներու բաժնուած: Յանձնախումբները հետեւեալներն էին.- Ձեռնարկի պատրաստութեան, ձեռային աշխատանքի, ելեկտրոնային թերթիկի, «Ազատ Օր»ի նիւթերու պատրաստութեան, ռատիոժամի: Ամէն մէկ պատանի իր նախասիրած յանձնախումբին մէջ կ՚աշխատէր՝ հայերէն լեզուն գործածելով ու զարգացնելով:
«Ազատ Օր»ի նիւթերու պատրաստութեան յանձնախումբը այս տարի առաջին անգամ կազմուեցաւ՝ նպատակ ունենալով, որ այս տասը օրերու ընթացքին պատանիները պատրաստեն նիւթեր, որոնք տարուան ընթացքին լոյս պիտի տեսնեն «Ազատ Օր»ի մէջ՝ Պատանեկան Միութեան սիւնակ-էջով:
10 օրերու ընթացքին պատանիները առիթը ունեցան Քալամոսի ծովափը այցելելու եւ ուրախ ժամեր անցընելու՝ լողալով իրենց ընկերներուն հետ:
Անշուշտ գիշերուան ժամերուն պատանիները բանակավայրի պահակութեան լուրջ պարտականութիւնը կը կատարէին, փոքրերը՝ քիչ մը վախով, մեծերը՝ քիչ մը կատակով, բայց գիտակցելով այդ պարտականութեան կարեւորութեան: Արդէն ահազանգի փորձը, զոր կատարեցին վարիչները, եկաւ շեշտելու անհրաժեշտութիւնը՝ միշտ պատրաստ ըլլալու եւ վարիչներու ուղղութիւններուն հետեւելու հրդեհի կամ այլ վտանգի մը պարագային:
Հայկական մթնոլորտ, դաստիարակութիւն, հայախօսութիւն, հայակրթութիւն, զուարճութիւն, ընկերային կեանք, բոլորը՝ ազդակներ, որոնք արժանի ու արդիւնաւէտ ձեւով զբաղեցուցին պատանիներու 10օրեակը:
Այս տարուան բանակումի կազմակերպման եւ իրագործման ամբողջ աշխատանքը եղաւ Հ.Յ.Դ. Պատանեկան Միութեան Ընդհանուր Վարիչ Մարմնոյ կողմէ, Հ.Յ.Դ. Կեդրոնական Կոմիտէի աջակցութեամբ: Վարիչ Մարմնոյ 14 ընկեր-ընկերուհիները իրենց կարելին կատարեցին, որպէսզի բանակումը յաջողութեամբ պսակուի, թէեւ նոր բանակավայրը շատ մեծ դժուարութիւններ յառաջացուցած էր եւ ծրագրումի շատ մեծ աշխատանքի կը կարօտէր: Բայց հաւատարիմ մնալով բանակումի անհրաժեշտութեան՝ ամէն ջանք թափեցին, որպէսզի բանակումը իր նպատակին հասնի ու պատանիները յաջող բանակումի մը յուշերը իրենց հետ ունենան ամբողջ տարուան ընթացքին, մինչեւ յաջորդ տարուան բանակումը, որուն անհամբեր կը սպասեն ամէն տարի:
Փակման հանդիսութիւն
Շաբաթ՝ 25 Օգոստոսին տեղի ունեցաւ բանակումի փակման հրապարակային հանդիսութիւնը, ներկայութեամբ՝ յունահայոց թեմակալ առաջնորդ Գեղամ Արք. Խաչերեանի եւ Ֆիքսի ու Գոքինիոյ Հոգեւոր Հայրերուն, Ազգային Վարչութեան ատենապետ Պօղոս Չոլաքեանի, Հ.Յ.Դ. Կեդրոնական Կոմիտէի անդամներուն, գաղութի միութիւններու ներկայացուցիչներուն եւ մեծ թիւով ծնողներու, մեծ մայրերու, մեծ հայրերու եւ Պատանեկան Միութեան բանակումները քաջալերող հայրենակիցներու:
Նախքան յայտագրին բացումը, ծնողները առիթը ունեցան շրջելու ընդարձակ բանակավայրէն ներս՝ ծանօթանալով դաշտերուն, վրան-տաղաւարներուն, ճաշարանի վայրին եւ բանակավայրի ամէն տեսակի յարմարութիւններուն:
Երեկոյեան ժամը 8ին բոլորը դաշտ ուղղուեցան դրօշակի արարողութեան համար: Պատանիները կանոնաւորապէս շարուելէ ետք, «Մեր հայրենիք», «Մշակ Բանուոր» եւ Արցախի քայլերգներու երգեցողութեամբ կատարեցին դրօշակներու պաշտօնական արարողութիւնը:
Ապա՝ բոլոր ներկաները ուղղուեցան բանակավայրի ամփիթատրոնը, ուր տեղի ունեցաւ հանդիսութիւնը:
Ձեռնարկին բացումը կատարեց Վարիչ Մարմնոյ անդամ ընկ. Նարօտ Շահինեան, որ ներկաներուն ուղղեց Հ.Յ.Դ. Ընդհանուր Վարիչ Մարմնոյ խօսքը (կը հրատարակենք առանձին սիւնակով):
Այնուհետեւ՝ խօսք առաւ պատանիներուն կողմէ ընկ. Յովիկ Թիթոյեան, որուն խօսքը կը հրատարակենք զատ սիւնակով:
Հ.Յ.Դ. Կեդրոնական Կոմիտէի կողմէ ընկ. Քերոբ Էքիզեան իր խօսքին մէջ գոհունակութիւն յայտնեց բանակումի յաջող կազմակերպան եւ, ի միջի այլոց, յորդորեց ծնողները իրենց զաւակները անդամագրելու Պատանեկան Միութեան ու յաջորդաբար Երիտասարդական Միութեան՝ նկատի առնելով, որ անոնք պիտի ըլլան յաջորդները:
Ապա՝ իր խօսքը ուղղելու համար հրաւիրուեցաւ Արցախի պատանիներուն ուղեկցող եւ պատասխանատու տիկին Ժաննա Այվազեան՝ Արցախի կրթութեան եւ գիտութեան նախարարութեան կողմէ: Ան իր շնորհակալութիւնը եւ ուրախութիւնը յայտնելէ ետք զիրենք հիւրընկալելու առիթով՝ ի միջի այլոց յայտնեց, թէ Արցախի ժողովուրդը Արցախը կը պահպանէ, իսկ սփիւռքի ժողովուրդը՝ հայոց լեզուն:
Հայկական զուգերգներէ, պարերէ եւ խմբային երգերէ ետք, բեմ հրաւիրուեցաւ թեմակալ առաջնորդ Գեղամ Արք. Խաչերեան՝ իր հայրական խօսքը ուղղելու ներկաներուն եւ պատանիներուն: Ան ըսաւ, որ այս տարի բախտաւորութիւնը ունեցանք Արցախէն պատանիներ ընդունելու, որոնք Արցախի հերոսներու զաւակներ են եւ Արցախը կը պաշտպանեն: Հոս համախմբուած է ամբողջ հայութիւնը՝ Յունաստանէն, Արցախէն եւ Հայաստանէն: Մասնակցելով Հ.Յ.Դ. Պատանեկան Միութեան բանակումին, կը պատրաստուին հայկական նկարագրով, հայկական ոգիով պատանիներ, որոնք պիտի ըլլան յաջորդ տարիներու վարիչներ եւ պիտի շարունակեն սկսած այս հայապահպանման եւ հայակրթութեան գործը: Սրբազան հայրը ամբողջացուց իր խօսքը՝ պատանիներուն ըսելով, որ «դուք մեր յոյսն էք վաղուան հայկական կեանքին»:
Բոլոր խօսք առնողները շեշտեցին բանակումի կազմակերպման կարեւորութիւնը, որ Հ.Յ.Դ. Պատանեկան Միութեան աշխատանքներու գագաթնակէտը կը կազմէ: Նաեւ՝ անդրադարձան պատրաստակամ կեցուածքին երիտասարդ վարիչներուն, որոնք ստանձնեցին բանակումի լրիւ պատասխանատուութիւնը եւ լաւագոյն ձեւով յաջողցուցին կարեւոր այս ձեռնարկը, նոյնիսկ յաղթահարելով անկանխատեսելի դժուարութիւններ, որոնք ստեղծուեցան այս 10 օրերու ընթացքին:
Հանդէսի աւարտէն ետք երեկոն շարունակուեցաւ ճաշկերոյթով՝ հայաշունչ մթնոլորտի մէջ, որու ընթացքին տեղի ունեցաւ վիճակահանութիւն մեր հայրենակիցներու կատարած նուէրներով:
Հ.Յ.Դ. Յունաստանի Պատանեկան Միութեան Ընդհանուր Վարիչ Մարմնոյ խօսքը՝ արտասանուած ընկ. Նարօտ Շահինեանի կողմէ
Հ.Յ.Դ. Յունաստանի Պատանեկան Միութեան Ընդհանուր Վարիչ Մարմինը բարի գալուստ կը մաղթէ ձեզի՝ Միութեանս 38րդ բանակումի հանդիսութեան:
Մեծ ուրախութեամբ տարի մը եւս համախմբուեցանք 72 պատանիներու հետ, տասը օր միասնաբար անցնելու համար: Մեծ ուրախութեամբ եւ յուզումով դիմաւորեցինք նաեւ Արցախէն եկած 23 պատանիները: Թէեւ իրականութիւն է, որ մեր լեզուի բարբառներու զանազանութիւն մը կայ մեր միջեւ, սակայն հոգեկան մօտիկութիւնը մեզ կը միացնէ Արցախի մեր եղբայրներուն եւ քոյրերուն հետ՝ մշակոյթի ճամբուն վրայ պարով, երգով ու թատրոնով: Միասին ապրելով մեր առօրեան շաղուեցանք իրարու հետ, բաժնեցինք մեր ապրումներն ու մեր զգացումները եւ սերտացուցինք մեր կապերը:
Նախորդող ամիսները դժուար եղան մեզի համար, ամէն տեսակէտով, քանի որ մենք մեզ գտանք յանկարծ նոր կացութեան մը առջեւ, որովհետեւ սկիզբը նոյնիսկ բանակավայր չունէինք, իսկ երբ անիկա գտնուեցաւ, պէտք էինք ամէն բան զէրոյէն կազմակերպել եւ պատրաստել:
Մեծ ուրախութիւն է մեզի համար, որ կարողացանք լուծել բոլոր ծագած հարցերը, մէկ, առ մէկ, գործակցաբար, երկար բայց արդիւնաբեր խորհրդակցութիւններով, տեղւոյն վրայ այցելելով, որոնցմէ ետք կարելի եղաւ հասնիլ այս բանակումին եւ այս օրուան:
Բանակումի սկզբունքները եւ բանակավայրէն դուրս կամ ներս, վարիչներուս պարտականութիւնները բազմակողմանի են, ինչպէս վստահ եմ ձեզմէ շատեր կրնան հաստատել.
Պատանիներուն ֆիզիքական, մտային եւ հոգեկան անվտանգութիւնը ապահովել
-Դաստիարակել,
-Ներշնչել,
-Լաւ ժամանց ապահովել։
Սակայն քանի տարիները կ’անցնին, կ’անդրադառնանք, թէ այս բոլորը փոխադարձ ազդեցութեան արդիւնք են քանի որ, նաեւ մենք, վարիչներս, կը դաստիարակուինք, կը զուարճանանք, կը ներշնչուինք պատանիներէն: Ամէն անգամ զարմանքով եւ համեստութեամբ կ’անդրադառնանք, թէ որքան սորվելիք ունինք մեծերս՝ փոքրիկներէն:
Շատ սիրելի պատանիներ՝
Եթէ երկու խօսք կարենային ըսել ձեզի, պիտի ըլլային հետեւալները՝
Սիրեցէ՛ք մէկը միւսին, այս ձեր կապը անկարելի է բացատրել երրորդներու, ոչ ալ կը փոխարինուի ուրիշ որեւէ բանով,
Ծնողներուն՝
Շարունակեցէ՛ք ձեր զաւակները դաստիարակել հայկական ոգիով, այս ինքնութեան առաւելութիւններով, շեշտեցէ՛ք մեր լեզուի կարեւորութինը ձեր օրինակով:
Անցեալի մեր վարիչներուն, որոնք մեզի պատրաստեցին՝
Շնորհակալ ենք, որ մեզ ներշնչեցիք, որպէսզի ձեր գործունէութիւնը շարունակենք: Կը յուսանք, որ մենք ալ մեր կարգին կարողանանք փոխանցել մեր գործը նոր սերունդին:
Նախքան փակելս՝ պարտք կը զգամ շնորհակալութիւն յայտնելու Հայ Կապոյտ Խաչի Շրջանային Վարչութեան իր նիւթական օժանդակութեան համար այս տարի եւս՝ ինչպէս ամէն տարի, Հ.Յ.Դ. Կեդրոնական Կոմիտէիին եւ մանաւանդ Վարիչ Մարմնոյ մօտ պատասխանատու ներկայացուցիչին՝ ընկեր Յարութ Սերոբեանին, իրենց հետեւողական, բարոյական եւ գործնական աջակցութեան համար, առանց որոնց անկարելի պիտի ըլլար իրականացնել այս տարուան բանակումը: Բոլոր վարիչներուն եւ օգնական վարիչներուն, ինչպէս նաեւ բոլոր անհատներուն, որոնք օգնեցին այս բանակումի իրականացումին համար՝ ջերմ շնորհակալութիւններ:
Պատանիներու խօսքը՝ արտասանուած Յովիկ Թիթոյեանի կողմէ
Պատանեկան Միութեան 38րդ բանակումին աւարտին կը հասնինք: Մեզմէ մի քանիներուն համար վերջին բանակումն է: Կը յիշենք անցեալ բանակումներէ տարբեր բաներ եւ կը խնդանք: Կան յիշատակներ, որոնք անմոռանալի են: Կը յիշենք այդ պատիժները մեր սիրելի վարիչներէն. պատիժները որքա՛ն ալ յոգնեցուցիչ ըլլային, մենք շատ ուրախ կ՚ըլլայինք, որովհետեւ մեր ընկերներուն հետ էինք: Նաեւ կը յիշենք այն ընկերային կեանքերը, որոնց ընթացքին բոլորս կը նստէինք իբրեւ խումբ եւ կը խաղայինք եւ ուրախ ժամեր կ՚անցընէինք: Ի՜նչ աղուոր օրեր էին անոնք:
Այս տարուան բանակումէն ամենալաւ յիշատակը, որ պիտի պահենք մեր սրտին մէջ, այցելութիւնն է մեր սիրելի Արցախի պատանիներուն, որոնք իրենք ալ միացան մեզի ու շատ զուարճանալի ժամեր անցուցինք:
Բանակումներէն շատ բաներ սորվեցանք. նոր անձերու ծանօթացանք, որոնք դարձան կեանքի ընկերներ: Այս անձերը մեր մօտ պիտի ըլլան ամէն անգամ, որ իրենց պէտք պիտի ունենանք: Ո՛չ միայն ընկերներ, այլեւ՝ եղբայրներ ու քոյրեր: Քանի որ անոնք բոլոր ուրախութեան ու դժուարութեան պահերուն հետդ պիտի ըլլան:
Շնորհակալ ենք վարիչներուն, որոնք մեզի կեանքի դասեր տուին եւ մեզ դաստիարակեցին: Շնորհակալութիւն կը յայտնենք վարիչներուն նաեւ անոր համար, որ կրցան մեզի աւելի մօտ բերել մեր հայրենիքին՝ երգերով, խաղերով եւ օրակարգներով: Մեր ճամբորդութիւնը հոս վերջ կը գտնէ Պատանեկանի 38րդ բանակումին՝ 2012էն մինչեւ 2018: 7 տարի ամէնօրեայ ժամեր անցուցինք, բայց հիմա նոր դուռներ կը բացուին մեզի համար, դէպի նոր, տարբեր կեանք, դէպի Հ.Յ.Դ. Երիտասարտական Միութեան շարքերը:
Երանի նորէն կարենանք Պատանեկան Միութեան միանալ՝ բայց այս անգամ իբրեւ վարիչներ:
Բանակումի վարիչներ
Վարձքը կատար բոլոր ընկեր-ընկերուհիներուն, որոնց հաւատարիմ, պարտաճանաչ, սիրայօժար եւ աշխոյժ գործունէութեամբ կարելի եղաւ իրարգործել այս տարուան բանակումը.-
Սարին Աւետիսեան, Անի Գոճաշեան, Կարին Ղեւոնդեան, Նարօտ Շահինեան, Արփինէ Կիրակոսեան, Արա Ճանիկեան, Ռազմիկ Էրջէնեան, Սեւակ Գազարեան, Սերգօ Տէօքմէճեան, Քրիստին Ադամեան, Ժագլին Աճէմօղլու, Վազգէն Սավուլեան, Լոռի Գույումճեան, Արմէն Աճէմեան:
Նուիրատուութիւններ
Խանդավառուած եւ հաւատարիմ բանակումի անհրաժեշտութեան՝ իրենց նուիրատուութիւնները կատարեցին հետեւել միութիւնները եւ ազգայինները.-
— Հայ Կապոյտ Խաչի Շրջանային Վարչութիւն՝ 2000 եւրօ (Արցախի պատանիներու հիւրընկալութեան առիթով բանակումի ընթացքին):
— Հ.Յ.Դ. Ֆիքսի «Դրօ» խումբ՝ 50 եւրօ:
— Սերոբեան-Սլտրեան ընտանիք՝ 100 եւրօ:
— Եղիս Զառացեան՝ 50 եւրօ:
— Ոմն՝ 100 եւրօ:
