Հ.Յ.Դ. Յունաստանի Պատանեկան միութեան 39րդ բանակումը տեղի ունեցաւ 23 Օգոստոսէն մինչեւ 2 Սեպտեմբեր, Քալամոսի յունական աւետարանական եկեղեցւոյ բանակավայրին մէջ։ Բանակումի տասնօրեայ տեւողութեան, աւելի քան 60 պատանիներ Աթէնքէն եւ հիւսիսային Յունաստանէն, Հ.Յ.Դ. Պատանեկան միութեան Վարիչ մարմնոյ եւ Երիտ. միութեան Կեդրոնական վարչութեան 15 պատասխանատու վարիչներու հսկողութեան տակ, ապրեցան հայկական մթնոլորտ մը, նախապէս պատրաստուած առօրեայ հարուստ յայտագրով, որ կը պարունակէր դասախօսական եւ զրուցային բաժիններ, աշխատանոցներ, ռատիօժամի պատրաստութիւն, պարբերաթերթի եւ յօդուածներու պատրաստութիւն, ծովու լոգանք, ընկերային կեանքեր եւ մշակութային, գեղարուեստական ու մարզական զբաղումներ։ Մեր մայրենի լեզուն տեւաբար խօսելու, հայկական արժէքները ապրելու եւ իրար հետ սերտ ընկերային ու բարեկամական ամուր կապեր ստեղծելու առիթներու կողքին, պատանիները մասնակցեցան յատուկ դասախօսական բաժիններու՝ Հայաստանը եւ հայութիւնը յուզող հարցերու մասին։ Բոլոր պատանիները մեծ հետաքրքութեամբ հետեւեցան նիւթերուն եւ անոնք ցոյց տուին զրոյցի եւ տեսակէտներու փոխանակման լայն կարողութիւններ։ Հարցումներով եւ կարծիքներու արտայայտութեամբ, պատանիներուն մօտ ստեղծուեցան հետաքրքրութեան բնագաւառներ՝ հայոց պատմութեան, հայ լեզուի կարեւորութեան, Հայ դատի հետապնդման ուղիներու, Արցախի գոյապայքարին, յունահայ գաղութի պատմութեան եւ ազգային ինքնութեան կարեւորութեան վերաբերեալ։ Պատանեկան Միութեան 39րդ բանակումի հանդիսութիւնը տեղի ունեցաւ Շաբաթ՝ 31 Օգոստոս 2019ի երեկոյեան՝ բանակավայրէն ներս։ հանդիսութեան ներկայ եղան Գոքինիոյ եւ Նէոս Գոսզմոսի հոգեւոր հովիւները, Ազգային վարչութեան անդամներ, Հ.Յ.Դ. Կեդրոնական կոմիտէի անդամներ, Հ.Կ.Խաչի Շրջանային վարչութեան անդամներ, Կոմիտէներու եւ միութիւններու ներկայացուցիչներ, մեծ թիւով ծնողներ եւ ազգայիններ, ինչպէս նաեւ նկատարելի թիւով Հ.Յ.Դ. Երիտ. Միութեան անդամներ։ Դրօշակի արարողութենէն ետք, ներկաները ուղղուեցան բանակավայրի բացօթեայ թատրոնը, ուր Վարիչ մարմնոյ անունով բարի գալստեան խօսք ուղղեց ընկ. Նանօր Էրջէնեան, որուն խօսքը կու տանք առանձին։
Ապա, գործադրութեան դրուեցաւ օրուայ յայտագիրը, որուն մէջէն պատանիները ներկայացուցին հայկական բանաստեղծութիւններ, երգեր, թատերախառն խօսքեր ինչպէս նաեւ՝ հայկական աւանդական պարեր։ Իրենց բոլոր ներկայացումներով եւ խանդավառ արտայայտութիւններով, մանաւանդ հայերէն լեզուի մաքուր առոքանութեամբ, մեր պատանիները գրաւեցին ներկաներուն սիրտերը եւ խլեցին ջերմ ծափահարութիւններ։
Հանդիսութեան յաջորդեց խրախճանք, ուր դարձեալ պատանիները երգերով եւ պարերով խանդավառեցին ներկայ բազմութիւնը։ Տեղի ունեցաւ վիճակահանութիւն զանազան արժէքաւոր նուէրներով։ Նաեւ, եղան սրտաբուխ նուիրատուութիւններ։
Հ.Յ.Դ. Յունաստանի Պատանեկան միութեան բանակումը իր աւարտին հասած ըլլալով, լիովին արդարացուց Միութեան ծրագիրները եւ լաւագոյն առիթը տուաւ մեր պատանի հայորդիներուն վայելելու հայկական ազգային եւ ընկերային ջերմ մթնոլորտ մը, որ վստահաբար՝ իրենց ներաշխարհին մէջ դրոշմուած պիտի մնայ։
Ընկ. Նանօր Էրջէնեանի արտասանած խօսքը
Հ.Յ.Դ. Յունաստանի Պատանեկան Միութեան Վարիչ մարմինը եւ օգնական վարիչներու կազմը ուրախութեամբ կը հիւրընկալէ ձեզ, Քալամոսի այս բանակավայրէն ներս, ուր տեղի կ՚ունենայ Միութեան 39րդ բանակումը։
Մեր բանակումի տեւողութիւնն է 10 օր. այսօր արդէն 8րդ օրն է։ Մեր 60 պատանիներուն հետ միասին աշխատեցանք յանձնախումբերու դրութեամբ, հետեւեցանք դաստիարակչական դասախօսութիւններու, այնտեղ սորվեցանք թեր ու դէմ կարծիքներ փոխանակել եւ զրոյցի ճամբով՝ եզրակացնել։
Հետեւելով առողջ միտք եւ առողջ մարմին կարգախօսին, ամէն օր կարգապահ կերպով մարզուեցանք եւ վերջապէս՝ երեկոյեան ընկերային կեանքի ժամանակ, բոլորս միասին զուարճացանք։
Մեր բանակումի խորհրդաւոր պարտականութիւնը պահակութեան պահն է, գիշերը՝ երբ մանաւանդ բանակող ընկերները կը քնանան, հերթափոխութեամբ բոլոր պատանիները կը հսկեն բանակավայրի ապահովութեան եւ կը պահեն մեր դրօշակները։ Կարեւոր պարտականութիւն է։
Կրնանք ըսել, թէ Հ.Յ.Դ. Պատանեկան միութեան Վարիչ մարմնոյ կազմակերպած այս բանակումը մեր միութեան տուեալ տարեշրջանի մը աշխատանքներուն եզրափակիչ փուլն է։ Բանակումի աշխատանքներուն ընթացքին, կարելիութիւնը կ՚ունենանք արժեւորելու մեր տարած գործը, այսինքն Վարիչ մարմնոյ համար յստակ կը դառնայ, թէ որքանով տարեշրջանի սկիզբին մեր նշանակած թիրախները իրականանալու ընթացքի մէջ են։ Անհրաժեշտութեան պարագային, յաջորդ տարեշրջանին, նոյն թիրախներուն իրագործման համար կը փորձենք որդեգրել տարբեր ոճ։
Որո՞նք են մեր թիրախները։
Առաջին՝ խօսիլ մեր գեղեցիկ մայրենին, առնուազն Պատանեկանի շաբաթօրեայ ժողովներուն եւ բանակումի ընթացքին։ Կը հաւատանք, որ ազգի մը մայրենին անոր մշակոյթի կարեւոր մասնիկն է։
Երկրորդ՝ սորվիլ մեր անցեալի յեղափոխական պատմութիւնը իր հերոս ֆետայիներու ճամբով, անոնց մասին գրուած երգերը, որոնք պատմական դրուագ մը կը ներկայացնեն։
Երրորդ՝ ճանչնալ մեր հայրենիքը՝ Հայաստանը, մեր ազատագրուած Արցախը եւ մեր նորագոյն պատմութիւնը իր հերոսներով։
Չորրորդ՝ սորվիլ մեր գաղութի կառոյցը ու անոր պատմութիւնը։
Հ.Յ.Դ. Յունաստանի Պատանեկան միութիւնը մեր գաղութին մէջ ներկայ է անցեալ դարու 40ական թուականներէն։
Այս միութեան անդամակցած են մեզմէ շատերուն ծնողները որպէս պատանի եւ ապագային՝ վարիչ։ Ներկայ Վարիչ մարմինի կազմն ալ ատենին եղած է Պատանեկանի շարքերուն մէջ, վարիչ ունենալով մեր այս տարուան բանակող պատանիներուն ծնողներէն ոմանք։ Այս երեւոյթն ալ մեր գաղութի պատմութեան մէկ մասնիկն է։
Վստահ ենք եւ կը հաւատանք, թէ մեր Միութիւնը ապագայ կը խոստանայ, ապա մեր մաղթանքն է, որ 39ը թիւը հասնի եռանիշ թիւի մը։
Այս պահը օգտագործելով, Վարիչ մարմինի եւ օգնական վարիչներու կազմը շնորհակալութիւն կը յայտնէ Հ.Յ.Դ. Կեդրոնական կոմիտէի Երիտասարդական եւ Պատանեկան Միութիւններու մօտ ներկայացուցիչին, որ ամբողջ տարեշրջանի ընթացքին, ինչպէս նաեւ բանակումի օրերուն, ան մօտէն հսկեց մեր աշխատանքներուն ու սատարեց, որ անոնք բարեյաջող աւարտին հասնին։
Շնորհակալական խօսք ունինք Հայ Կապոյտ Խաչի Շրջանային վարչութեան, որ ամէն տարի իր նիւթական նպաստով գործնապէս կ՚օժանդակէ բանակումին։ Հ.Կ.Խաչի բարոյական քաջալերանքը խորապէս կը զգանք մեզի փոխանցուած գուրգուրանքին մէջ։
Շնորհակալ ենք մեր պատանիներու ծնողներուն, որոնք իրենց զաւակները մեզի վստահեցան բանակումի 10 օրերուն ընթացքին։
