Յառաջիկայ Կիրակի՝ 2 Ապրիլին, Հայաստանի քաղաքացիներուն օրն է, ազատ կամքի արտայայտութեան օրը:
Անոնք իրենց քուէներով պիտի ձեւաւորեն վարչապետական- խորհրդարանական համակարգի առաջին Ազգային ժողովը, որ միանգամայն պիտի կազմէ «նոր սկիզբ»ը ժողովրդավար ու «արդար Հայաստան»ի կերտումին:
«Նոր սկիզբ — արդար Հայաստան»…:
Մեր հայրենիքին համար նոր սկիզբ մը պիտի ըլլայ անկասկա’ծ խորհրդարանական համակարգը, որու պայմաններուն մէջ, Ազգային ժողովը բաղկացնող կուսակցութիւնները պիտի դադրին ձեւական ներկայութիւն ըլլալէ եւ խորքային գործունէութեան լծուելով՝ պիտի ունենան հնարաւորութիւնը ըստ իրենց ծրագիրներուն հետապնդելու ժողովրդային տարբեր շերտերու քաղաքական, գաղափարական, ընկերային թէ տնտեսական առաջադրանքները եւ ատով իսկ անոնք պիտի կարենան լիարժէք կատարել կամրջողի-միջնորդողի իրենց իսկական առաքելութիւնը՝ քաղաքացիական հասարակութեան եւ պետութեան միջեւ:
Սակայն արդար Հայաստան կերտելու ճամբան երկար է ու դժուար եւ ականներով լեցուն: Որովհետեւ քաղաքական ոլորտի ու շուկայական յարաբերութեանց տիրապետող մենաշնորհներու հաստատած համակարգին կազմաքանդումն է արդար Հայաստան կերտելու նախապայմանը, որուն համար անհրաժեշտ են յարատեւ պայքա՛րը, վճռականութի՛ւնը, քաղաքացիական արիութիւնը եւ մանաւանդ՝ ժողովրդային նեցո՛ւկն ու զօրակցութի՛ւնը:
Կը յուսանք, որ քուէարկողը պիտի չտարուի շահախնդիրներու կողմէ ըստ պահի ու պարագայի տրուած շռայլ խոստումներէն եւ կամ՝ ղարաբաղեան հակամարտութիւնը ամէն չարիքի պատճառ համարող եւ խաղաղութիւն բերելու լօզունգով հրապարակը աղմկող շուտիկ ու պատեհապաշտ մարդոցմէն: Հայաստանցին շատ լաւ գիտէ, թէ հակամարտութեան այս ժամանակաշրջանի՛ն է, որ դիզուեցաւ հսկայ ու անհաշիւ հարստութիւնը օլիկարխներու, որոնք շնչահեղձ դարձուցին երկրին տնտեսութիւնն ու քաղաքացիին առօրեան:
Հ.Յ.Դ.ին համակրող թէ հակակրող ամէն հայ մարդ գիտէ, որ անոր երկարամեայ կեանքի պատմութիւնը, վտանգի պահերուն թէ խաղաղ ժամանակներուն, եղած է յարատեւ պայքարի ու բազմաճակատ գործունէութեան հանդիսարան մը՝ ի խնդիր հայութեան:
26 տարիներու Հ.Յ.Դ.ի հայաստանեան գործունէութիւնը կը վկայէ, որ ան հետեւողականօրէն պաքարած է կուսակցութեան առաջադրած նպատակներուն համար, մերթ ընդդիմադիր դիրքերէ, նաեւ ի հարկին, իր վարկանիշը վտանգելու գնովն իսկ, չէ վարանած գործակցելու իշխանութեանց հետ, միշտ ի շահ եւ յօգուտ հայրենիքին ու ազգին:
Հ.Յ.Դ.ը 26 տարի անդուլ հետապնդեց, որ հայրենիքը օժտուի խորհրդարանական համակարգով, ուր այսուհետեւ լսելի պիտի դառնան քաղաքացիներու ձայնն ու պահանջները:
Հիմա Հ.Յ.Դ.ին գերխնդիրն է՝ հայրենի ժողովուրդին հետ ու ժողովուրդին համար կերտել արդար Հայաստան: Դաշնակցութեան նպատակն է հաստատել ընկերային արդարութիւն, ապահովել տնտեսական աճ եւ մանաւանդ ապահովել ստեղծուած տնտեսական արդիւնքի արդար բաշխումը հասարակութեան բոլոր խաւերուն եւ անդամներուն միջեւ:
Կ’ակնկալուի, որ հայրենի քաղաքացին պիտի արժեւորէ ներկայացուած առիթը եւ ըստ այնմ պիտի կողմնորոշուի, թեւ ու թիկունք պիտի տայ 127ամեայ փորձի տէր Հ.Յ.Դ.ին:
Քուէն ուժ է: Քուէն պիտի արժեւորուի Հ.Յ.Դ.ին տրուելով:
Յամենայնդէպս, ընտրանքը անբռնաբարելի իրաւունքն է Հայաստանի քաղաքացիին:
Հ.Յ.Դ. Յունաստանի Կեդր. Կոմիտէ
