22 եւ 23 Հոկտեմբեր 2022-ին, Ֆիքսի «Արամ Մանուկեան» ակումբի «Աւետիքեան» սրահը դարձաւ հաւաքավայրը Հ.Յ.Դ. Յունաստանի Երիտասարդական միութեան պատգամաւորներուն, որոնք գումարեցին իրենց 73-րդ Պատգամաւորական ժողովը, լուսարձակի տակ առնելով տարուան մը ընթացքին իրագործուած աշխատանքները եւ քննութեան առարկայ դարձնելով նոր տարեշրջանի ծրագիրները։
Երկօրեայ իրենց տեւողութեամբ, գաղութիս դաշնակցական կազմակերպ երիտասարդութեան այս համախմբումները գլխաւոր առիթները կը հանդիսանան, մէկ կողմէն քննարկելու եւ արժեւորելու երիտասարդական նուաճումները, միւս կողմէն աւելի ամրապնդելու հայ երիտասարդներու կառչումը Հայաստանի ու Արցախի հիմնախնդիրներուն, Հայ դատի հետապնդման աշխատանքներուն՝ ազգային, քաղաքական, դաստիարակչական, քարոզչական եւ յարաբերական ոլորտներուն մէջ հայ երիտասարդութեան հետաքրքրութիւններու հօրիզոնները ընդլայնելու ակնկալումով։
Ֆիքսի «Դրօ», Գոքինիոյ «Փոթորիկ» եւ Թեսաղոնիկէի «Ս. Թեհլիրեան» խումբերու պատգամաւորներուն, Հ.Յ.Դ. Կեդրոնական կոմիտէի Երիտասարդականի մօտ ներկայացուցիչին, Հ.Յ.Դ. Պատանեկան միութեան Ընդհ. վարիչ մարմնոյ, Պատանեկանի Աթէնքի խումբերու հրաւիրեալ երկու անդամներու, Հ.Յ.Դ. կոմիտէներուն, «Ազատ Օր»-ի եւ միութիւններու ներկայացուցիչներուն մասնակցութեամբ ժողովը իր աշխատանքները սկսաւ Շաբաթ, 22 Հոկտեմբերի երեկոյեան։
Մնայուն դիւան ընտրուեցան ընկերներ Սեւակ Գազարեան, Վահրամ Մանկոյեան, Ժաննա Յովսէփեան եւ Անայիս Բարսեղեան, որոնք ձեռնհասօրէն վարեցին ժողովի ընթացքը։
Առաջին նիստի սկիզբին, մասնակցող կառոյցներու ներկայացուցիչները հանդէս եկան ողջոյնի խօսքերով, որոնք շնորհաւորեցին Միութեան գործունէութիւնը եւ յորդորեցին մեր երիտասարդները առաւել թափով իրենց ուշադրութիւնը սեւեռեն Հայաստանի ու Արցախի վրայ, միաժամանակ իրենց գործունէութեան առանցքը դառձնեն գաղութի երիտասարդութեան ներգրաւումը։
Բանաձեւի եւ հաշուէքննիչ յանձնախումբերու ընտրութենէն ետք, տեղի ունեցաւ շրջանաւարտ Կեդր. վարչութեան եւ խումբերու տեղեկագիրներու ընթերցումը, որմէ ի յայտ եկաւ թէ, հակառակ ստեղծուած դժուարութիւններուն եւ մասամբ համավարակի տարածութեան, միութիւնը իր 207 անդամներով ունեցած է լայն գործունէութիւն զանազան բնագաւառներու մէջ։ Հայաստանի ու Արցախի իրադարձութիւններուն նկատմամբ Կեդր. վարչութեան գործունէութիւնը դարձաւ միութեան կարեւորագոյն աշխատանքի դաշտը։ Ուշագրաւ էին ցուցական եւ քարոզչական աշխատանքները, որոնք ուղղուած էին յոյն ժողովուրդին, իրազեկելու համար Կովկասեան տարածաշրջանին մէջ տիրող կացութեան մասին եւ բացայայտելու ատրպէյճանական յարձակողականութեան բոլոր երեսները Հայաստանի եւ Արցախի ինքնիշխանութեան հանդէպ։
Ժողովական կեանքը եւ դաստիարակչական ծրագիրները եւս քննարկումի եւ խօսակցութեան առիթներ ստեղծեցին, մատնանշելով այն բացթողումները, որոնք արձանագրուեցան անցնող տարեշրջանի ընթացքին։
Յաջորդաբար, լսուեցաւ Հ.Յ.Դ. Պատանեկան միութեան Ընդհ. վարիչ մարմնոյ տեղեկագիրը, որ ներկայացուց Աթէնքի եւ Թեսաղոնիկէի երեք խումբերու տարեկան գործունէութիւնը։
Պատանեկանը իր տարեշրջանը բոլորեց 124 անդամներով, որոնք ամէն շաբաթ կ՚ունենան իրենց անդամական ժողովները եւ կը զբաղին դաստիարակչական ծրագիրներով, մտային զարգացումի եւ այլ տեսակի խաղերով, դաստիարակչական պտոյտներով, արշաւներով եւ ընկերային հաւաքներով։
Միութեան գործունէութիւնը իր գագաթնակէտին կը հասնի ամառնային բանակումի կազմակերպումով, որ այս տարի իրագործուեցաւ Թրիփոլիի մօտ գտնուող ծովեզերեայ բանակավայրի մը մէջ, մասնակցութեամբ մօտ 90 պատանիներու եւ վարիչներու։ Նաեւ տեղի ունեցաւ հրապարակային երեկոյ ծնողներու եւ այցելուներու մասնակցութեամբ, որուն ընթացքին գործադրուեցաւ գեղարուեստական յայտագիր եւ յաջորդեց խրախճանք։
Ժողովի երկրորդ օրուան ընթացքին, մասնակցող պատգամաւորները լայնօրէն քննարկեցին նոր տարեշրջանի գործունէութեան մանրամասնութիւնները, անդրադառնալով այն բոլոր առաջարկներուն, որոնք եկած էին խումբերու ընդհանուր ժողովներէն։ Հայաստանի ու Արցախի իրավիճակի քննարկումը, հայ դատի պահանջատիրութեան կազմակերպումը, խումբերը աւելի աշխուժացնելու պահանջը, հայ երիտասարդութեան մօտ դաշնակցական երիտասարդ սերունդի ազգային եւ գաղափարական աշխարհը բանալու անհրաժեշտութիւնը, քաղաքական գործունէութիւնը ընդլայնելու կարեւորութիւնը, ընկերային ցանցերուն մէջ աւելի գործուն դառնալու հրամայականը, Հայաստանի ու Արցախի երիտասարդութեան հետ շփուելու հնարաւորութիւնները դարձան մասնակից պատգամաւորներու զրոյցներուն եւ վերլուծումներուն կիզակէտը։
Երկրորդ օրուան մէջ, ժողովի մասնակիցները առիթը ունեցան տեսակապով զրուցելու Հ.Յ.Դ. Բիւրոյի Երիտասարդական գրասենեակի պատասխանատուներ ընկ. Արշակ Մեսրոպեանի եւ ընկ.հի Ցողիկ Աշըգեանի հետ։ Երկու ընկերները ներկայացուցին համահայկական երիտասարդական ծրագիրները եւ յատկապէս Սիւնիքի մէջ ծաւալած աշխատանքները, որոնք կը միտին հայրենի երիտասարդութիւնը կառչած պահել իրենց ապրած վայրին եւ ընկերային ու տնտեսական յառաջդիմութեան առիթներ ստեղծել նոր սերունդին մօտ, միշտ ի մտի ունենալով ազգային հզօրացումի հրամայականը։
Նաեւ Հ.Յ.Դ. Կ.Կ.ի անդամ ընկ. Յարութ Սպարթալեան լայնօրէն զեկուցեց Հայ դատի աշխատանքներուն եւ հետագայ ծրագիրներուն մասին:
Պէտք է նշել, թէ հակառակ տիրող կեանքի պայմաններուն, հայրենիքէն հեռու՝ այլասերիչ մթնոլորտի մէջ հասակ նետող սերունդներուն, բոլոր պատգամաւորներու հայախօսութեան ջանքերը գնահատելի էին, ցոյց տալով, թէ կազմակերպ հաւաքականութիւններու մէջ, ուր կը տիրէ ազգային եւ գաղափարական ջերմ մթնոլորտ, հայ երիտասարդի հոգեմտային աշխարհին վրայ ազդող ներգործութիւնը իր դրական եւ խրախուսիչ արդիւնքը կու տայ, նպատակ ունենալով կազմաւորել ամբողջական գիտակցութեամբ եւ գաղութին ու Հայ դատին ծառայելու նուիրեալ հայորդիներ։
Ժողովը իր աւարտին ընտրեց նոր Կեդրոնական վարչութիւն, որ իր կարգին կազմեց դիւան հետեւեալ կերպով.- Երուանդ Մանուկեան՝ ատենապետ, Սուլա Պարտաքճեան՝ քարտուղար, Արմէն Չաքալեան՝ գանձապահ եւ խորհրդականներ՝ Վահրամ Մանկոյեան, Օննիկ Պետրոսեան, Արամ Պետրոսեան եւ Աննա-Մարիա Ալեքսանեան։
Իր եզրափակիչ խօսքին մէջ, Հ.Յ.Դ. Կեդրոնական կոմիտէի ներկայացուցիչ ընկ. Տիգրան Չիչէքեան շնորհաւորեց ժողովի մասնակիցները իրենց ունեցած շինիչ ներկայութեան համար, մատնանշեց մշակուած բոլոր առաջարկներու գործադրութեան անհրաժեշտութիւնը, նշելով Հ.Յ.Դ. հիմնադիրներէն՝ Ս. Զաւարեանի նշանաւոր պատգամը, թէ «Խօսքը առանց գործի մեռեալ է»։ Ան բարի յաջողութիւն մաղթեց նորընտիր Կեդրոնական վարչութեան ու հաւաստիացուց, թէ Հ.Յ.Դ. պատասխանատու մարմինը պիտի գտնուի երիտասարդութեան կողքին, սատարելով ամէն տեսակի ծրագիրներու իրագործման։
Ժողովը վերջ գտաւ «Մշակ, բանուոր» քայլերգի միաբերան երգեցողութեամբ։
